હાલાર 'હેમાળો' બનતા તીવ્ર ઠંડીઃ ન્યુનત્તમ ૧૦ ડીગ્રી

Author: નોબત સમાચાર

હાલાર 'હેમાળો' બનતા તીવ્ર ઠંડીઃ ન્યુનત્તમ ૧૦ ડીગ્રી

તાપમાનનો પારો એક જ દિવસમાં ૩ ડીગ્રી ગગડ્યોઃ

જામનગર તા. ૧૦: જામનગરમાં આજે સવારે પૂરા થતાં ચોવીસ કલાક દરમિયાન ન્યુનત્તમ તાપમાનનો પારો ૩ ડીગ્રી સુધી ગગડીને સિઝનમાં પ્રથમ વખત ૧૦ ડીગ્રીએ પહોંચી ગયો હતો, જેના પગલે ગઈકાલનો દિવસ સિઝનનો સૌથી 'કોલ્ડ ડે' રહ્યો હતો. ઉત્તર ભારતના હિમ જેવા ઠંડા વાયરા અને તાપમાનમાં થયેલા ઘટાડાના પગલે હાલાર જાણે 'હેમાળો' બની ગયો હોય તેવી હાડ થીજવતી ઠંડી અનુભવાઈ રહી છે. ઠંડીનું મોજુ ફરી વળતા હાલારીઓ ધ્રુજી ઊઠ્યા છે.

લેહ-લદ્દાખ, જમ્મુ-કાશ્મીર, ઉત્તરાખંડ તેમજ હિમાચલપ્રદેશમાં હિમવર્ષાનો દોર ચાલી રહ્યો છે, જે ગઈકાલે પણ યથાવત્ રહ્યો હતો. ઉત્તર ભારતના મોટાભાગના વિસ્તારોમાં તાપમાનનો પારો માઈનસમાં ચાલ્યો ગયો છે. ઝરણા અને સરોવરોને થીજવાનો પ્રારંભ થઈ ગયો છે. મેદાનો, પહાડો, વૃક્ષો અને ઘરો બરફ આચ્છાદીત થઈ ગયા છે. બરફવર્ષાના કારણે ઘણાં માર્ગો બંધ થઈ જતા મુસાફરો તથા સ્થાનિકોને ભારે હાલાકીનો સામનો કરવો પડી રહ્યો છે.

ઉત્તર ભારતમાં થઈ રહેલ હિમવર્ષાના પગલે ભારતના મોટાભાગના રાજ્યોમાં પણ ઠંડીમાં વધારો થયો છે. પંજાબ, હરિયાણા, દિલ્હી, ઉત્તરપ્રદેશ, બિહાર, મધ્યપ્રદેશ, રાજસ્થાન સહિતના રાજ્યોમાં પણ તીવ્ર ઠંડી પડી રહી છે.

હિમાલય પરથી આવતા ઠંડા પવનના પગલે ગુજરાતમાં પણ દિન-પ્રતિદિન ઠંડીમાં વધારો થઈ રહ્યો છે. નલિયા, કંડલા, અમરેલી અને રાજકોટમાં ન્યુનત્તમ તાપમાનનો પારો સિંગલ ડિઝિટમાં ચાલ્યો જતા લોકો ધ્રુજી ઊઠ્યા છે.

જામનગરમાં શનિવારે સવારે પૂરા થતાં ચોવીસ કલાક દરમિયાન ન્યુનત્તમ તાપમાનનો પારો ત્રણ ડીગ્રી સુધી નીચે શરકીને સિઝનમાં પ્રથમ વખત ૧૦ ડીગ્રીએ પહોંચી ગયો હતો, જેમા પગલે જામનગરમાં ગઈકાલનો દિવસ સિઝનનો સૌથી ઠંડો દિવસ બની ગયો હતો.

જાન્યુઆરી માસમાં ખરા અર્થમાં જામનગર અને દેવભૂમિ દ્વારકા જિલ્લામાં શિયાળાએ ગતિ પકડી લીધી છે. ઘટતા તાપમાન અને ઉત્તર ભારતના પહાડો પરથી આવતા ઠંડા પવનના પગલે સમગ્ર હાલાર પંથક 'હેમાળો' બની ગયો હોય તેવી તીવ્ર ઠંડી અનુભવાઈ રહી છે. જામનગર અને દ્વારકા જિલ્લામાં ઠંડીનું મોજુ ફરી વળ્યું છે. હાડથીજવતી ઠંડીના પગલે પ્રજાજનો ધ્રુજી ઊઠ્યા છે. ઘરમાં પણ જનતાને ગરમ વસ્ત્રો પહેરવાની ફરજ પડી રહી છે. શિયાળાએ જમાવટ કરતા ગરમ વસ્ત્રોના વિક્રેતાઓને ત્યાં ગ્રાહકોના ધસારામાં પણ વધારો થઈ રહ્યો છે.

ઠંડી સામે રક્ષણ મળે તે માટે હાલારવાસીઓએ રાત્રે કામ વગર ઘરની બહાર જવાનું ટાળ્યું હતું. આ ઉપરાંત ગરમ વસ્ત્રો, ગરમ પીણા તથા તાપણાનો સહારો લીધો હતો.

નગરમાં આજે સવારે પૂરા થતાં ચોવીસ કલાક દરમિયાન એક ડીગ્રીના ઘટાડા સાથે મહત્તમ તાપમાન ર૩.પ ડીગ્રી નોંધાયું હતું. વાતાવરણમાં ભેજનું પ્રમાણ ૬૩ ટકા રહ્યું હતું. પવનની ગતિ પ્રતિકલાકની સરેરાશ ૧પ થી ર૦ કિ.મી.ની રહેવા પામી હતી.

જો આપને આ પોસ્ટ ગમી હોય તો શેર કરો...