ગીત-સંગીત, મોજ-મસ્તી સાથે આજે રાત્રે ર૦ર૪ને બાય-બાયઃ ર૦રપના વધામણા

Author: નોબત સમાચાર

ગીત-સંગીત, મોજ-મસ્તી સાથે આજે રાત્રે ર૦ર૪ને બાય-બાયઃ ર૦રપના વધામણા

આજે સાંજથી જ શરૂ થશે થર્ટી ફર્સ્ટની ઉજવણીઃ ટુરિઝમ ડેસ્ટીનેશન્સ, હિલ સ્ટેશનો ઉભરાયાઃ મસ્તીનો માહોલ

નવી દિલ્હી તા. ૩૧: વર્ષ ર૦ર૪ નો આજે અંતિમ દિવસ છે. કાલથી ર૦રપ નું આગમન થનાર છે. રાત્રે ૧ર ના ટકોરે આતશબાજી સાથે અંગ્રેજીના નવા વર્ષને વધાવવા યુવાનોમાં થનગનાટ જોવા મળી રહ્યો છે. આજે સાંજથી ડીજે, ડાન્સ, મસ્તી, ડીનર સાથે થર્ટીફર્સ્ટ સેલિબ્રેશન શરૂ થશે. આ કારણે પાર્ટી પ્લોટ, રિસોર્ટ, હોટલો, ડિસ્કો થેકમાં રાતભરના કાર્યક્રમો યોજાશે. પ્રવાસન સ્થળો-હિલ સ્ટેશનો હાઉસફૂલ છે.

આજે ર૦ર૪ ના વર્ષનો અંતિમ દિવસ છે. સારા-નરસા અનુભવો, ખાટી-મીઠી યાદો, અવિસ્મરણીય સંભારણાઓ ઉપરાંત અનેક સારા-નરસા બોધપાઠ સાથે આજે રાત્રે ૧ર વાગ્યે ર૦ર૪ નું વર્ષ વિદાય લેશે અને નવા વર્ષ ર૦રપ નો પ્રારંભ થશે. નવી આશાઓ-ઉમ્મીદો-સપનાઓ સાથે નવા વર્ષનો પ્રારંભ થશે. એવામાં આજે થર્ટીફર્સ્ટની ઉજવણીનો ઉન્માદ દેશભરમાં છવાયો છે. બાય બાય ર૦ર૪ અને વેલકમ ર૦રપ ની ઉજવણી કરવા દેશના નાના-મોટા શહેરોમાં થનગનાટ જોવા મળી રહ્યો છે. આજે મધ્ય રાત્રિના ૧ર વાગ્યે આતશબાજી સાથે નવા વર્ષને વધાવવા જામનગર સહિત દેશભરમાં હોટલો, પાર્ટી પ્લોટ, રિસોર્ટ, ફાર્મ હાઉસ, ડિસ્કો થેકમાં વિવિધ પ્રકારના સેલિબ્રેશનના આયોજનો થયા છે. ડીજે વીથ ડાન્સ-ડીનરના કાર્યક્રમોમાં ભાગ લેવા યુવા વર્ગ થનગની રહ્યો છે.

બીજી તરફ આ ઉજવણીના રંગમાં ભંગ ન પડે તે માટે પોલીસતંત્ર પણ સતર્ક બન્યું છે. દેશભરમાં કેક કાપીને પણ નવા વર્ષને વધાવવાની તૈયારીઓ થઈ છે, તો બીજી તરફ હીલસ્ટેશનો, પ્રવાસન સ્થળોએ પણ નવા વર્ષની ઉજવણીનો માહોલ જોવા મળી રહ્યો છે.

આજે ગુજરાતમાં દારૂબંધી હોવાથી રાત્રિના સમયે શરાબ કે અન્ય નશીલા દ્રવ્યોની મહેફિલો સામે પોલીસતંત્ર પણ સતર્ક છે.

જામનગર સહિત હાલારમાં પણ થર્ટીફર્સ્ટની ઉજવણીનો ઉમંગ છવાયેલો જોવા મળે છે, અને આજે સાંજથી જ પાર્ટી પ્લોટો, હોટલો, રેસ્ટોરન્ટ, ફાર્મ હાઉસ, રિસોર્ટ સહિતના સ્થળોમાં ગીત-સંગીત-નૃત્ય સાથે લોકો ઝૂમી ઊઠશે.

હાલારના દ્વારકા, બેટદ્વારકા, હર્ષદ, નાગેશ્વર સહિતના યાત્રાધામો ઉપરાંત શિવરાજપુર, ઓખામઢી સહિતના બીચ તથા સૌરાષ્ટ્રના હરવા-ફરવાના સ્થળો, પ્રવાસન સ્થળો તથા યાત્રાધામોમાં પણ આજે વિશેષ ધસારો જોવા મળી રહ્યો છે.

જો આપને આ પોસ્ટ ગમી હોય તો શેર કરો...