ફ્લેટમાંથી મળી આવ્યા ઈંગ્લીશ દારૂના ૫૨૮ ચપલા

Author: નોબત સમાચાર

ફ્લેટમાંથી મળી આવ્યા ઈંગ્લીશ દારૂના ૫૨૮ ચપલા

શીશાંગ પાસેથી ૧૧ બોટલ સાથે એક ઝડપાયોઃ

જામનગર તા. રરઃ જામનગરના મોહનનગર સ્થિત ફલેટમાંથી પોલીસે બે શખ્સને ઈંગ્લીશ દારૂના ૫૨૮ ચપલા સાથે પકડી પાડ્યો છે. કાલાવડના શીશાંગ પાસેથી એક પરપ્રાંતીય શખ્સ ૧૧ બોટલ સાથે મળી આવ્યો છે. ખટીયા પાટીયા પાસેથી એક શખ્સની બોટલ સાથે પોલીસે અટકાયત કરી છે.

જામનગરના મોહનનગર આવાસમાં એક ફ્લેટમાં ઈંગ્લીશ દારૂનો જથ્થો પડ્યો હોવાની બાતમી પરથી સિટી એ ડિવિઝનના સર્વેલન્સ સ્ટાફે પીઆઈ એન.એ. ચાવડાની સૂચનાથી ગઈકાલે દરોડો પાડ્યો હતો.

ત્યાં આવેલા બ્લોક નં.૧૦ અને ફલેટ નં.૫૦૭માં પોલીસે ચકાસણી કરતા તે ફલેટમાં ભાડે રહેતા હીરેન ઉર્ફે હીરેન્દ્ર પ્રાગજીભાઈ ચુડાસમા તથા રાજપાર્ક નજીક આદિત્યપાર્ક સ્થિત શેરી નં.૧માં રહેતો વૈભવ રમેશભાઈ ચતવાણી નામના બે શખ્સ મળી આવ્યા હતા અને તેના કબજામાંથી ભારતીય બનાવટના અંગ્રેજી શરાબના ૫૨૮ ચપલા મળી આવ્યા હતા. આ શખ્સોનો એક મોબાઈલ સહિત રૂ.૧૨૦૬૦૦નો મુદ્દામાલ કબજે કરી પોલીસે બંનેની ધરપકડ કરી છે.

કાલાવડ તાલુકાના શીશાંગ ગામથી નિકાવા તરફ જવાના રસ્તા પર ગઈકાલે બપોરે પસાર થઈ રહેલા મૂળ રાજસ્થાનના કરોલી જિલ્લા ના સીબારામ હરરૂપ સિંગ નામના શખ્સને કાલાવડ ગ્રામ્ય પોલીસે રોકાવી ચેક કરતા તેના કબજામાંથી દારૂની ૧૧ બોટલ મળી આવી હતી. પોલીસે બોટલ કબજે કરી સીબારામની ધરપકડ કરી પૂછપરછ હાથ ધરી છે.

લાલપુર તાલુકાના ખટીયા ગામના પાટીયા પાસે ગઈકાલે રાત્રે મોટી ખાવડી ગામનો જીગર પૂનાભાઈ લુણા ઉર્ફે ભારા રબારી નામના શખ્સને ઈંગ્લીશ દારૂની બોટલ સાથે પોલીસે પકડી લીધો છે.

જો આપને આ પોસ્ટ ગમી હોય તો શેર કરો...