પાલિકાના કર્મચારીઓ-પેન્શનરો બે માસથી પગાર પેન્શન માટે ટળવળે તે કેમ ચાલે?

Author: નોબત સમાચાર

પાલિકાના કર્મચારીઓ-પેન્શનરો બે માસથી પગાર પેન્શન માટે ટળવળે તે કેમ ચાલે?

રાજ્ય સફાઈકર્મી મંડળની રજૂઆત

ખંભાળિયા તા. ૩૧: રાજ્ય સફાઈ કર્મી મહામંડળે ખંભાળિયા પાલિકાના કર્મચારીઓ બે માસના પગારથી વંચિત હોવાની રજૂઆત કરી તત્કાળ પગાર-પેન્શન ચૂકવવાની માંગણી ઊઠાવી છે.

ખંભાળિયા પાલિકા સફાઈ કર્મચારી મંડળના આગેવાન તથા રાજ્યના સફાઈ કર્મી મંડળના મહામંત્રી રમેશભાઈ વાઘેલા દ્વારા પાલિકાના પ્રમુખશ્રી, ચીફ ઓફિસર તથા રાજ્યના પ્રાદેશિક ન.પા. નિયામકને લેખિત રજૂઆત કરીને ખંભાળિયા ન.પા.ના કર્મચારીઓને માટે નવેમ્બર-ડિસેમ્બર માસનો ચડત પગાર તથા પેન્શન તાકીદે ચૂકવવા માંગ કરી છે.

રજુઆતમાં તેમણે જણાવેલ કે રાજ્ય સકાર દ્વારા ઓકટ્રોય વિકલ્પમાં ઓક્ટ્રોય વળતર ગ્રાન્ટ નિયમિત રીતે ચૂકવવામાં આવે છે જેમાંથી સૌ પ્રથમ કર્મચારીઓના પગાર, પેન્શન, ગ્રેજ્યુટી, પ્રોવિડન્ટ ફંડ ચૂકવવાના હોય છે. તે પછી જ બીજો ખર્ચ થાય, પરંતુ ખંભાળિયા પાલિકા દ્વારા રાજ્ય સરકારની સૂચનાઓનું અને આદેશોનું વારંવાર ઉલ્લંઘન કરીને ન્યુનત્તમ વેતનના મજુર કાયદાનો ભંગ કરીને ખંભાળિયા પાલિકાના કર્મચારીઓ તથા પેન્શનરોને બે માસથી પગાર-પેન્શન ચૂકવાયું નથી. નાના કર્મચારીઓ તથા ફીક્સ પગાર રોજમદારોની આર્થિક સ્થિતિ દયાજનક થઈ ગઈ હોય, જાન્યુઆરી રપ માં ઓક્ટ્રોય વિકલ્પ ગ્રાન્ટ ફાળવાય ત્યારે તુરતજ બે માસના પગાર-પેન્શન ચૂકવવા માંગ કરાઈ છે.

ઉલ્લેખનિય છે કે, ખંભાળિયા સી. વર્ગની પાલિકા હોવા છતાં ઓક્ટ્રોય વિકલ્પ ગ્રાન્ટ ગોધરા જેવી ન.પા. એ-વર્ગનીને ૩૩ લાખ મહિને આવે છે ત્યારે ખંભાળિયાને ૪૩ લાખ આવે છે, પણ માસિક પગાર ખર્ચ ૬૪ લાખ રૂપિયા છે જેથી અન્ય કરવેરા આવક ઓછી હોય, પગારના સાંસા થાય છે.

જો આપને આ પોસ્ટ ગમી હોય તો શેર કરો...