કલ્યાણપુરના ભાટવડીયામાં થયેલી ઘરફોડ ચોરીમાં એક શખસની અટકઃ ચોરીની કબૂલાત

Author: નોબત સમાચાર

કલ્યાણપુરના ભાટવડીયામાં થયેલી ઘરફોડ ચોરીમાં એક શખસની અટકઃ ચોરીની કબૂલાત

રૂ।.૧ લાખ પ૯ હજારનો મુદ્દામાલ કબજે થયોઃ

જામનગર તા. ૨૪: કલ્યાણપુરના ભાટવડીયા ગામમાં ગયા મંગળવારે એક મકાનના નળીયા ખેસવી ઘરમાંથી રૂ।.૧ લાખ ૮૦ હજારની ચોરી થઈ હતી. તે ચોરીનો ભેદ એલસીબીએ ઉકેલી ભાટવડીયાના એક શખ્સની અટકાયત કરી છે. વાડામાં સંતાડીને રાખવામાં આવેલી રોકડ તથા મોબાઈલ મળી રૂ।.૧,૫૯,૦૦૦નો મુદ્દામાલ કબજે કરાયો છે.

કલ્યાણપુર તાલુકાના ભાટવડીયા ગામમાં વસવાટ કરતા બાબુભાઈ કેશાભાઈ સોનગરાએ ગયા મંગળવારે પોલીસમાં ફરિયાદ નોંધાવી તેમાં જણાવ્યું હતું કે, કોઈ શખ્સો તેના મકાનના નળીયા ઉંચકાવી અંદરથી રૂ।.૧ લાખ ૮૦ હજાર રોકડાની ચોરી થઈ છે.

ઉપરોક્ત ગુન્હાની કલ્યાણપુર પોલીસ દ્વારા શરૂ કરવામાં આવેલી તપાસમાં એલસીબીએ પણ ઝૂકાવ્યું હતું. જેમાં પીઆઈ એન.એચ. જોષીની રાહબરી હેઠળ પીએસઆઈ બી.એમ. દેવમુરારી તથા એમ.આર. સવસેટાના વડપણ હેઠળની બે ટીમ કાર્યરત બની હતી.

તે દરમિયાન મળેલી ચોક્કસ બાતમીના આધારે ભાટવડીયા ગામમાં રહેતા સામત લખુભાઈ સોનગરા નામના શખ્સને દબોચી લેવામાં આવ્યો છે. તેની પૂછપરછ કરાતા આ શખ્સે ચોરીની કબૂલાત આપી પોતાના ઘરની બાજુમાં આવેલા વાડામાં સંતાડીને રાખેલી રૂ।.૧,૫૮,૫૦૦ની રોકડ તથા એક મોબાઈલ કાઢી આપ્યો છે. કુલ રૂ।.૧,૫૯,૦૦૦નો મુદ્દામાલ કબજે કરી પોલીસે આરોપીની ધરપકડ કરી છે.

જો આપને આ પોસ્ટ ગમી હોય તો શેર કરો...