અવિશ્વાસઃ દોસ્તી તૂટવા તરફનું પહેલું પગલું

બે દોસ્ત સમીર અને દિશા. વિજાતીય દોસ્ત સાત વર્ષ જૂની દોસ્તી. જો કે, દોસ્તી શુદ્ધ જ, કયાંય કોઈ લાલચ કે અપેક્ષા નહીં. બસ બન્ને લાગણીથી જોડાયેલા હતાં. ફોન-મેસેજથી હંમેશાં જોડાયેલા રહેતા. કયારેય કયારેક મળતા પણ ખરા અને એક દિવસ અચાનક સમીરે કહ્યું, "દિશા, કાલે મળવા આવને." બન્ને વચ્ચે દોસ્તી એટલી મજબૂત હતી કે, હક્કથી મળવા બોલાવી શકાતા. સમીરે પણ હક્કથી મળવા માટેનું કહ્યું, પણ દિશાના ઘરે તેના ભાઈ-ભાભી આવવાના હતા એટલે તેણે સોરી કહીને ના પાડી. સમીરને તેની 'ના'થી ધક્કો લાગ્યો. દિશાને કહે કે, "થોડીવાર માટે પણ આવી જા. પણ દિશાના ભાઈ-ભાભી ત્રણ વર્ષે ઘરે આવતાં હોવાથી તેનાથી તે દિવસે નીકળવું શક્ય ન હતું. તેણે ફરીથી સમીરને સમજાવ્યો પણ ખબર નહીં કયારેય દિશાની વાત પર અવિશ્વાસ ન કરનાર સમીરને આ વાત બહાનું લાગી. તેણે કહ્યું કે, "ભાઈ-ભાભી ઘરે છે એ ફોટો પાડીને મોકલ. તો તારી વાત માનું."  અને સમીરનો મેસેજ વાંચી દિશાના હાથમાંથી મોબાઈલ પડી ગયો. આઘાતથી સુન્ન થઈ ગઈ. આવો અવિશ્વાસ? આટલા વર્ષે? તેણે સમીરને કંઈ કહ્યું નહીં, પણ તેનું દિલ તૂટી ગયું.

બે સહેલી. મીના અને રીના. પાક્કી દોસ્ત. એકબીજાના કપડાં, ઘરેણાં પહેરે, એકના ઘરે સારી વાનગી બની હોય તો બીજાના ઘરે મોકલે. એટલી પાક્કી દોસ્તી કે એકબીજાના ઘરનો કબાટ ખોલીને પણ પોતાને જોઈતી વસ્તુ લઈ લે. એકવાર મીનાને લગ્નમાં જવાનું થયું. રીના પાસેથી તેણે રીનાએ થોડો સમય પહેલાં જ ખરીદેલી ડિઝાઈનર સાડી પહેરવા માંગી. રીનાએ કહ્યું, "સોરી મીના. એ સાડી તો મારી ભાભી પહેરવા લઈ ગઈ છે. તેના પિયરમાં લગ્ન છે એટલે ગઈકાલે જ લઈ ગઈ. તે પહેલાં કહ્યું હોત તો તેને ના પાડી દેત." મીના કંઈ ન બોલી. પણ તેના ચહેરા પર ન ગમવાના ભાવ આવી ગયા. બન્ને સહેલીઓએ થોડી વાતો કરી અને રીના નાસ્તો લેવા રસોડામાં ગઈ. મીનાએ તરત જ તેનું કબાટ ખોલ્યું અને રીનાની વાત સાચી છે કે ખોટી તે તપાસવા તેની સાડીઓ જોવા લાગી. અચાનક રીના આવી ગઈ અને તેને મીનાની હરકત સમજાય ગઈ. પોતાની વર્ષો જૂની સહેલીને પોતાની વાત પરનો અવિશ્વાસ જોઈ તેના હાથમાંથી નાસ્તાની ડીશ પડી ગઈ.

કલ્પેશ અને સોનાક્ષી બે દોસ્ત. વર્ષોની દોસ્તી. બન્ને પરિણીત. પોતપોતાના સંસારમાં ખુશ. એકબીજાની બધી વાતની ખબર. ઘરની આર્થિક વ્યવહારની, નોકરીની બધી જ વાત એકબીજાને કરે. અચાનક સોનાક્ષીના જીવનમાં બીજો દોસ્ત આવ્યો. માત્ર દોસ્ત જ. સોનાક્ષીએ આ વાત કલ્પેશને કહી અને કલ્પેશથી આ સહન ન થયું. તેને લાગ્યું કે, તેની દોસ્ત તેની પાસેથી છીનવાઈ જશે, તે સોનાક્ષી પર શંકા કરવા લાગ્યો. તેની જાસૂસી કરવા લાગ્યો. જ્યારે સોનાક્ષીને કલ્પેશના મનમાં જાગેલી શંકાની ખબર પડી ત્યારે તેને આઘાત લાગ્યો. દોસ્તીમાં આવો અવિશ્વાસ...??

