મહારાષ્ટ્રના મહાબળેશ્વરમાં ૪૮ કલાકમાં ૧૯ ઈંચ વરસાદ ખાબકયોઃ જળબંબાકાર

Author: નોબત સમાચાર

મહારાષ્ટ્રના મહાબળેશ્વરમાં ૪૮ કલાકમાં ૧૯ ઈંચ વરસાદ ખાબકયોઃ જળબંબાકાર

આજથી ત્રણ દિ' અતિ ભારે વરસાદની વોર્નિંગ

મુંબઈ તા. ૪: મહાબળેશ્વરમાં ૪૮ કલાકમાં ૧૯ ઈંચ વરસાદથી સહ્યાદ્રી પર્વતમાળા થઈ જળ તરબોળ થઈ ગઈ છે. હવામાન વિભાગે મધ્ય મહારાષ્ટ્ર, કોંકણ અને ઘાટ વિસ્તારોમાં તા. ૪ થી ૬ જુલાઈ દરમ્યાન અતિભારે વરસાદની ચેતવણી આપી છે.

મહારાષ્ટ્રના સતારા જિલ્લાના પ્રસિદ્ધ હિલસ્ટેશન મહાબળેશ્વરમાં છેલ્લા બે દિવસથી અતિભારે વરસાદ નોંધાયો છે. પ્રાથમિક સ્ટેશન અપડેટ મુજબ સવારે ૮:૩૦ વાગ્યા સુધીના છેલ્લા ૨૪ કલાકમાં ૨૬૬ મીમી અને ૪૮ કલાકમાં કુલ ૪૫૨.૮ મીમી વરસાદ નોંધાયો હોવાની માહિતી છે.

ભારતીય હવામાન વિભાગે પણ મધ્ય મહારાષ્ટ્ર, કોંકણ અને ઘાટ વિસ્તારોમાં તા. ૪ થી ૬ જુલાઈ દરમ્યાન અતિભારે વરસાદની ચેતવણી આપી છે. નીચાણવાળા વિસ્તારોમાં પાણી ભરાવા, ભૂસ્ખલન, ઝાડ પડવા અને માર્ગ વ્યવહાર ખોરવાવાની શક્યતા દર્શાવવામાં આવી છે.

મહારાષ્ટ્રના સહ્યાદ્રી પર્વતમાળાના મહત્ત્વના વરસાદી કેન્દ્ર મહાબળેશ્વરમાં મેઘરાજાએ જોરદાર બેટીંગ કરતા સમગ્ર ઘાટ વિસ્તાર પાણી-પાણી થયો છે. મહાબળેશ્વર હવામાન કેન્દ્રના પ્રાથમિક વરસાદી અપડેટ મુજબ આજે સવારે ૮:૩૦ વાગ્યા સુધીના છેલ્લા ૨૪ કલાકમાં ૨૬૬ મીમી વરસાદ નોંધાયો છે, જ્યારે છેલ્લા ૪૮ કલાકનો કુલ વરસાદ ૪૫૨.૮ મીમી સુધી પહોંચ્યો છે. આટલો ભારે વરસાદ થતાં વેનાલોક, પંચગણી-મહાબળેશ્વર રોડ અને આસપાસના જંગલ-ઘાટ વિસ્તારોમાં ધુમ્મસ, પાણીનો વહાવો અને ભેજભર્યો માહોલ જોવા મળી રહ્યો છે.

ભારતીય હવામાન વિભાગના મુંબઈ પ્રાદેશિક કેન્દ્રએ ૪ જુલાઈના મધ્ય મહારાષ્ટ્ર માટે પ્રથમ, બીજા અને ત્રીજા દિવસે "અતિભારે વરસાદ"ની ચેતવણી જાહેર કરી છે. આ ચેતવણીમાં ૪, ૫ અને ૬ જુલાઈએ મધ્ય મહારાષ્ટ્રમાં અલગ-અલગ સ્થળોએ અતિભારે વરસાદ, તેમજ ગાજવીજ સાથે ઝંઝાવાતી પવનની શક્યતા દર્શાવવામાં આવી છે. મહાબળેશ્વર સતારા જિલ્લામાં આવેલું હોવા છતાં તે મધ્ય મહારાષ્ટ્રના ઘાટ વરસાદી પટ્ટા સાથે જોડાયેલું હોવાથી આ ચેતવણી ખાસ મહત્ત્વ ધરાવે છે.

જો આપને આ પોસ્ટ ગમી હોય તો શેર કરો...