ખાનગી કંપનીમાં નોકરી કરતા આસામીના ફ્લેટનું તાળું તોડી રૂ।.૮૦ હજારની ચોરી

Author: નોબત સમાચાર

ખાનગી કંપનીમાં નોકરી કરતા આસામીના ફ્લેટનું તાળું તોડી રૂ।.૮૦ હજારની ચોરી

બપોરથી સાંજ સુધીમાં તાળું તોડી ચોરી કરાઈઃ

જામનગર તા. ૨૨: જામનગરના સરલાબેન ત્રિવેદી આવાસ પાછળ આવેલા અર્ચના એપાર્ટમેન્ટમાં ભાડેથી રહેતા મૂળ અમરેલી જિલ્લાના વતની અને ખાનગી કંપનીમાં નોકરી કરતા એક આસામીના ફલેટના મુખ્ય દરવાજાનું તાળું તોડી કોઈ તસ્કરે રૂ।.૮૦ હજાર રોકડાની ચોરી કરી છે.

જામનગરના સરૂ સેક્શન રોડથી ગોલ્ડન સિટી તરફ જવાના રસ્તા પર આવેલા સરલાબેન ત્રિવેદી આવાસની પાછળ અર્ચના એપાર્ટમેન્ટમાં ૧૦૫ નંબરના બ્લોકમાં ભાડેથી રહેતા અને ખાનગી કંપનીમાં નોકરી કરતા કૃણાલભાઈ વિનુભાઈ મેસીયા નામના આસામી ગયા શનિવારે પોતાની નોકરી પર ગયા હતા.

તે દરમિયાન બપોરના ત્રણ વાગ્યાથી સાંજના સાત વાગ્યા દરમિયાન તેમના ફલેટમાં કોઈ તસ્કર ઘૂસી ગયો હતો. મુખ્ય દરવાજાનું તાળું તોડી અંદર પ્રવેશેલા તસ્કરે ખાંખાખોળા કર્યા પછી કબાટ ખોલી નાખ્યો હતો અને તેમાં રાખેલો પ્લાસ્ટિકનો ડબ્બો કાઢી લઈ તેમાં મૂકવામાં આવેલી રૂ।.૮૦ હજારની રોકડ ઉઠાવી લીધી હતી.

ઉપરોક્ત બાબતની ફરિયાદ કૃણાલભાઈએ ગઈકાલે સિટી સી ડિવિઝન પોલીસ સ્ટેશનમાં નોંધાવી છે. પીએસઆઈ કે.એચ. ચાવડાએ ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...