નૂરી ચોકડી નજીકથી રેઢી મળી આવેલી મોટરમાંથી સાંપડ્યો ૪૦૦ લીટર દેશી દારૂ

Author: નોબત સમાચાર

નૂરી ચોકડી નજીકથી રેઢી મળી આવેલી મોટરમાંથી સાંપડ્યો ૪૦૦ લીટર દેશી દારૂ

ખંભાળિયા નાકા પાસેથી છ ચપલા ઝડપાયાઃ

જામનગર તા. ૧૭: જામનગરના ખંભાળિયા નાકા પાસેથી પોલીસે એક શખ્સને ઈંગ્લીશ દારૂના છ ચકલા સાથે પકડી પાડ્યો છે. જ્યારે નૂરી ચોકડી પાસે રેઢી મળી આવેલી સ્વીફ્ટ મોટરમાંથી ૪૦૦ લીટર દેશી દારૂ ઝડપાયો છે. મોટર, દેશી દારૂ કબજે કરી પોલીસે મોટરના ચાલક, માલિકની શોધ શરૂ કરી છે.

જામનગરના ખંભાળિયા નાકા વિસ્તારમાંથી ગઈકાલે સાંજે પસાર થઈ રહેલા હીરજી મીસ્ત્રી રોડ પર એકતા એપાર્ટમેન્ટમાં રહેતા લેખરાજ ભગવાનદાસ કાલવાણી નામના શખ્સને પેટ્રોલિંગમાં રહેલા સિટી એ ડિવિઝનના સર્વેલન્સ સ્ટાફે શકના આધારે રોકી તલાશી લીધી હતી.

આ શખ્સ પાસેથી ઈંગ્લીશ દારૂના છ ચપલા મળી આવ્યા હતા. પોલીસે ચપલા કબજે કરી લેખરાજ કાલવાણીની ધરપકડ કરી છે.

જામનગરની નૂરી ચોકડી પાસે એક મોટરમાં દેશી દારૂનો જથ્થો લઈ જવાતો હોવાની બાતમી સિટી એ ડિવિઝનના જમાદાર આર.એ. જાડેજા, ડી.એન. જાડેજાને મળતા પીઆઈ એન.એ. ચાવડાને વાકેફ કરાયા પછી પોલીસ કાફલો વોચમાં ગોઠવાયો હતો.

તે દરમિયાન મોરકંડા રોડ પરથી આવેલી જીજે-૧૮-બીડી ૮૦૮૦ નંબરની સ્વીફ્ટ મોટરના સગડ મળ્યા હતા. કમાન્ડ એન્ડ કંટ્રોલના સીસીટીવી ફૂટેજ ચકાસણી સગડ દબાવાતા આ મોટર નુરી ચોકડી પહેલા અન્નપૂર્ણા મંદિર તથા કાળકા માતાના મંદિર તરફ ગઈ હોવાનું ખૂલ્યું હતું. ત્યાં પહોંચેલી પોલીસને મોટર મળી આવી હતી. તેનો ચાલક મોટર રેઢી મૂકી નાસી ગયો હતો.

પોલીસે મોટરની તલાશી લેતા તેમાંથી બાચકામાં દેશી દારૂની ભરેલી કોથળીઓ મળી આવી હતી. પોલીસે ૪૦૦ લીટર દેશી દારૂ તથા રૂ.૩ લાખની મોટર કબજે કરી મોટરના ચાલક-માલિકની શોધ શરૂ કરી છે.

જો આપને આ પોસ્ટ ગમી હોય તો શેર કરો...