ઠેબા બાયપાસ પાસે અજાણ્યા મીની ટ્રકે ઠોકર મારતા બાઈકચાલક વૃદ્ધનું મૃત્યુ

Author: નોબત સમાચાર

ઠેબા બાયપાસ પાસે અજાણ્યા મીની ટ્રકે ઠોકર મારતા બાઈકચાલક વૃદ્ધનું મૃત્યુ

એમ્બ્યુલન્સે ઠોકર મારતા બે યુવાનને થઈ ઈજાઃ

જામનગર તા. ૬: જામનગરના ઠેબા બાયપાસ પાસે ગઈકાલે સાંજે રાજકોટના એક વૃદ્ધના બાઈકને અજાણ્યું માલવાહક વાહન ઠોકર મારીને નાસી ગયું છે. ઘવાયેલા વૃદ્ધનું મૃત્યુ નિપજ્યું છે. નાસી છૂટેલા વાહનના ચાલક સામે પોલીસમાં ફરિયાદ કરાઈ છે. ભાઈબીજના દિવસે દિગ્જામ સર્કલ પાસે ૧૦૮ એમ્બ્યુલન્સની હડફેટે બાઈક ચઢી જતાં નગરના બે યુવાન ઘવાયા છે.

જામનગર-કાલાવડ રોડ પર આવેલા ઠેબા બાયપાસથી રાજકોટ તરફના ધોરીમાર્ગ પર ગઈકાલે રાત્રે રાજકોટના ભક્તિ નગર સર્કલ નજીક શિવસંકુલમાં રહેતા ધર્મેશભાઈ લાઠીયા નામના કુંભાર યુવાનના પિતા ભરતભાઈ ભીખુભાઈ લાઠીયા જીજે-૩-ઈએચ ૨૦૭૪ નંબરના હોન્ડા કંપનીના સાઈન મોટરસાયકલ પર જતા હતા.

આ વેળાએ એક અજાણ્યું છોટા હાથી પુરપાટ ઝડપે ધસી આવ્યું હતું તેના ચાલકે ઠોકર મારી દેતા ભરતભાઈ ફંગોળાઈ ગયા હતા. ગંભીર ઈજા પામેલા આ પ્રૌઢને સારવાર માટે જામનગરની જી.જી. હોસ્પિટલમાં ખસેડવામાં આવ્યા હતા. જ્યારે અકસ્માત સર્જી છોટા હાથી સ્થળ પરથી નાસી ગયું હતું. હોસ્પિટલમાં ભરતભાઈનું મૃત્યુ નિપજ્યું છે. ધર્મેશભાઈએ પંચકોશી બી ડિવિઝન પોલીસ સ્ટેશનમાં ફરિયાદ નોંધાવી છે. પોલીસે હિટ એન્ડ રનના આ બનાવની તપાસ શરૂ કરી છે.

જામનગરના કિસાનચોક વિસ્તારમાં મોદીના વાડા પાસે રહેતા હાર્દિકભાઈ બિપીનભાઈ કટારમલ અને તેમના મીત્ર હર્ષભાઈ રવિવારે રાત્રે દિગ્જામ સર્કલ પાસેથી જીજે-૧૦-ડીકે ૧૩૫૨ નંબરના બાઈક પર જતા હતા ત્યારે જીજે-૧૦-જીબી ૫૩૧૦ નંબરની ૧૦૮ એમ્બ્યુલન્સ ટકરાઈ પડી હતી. આ વાહનના ચાલકે પાછળથી ઠોકર મારી દેતા હાર્દિક તથા હર્ષ ફંગોળાઈ ગયા હતા. ઈજા પામેલા બંને યુવાને સારવાર લેવી પડી છે. હાર્દિકભાઈએ સિટી સી ડિવિઝન પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...