જામનગરના બે શખ્સે ટ્રકની એનઓસી કઢાવી આપવાના બહાને છેતરપિંડી આચરી

Author: નોબત સમાચાર

જામનગરના બે શખ્સે ટ્રકની એનઓસી કઢાવી આપવાના બહાને છેતરપિંડી આચરી

રૂા.૮,૯૯,૯પ૦ રોકડા અને ટ્રક ઓળવી ગયાઃ

જામનગર તા.૮ : પોરબંંદર જિલ્લાના એક આસામી પાસેથી ત્રણ વર્ષ પહેલાં જામનગરના એક શખ્સે એક ટ્રક ખરીદી તેની તથા બીજા ટ્રકની એનઓસી કઢાવી આપવાની વાતો કરી રૂા.૮,૯૯,પપ૦ લઈ લીધા હતા. પાછળથી એનઓસી ન મળતા ટ્રક વેચનારે જાતે જ લોન ભર્યા પછી પોતાની રકમ પરત માંગતા તે રકમ અને ટ્રક ઓળવી જવાતા મામલો પોલીસમાં પહોંચવા પામ્યો છે.

પોરબંદરના બળેજ ગામ પાસે નેસમાં વસવાટ કરતા દેવા લાખાભાઈ કોડીયાતર નામના ડ્રાઈવરે થોડા વર્ષ પહેલા બે ટ્રક લોન પર ખરીદ્યા હતા. તે દરમિયાન બંને ટ્રકના હપ્તા ભરી ન શકાતા તેઓએ પોતાના મિત્રને ટ્રક વેચી નાખવાની વાત કરી હતી. તેથી જામનગરના આમીન નોતીયાર અને રામ ભીમશીભાઈ નંદાણીયાનો સંપર્ક કરાવાયો હતો.

આ બંને શખ્સે વાતચીત કર્યા પછી દેવાભાઈનો જીજે-૧૧-વાય ૯૯૬૩ નંબરનો ટ્રક વર્ષ ૨૦૨૨માં આમીન નોતીયારે ખરીદ્યા પછી લોન ભરપાઈ કરી એનઓસી કઢાવશે તેમ કહ્યું હતું અને જીજે-રપ-યુ ૯૮૬૩ નંબરના ટ્રકના એનઓસી માટે પણ સેટલમેન્ટ કરવું પડશે તેમ કહી આમીને રૂા.૮,૯૯,પપ૦ રામ નંંદાણીયાને આપી દેવાનું કહેતા દેવાભાઈએ તે રકમ આંગડીયા તેમજ ચેક અને ગૂગલ પેથી ભરપાઈ કરી હતી.

ત્યારપછી વાયદા મુજબ બંને એનઓસી કઢાવી ન અપાતા દેવાભાઈએ ફોન કરી આમીનના સંપર્કનો પ્રયત્ન કર્યાે હતો. તેનો ફોન નહીં ઉપડતા રામ નંદાણીયાને વાત કરાઈ હતી. આ શખ્સે પણ જુદા જુદા બહાના કાઢી સમય પસાર કર્યાે હતો. તેથી કંટાળેલા દેવાભાઈ એ બંને લોનની રકમ જાતે જ ભરપાઈ કરી હતી અને ચુકવેલા રૂપિયા પરત માંગતા તેઓને રકમ પરત અપાઈ ન હતી અને જીજે-૧૧-વાય ૯૯૬૩ નંબરનો ટ્રક પણ ઓળવી લેવાયો હતો. આથી સિટી બી ડિવિઝન પોલીસ સ્ટેશનમાં ગઈકાલે દેવાભાઈ કોડીયાતરે ફરિયાદ કરી છે.

જો આપને આ પોસ્ટ ગમી હોય તો શેર કરો...