જી. જી. હોસ્પિટલના નવનિર્માણનું કામ ત્રણ વર્ષમાં થશે સંપન્નઃ કેબિનેટ મંત્રી મૂળુભાઈ બેરા

Author: નોબત સમાચાર

જી. જી. હોસ્પિટલના નવનિર્માણનું કામ ત્રણ વર્ષમાં થશે સંપન્નઃ કેબિનેટ મંત્રી મૂળુભાઈ બેરા

વૈકલ્પિક વ્યવસ્થાઓ ટૂંક સમયમાં ઊભી થઈ જશેઃ

જામનગર તા. ૧૭: કેબિનેટ મંત્રી મૂળુભાઈ બેરાએ જામનગરની ગુરૂ ગોવિંદસિંઘ સરકારી હોસ્પિટલની મુલાકાત લઈ વૈકિલ્પક વ્યવસ્થાઓની સમીક્ષા કરી હતી, અને જણાવ્યું હતું કે, વૈકલ્પિક વ્યવસ્થાઓ પૂર્ણ થયા બાદ હોસ્પિટલના નવનિર્માણનું કાર્ય આગામી ત્રણ વર્ષમાં સંપન્ન થશે.

રાજ્યના વન અને પર્યાવરણ, પ્રવાસન, સાંસ્કૃતિક પ્રવૃત્તિઓ તથા ક્લાયમેટ ચેન્જ વિભાગના કેબિનેટ મંત્રી મૂળુભાઈ બેરાએ જામનગરની ગુરુ ગોવિંદસિંઘ જનરલ હોસ્પિટલના નવનિર્માણ અંગે હોસ્પિટલની મુલાકાત લઇ ઊભી કરવામાં આવેલ વૈકલ્પિક વ્યવસ્થાઓની સમીક્ષા કરી હતી. એમ.પી. શાહ સરકારી મેડિકલ કોલેજના ડીન ડો.નંદીની દેસાઈ તેમજ હોસ્પિટલના સુપ્રિટેન્ડેન્ટ ડો.દિપક તિવારીએ નવનિર્મિત હોસ્પિટલના વિકલ્પ તરીકે ઊભી કરવામાં આવેલ વિવિધ સુવિધાઓની મંત્રીને વિગતવાર માહિતી આપી હતી.આ તકે મંત્રીએ જનરલ ઓપીડી, ગાયનેક, ટ્રોમા ઇમરજન્સી, પીડિયાટ્રિક, સર્જરી સહિતના વિભાગો અંગેની જાણકારી મેળવી હતી તેમજ દર્દીઓ તેમજ તેમના પરિવારજનો માટે ઊભી કરવામાં આવેલ વિવિધ વ્યવસ્થાઓ ચકાસી જરૂરી માર્ગદર્શન પૂરું પાડ્યું હતું.

આ અંગે મંત્રીએ જણાવ્યું કે સ્થાનિક ધારાસભ્યો તથા આગેવાનોની માંગણી ધ્યાને લઈ રાજ્ય સરકાર દ્વારા ગુરુ ગોવિંદસિંઘ હોસ્પિટલના નવ નિર્માણ માટે ગત બજેટમાં જરૂરી રકમની ફાળવણી કરવામાં આવેલ છે. હોસ્પિટલ તથા હોસ્ટેલના નવ નિર્માણનું કાર્ય વહીવટી ક્ષેત્રે હાલ પ્રગતિ હેઠળ છે.દરમિયાન દર્દીઓને કોઈપણ પ્રકારની મુશ્કેલી ન પડે તે માટે આ સ્થળે ઊભી કરવાની થતી વૈકલ્પિક વ્યવસ્થાઓનું કાર્ય પણ ટૂંક સમયમાં પૂર્ણ કરવામાં આવશે. મંત્રીએ વધુમાં જણાવ્યું કે કેમ્પસના નવ નિર્માણનું કાર્ય ત્રણ વર્ષમાં પૂર્ણ કરવામાં આવશે તેમજ જૂના બિલ્ડીંગની બાજુમાં જ હંગામી વ્યવસ્થાઓ હાલ ગોઠવાઈ રહી છે. આ કામગીરી સંપન્ન થયા બાદ જુના બિલ્ડીંગનું ડિમોલીશન કરી આગળનું કામ શરૂ કરાશે.૭૪ એકર વિસ્તારમાં ફેલાયેલ જી.જી.હોસ્પિટલ તથા એમ.પી.શાહ સરકારી મેડિકલ કોલેજમાં ૧૫ જેટલા હોસ્પિટલ બિલ્ડીંગ, ૭૦ સ્ટાફ ક્વાર્ટર, નર્સિંગ કોલેજ તથા હોસ્ટેલ બિલ્ડીંગ સહિતની સુવિધાઓ નિર્માણ પામશે.સાથે સાથે ડેન્ટલ કોલેજ, ફિજીયોથેરાપી કોલેજ તથા મેન્ટલ હોસ્પિટલનો પણ આમાં સમાવેશ કરવામાં આવશે.

જો આપને આ પોસ્ટ ગમી હોય તો શેર કરો...