દોસ્તી... એક અદ્ભુત સંબંધ. અજાણ્યા સાથેનો જાણીતો સંબંધ. સગાં આપણને લોહીના સંબંધથી મળે છે. તેની સાથે મને-કમને પણ વ્યવહાર સાચવવો પડે છે પણ દોસ્ત... આપણને દિલના, લાગણીના સંબંધથી મળે છે. તેમની સાથે વ્યવહાર સાચવવો પડતો નથી. આપણે જાતે જ સચવાય જઈએ છીએ. અન્ય સંબંધોમાં મર્યાદા જાળવવી પડે. જેવો સંબંધ તેવું વર્તન કરવું પડે. પણ દોસ્તી, તેમાં કાંઈ જ બંધન નથી. જેવા છીએ એવા જ વ્યક્ત થઈ જવાનું હોય છે. દોસ્ત એ જ છે કે, જે આપણેને આપણી તમામ ખામી અને ખૂબીઓ સાથે અપનાવે. દોસ્ત એકબીજાને બગાડે છે, સુધારતા નથી. દોસ્ત ક્યારેકય કોઈ આદત-ટેવ બદલવાનું નહીં કહે. જેવા છીએ એવા જ તેને સ્વીકાર્ય છે. કયારેક એવું બને છે કે એક દોસ્તની કોઈ આદત બીજા દોસ્તને ગમતી ન હોય, તો પણ એ તેને આદત છોડવાનું નહીં કહે. દોસ્તીમાં કોઈ વચન નથી. કોઈ બંધન નથી. કોઈ આશા-અપેક્ષા નથી. કોઈ લાલચ નથી. કોઈ વ્યવહાર નથી. દોસ્તી તો દિલનો સંબંધ છે. લાગણીનો વ્યવહાર છે. એકબીજાની પરિસ્થિતિને અનુકૂળ થઈને વહેતો સંબંધ છે. બે વ્યક્તિઓની દોસ્તીમાં કોઈ ત્રીજી વ્યક્તિ આવે તો પણ તે સમાય જાય છે. કોઈ એક દોસ્તના લગ્ન થાય કે તેને કોઈ સાથે પ્રેમ થાય એટલે દોસ્તી તૂટી નથી જતી.

ઉપરના ત્રણેય કિસ્સામાં પાત્રોના નામ બદલ્યા છે. વિજાતીય દોસ્તીના બન્ને કિસ્સા શુદ્ધ દોસ્તી જ હતાં. પ્રેમસંબંધ ન હતો, છતાં દોસ્ત પર અવિશ્વાસ કર્યો. તેના પર શંકા કરી અને દોસ્તી તૂટવાના આરે પહોંચી ગઈ. મીના અને રીનાના કિસ્સામાં રીના થોડી વધારે અમીર એટલે રીનાની 'ના'થી મીનાને લાગ્યું કે તેની સુંદર સાડી બગડી જવાના ડરથી ના પાડે છે. પણ દોસ્તીમાં અમીર-ગરીબ, ઉંચ-નીચ ન હોય. કોઈ નુકસાન થાય તો પણ દોસ્તીમાં તે અસર ન કરી. દોસ્તી તો તમામ સંબંધોથી ઉપર છે. એક પલડામાં અન્ય તમામ સંબંધો મૂકો અને બીજા પલડામાં દોસ્તી મૂકો. તો પણ દોસ્તીનું પલડું નમેલું રહે. દોસ્તી એ ભગવાનની અનમોલ ભેટ છે.

આવી દોસ્તીમાં કયારેય અવિશ્વાસ ન કરાય. હૃદયથી સ્વીકારેલા સંબંધોમાં શંકા ન કરાય. માન્યું કે, દોસ્ત પર તમામ હક્ક છે. દોસ્તને જરૃર હોય ત્યારે અન્ય દોસ્ત સાથે રહેવું જ જોઈએ. પણ છતાં દોસ્ત પણ એક માણસ જ છે ને. તેને પણ અંગત જવાબદારી હોય જ ને. તે કયારેક દોસ્તી ન નિભાવી શકે. કયારેક સમય ન આપી શકે, તો તેનો મતલબ એમ નથી કે તે સ્વાર્થી છે કે તે ખોટું બોલે છે. ના પાડયા પછી પણ તેના મનમાં દુઃખ તો હોય જ છે. પણ કયારેક જવાબદારીન ભાર તળે મજબૂર હોય છે અને તેણે ના પાડવી જ પડે છે. જો કે ના પાડવી વખતે તેના મનમાં એટલો વિશ્વાસ તો હોય જ છે કે, દોસ્ત તેની પરિસ્થિતિ સમજશે. તેનાથી નારાજ નહીં થાય. દોસ્તી પર તેને વિશ્વાસ હોય છે. પણ જ્યારે અન્ય દોસ્ત તેની 'ના'નું ખોટું અર્થઘટન કરે, તેના પર શંંકા કરે, ત્યારે દોસ્તીમાં તડ પડી જાય છે. જો કે, દોસ્તી એવો સંબંધ છે કે આ તડ પાછી તરત જોડાય જાય છે. પણ કયારેક આવી તડ ખાઈ ન બની જાય તે જોવાની જવાબદારી દોસ્તોની છે. દોસ્તીના સંબંધને કયારેક અવિશ્વાસ આવે તો પણ તેને મગજ પર હાવી થવા ન દો. કયારેક એવું પણ બનતું હોય છે કે એક દોસ્તના હિત માટે બીજો દોસ્ત ખોટું બોેલે તો તેની 'ના' પાછળના કારણોમાં ન પડો. તેની 'ના' ને સ્વીકારી લો. દોસ્તી તૂટવા ન દો

વિચારજો. તમારી દોસ્તીમાં ક્યારેય અવિશ્વાસ નથી આવ્યોને??

  • દીપા સોની-જામનગર


close
Ank Bandh 29 March
close
PPE Kit