ઉપાસના ઠક્કરને 'જામનગર રત્ન' પ્રતિભા એવોર્ડ

Author: નોબત સમાચાર

ઉપાસના ઠક્કરને 'જામનગર રત્ન' પ્રતિભા એવોર્ડ

ગુજરાત રાજ્ય સેવા સમિતિ અને જીનિયસ ક્લબ-જામનગર દ્વારા

જામનગર તા. ૧૭: જામનગરની ધરાએ હંમેશાં અસાધારણ પ્રતિભાઓને જન્મ આપ્યો છે, અને આવી જ એક શ્રેષ્ઠ પ્રતિભા છે દીપાલી ઉર્ફે ઉપાસના નટવરલાલ ઠક્કર . તેઓ માત્ર એક કલાકાર જ નથી, પણ એક સંગીત સાધિકા, ચિત્રકાર, શિલ્પકાર, કાઉન્સેલર, આર્ટ થેરાપીસ્ટ અને સમાજ માટે સમર્પિત વ્યક્તિ છે.

તાજેતરમાં, ૯ માર્ચ ૨૦૨૫ ના *ગુજરાત રાજ્ય સેવા સમિતિ* અને *જીનિયસ ક્લબ*, જામનગર દ્વારા *જામનગર રત્ન* પ્રતિભા સન્માનથી તેઓને નવાજવામાં આવ્યા હતાં.

આ સન્માન સમારોહમાં ગુજરાત રાજ્ય સેવા સમિતિના રાષ્ટ્રીય અધ્યક્ષ મિતેશસિંહ રાજૂપત, જામનગરના ડેપ્યુટી મેયર શ્રીમતી ક્રીષ્નાબેન સોઢા, પ્રિન્સીપાલ ડિસ્ટ્રીક એન્ડ સેશન જજ ઓફ ફેમિલી કોર્ટ શ્રી ટી.ડી. પડીયા, પીઆઈ જયદીપસિંહ રાઠોડ, પીએસઆઈ મણીબેન સાગઠીયા, નાયબ જિલ્લા વિકાસ અધિકારી શ્રીમતી દીપાબેન કોટક, જામનગર શહેર ભાજપ પ્રમુખ શ્રીમતી બીનાબેન કોઠારી, વાત્સલ્ય ધામ વૃદ્ધાશ્રમના પ્રેસિડેન્ટ શ્રીમતી ભાવનાબેન પરમાર વિગેરે વિશિષ્ટ મહાનુભાવો ઉપસ્થિત રહ્યા હતાં.

ઉપાસના ઠક્કરની પસંદગી માટેનું મુખ્ય કારણ કલાક્ષેત્રમાં તેમની વિવિધ સિદ્ધિઓ, સમાજ સેવા માટેનો અવિરત જુસ્સો અને કલા દ્વારા માનસિક સ્વાસ્થ્ય સુધારવા માટે કરેલા અથાગ પ્રયાસો છે.

આપણા માટે ગૌરવની વાત છે કે જામનગરની પવિત્ર ધરાએ એક અનમોલ રત્ન રૂપે *દીપાલી ઉર્ફે ઉપાસના ઠક્કર* નો ઉછેર કર્યો છે. તેઓ ગુજરાત અને સમગ્ર દેશ માટે એક ઉદાહરણરૂપ છે. તેમના આ સન્માન પર અનેક કલા પ્રેમીઓ અને સમાજસેવીઓએ આનંદ વ્યક્ત કરી તેમને શુભેચ્છાઓ પાઠવી છે.

જો આપને આ પોસ્ટ ગમી હોય તો શેર કરો...