ઓવર સ્પીડીંગ વાહનો સામે તત્કાલ કાર્યવાહી કરવા કલેકટરની તાકીદ

Author: નોબત સમાચાર

ઓવર સ્પીડીંગ વાહનો સામે તત્કાલ કાર્યવાહી કરવા કલેકટરની તાકીદ

જામનગર જિલ્લા માર્ગ સલામતી સમિતિની બેઠકમાં

જામનગર તા. ૨૦: કલેકટર કેતન ઠકકરના અધ્યક્ષ સ્થાને જામનગર જિલ્લા માર્ગ સલામતી સમિતિની બેઠક યોજાઈ હતી, જેમાં કલેકટરે ઓવર સ્પીડીંગ વાહનો સામે તત્કાલ કાર્યવાહી કરવા તંત્રને તાકીદ કરી હતી.

જામનગર જિલ્લા કલેકટર કેતન ઠક્કરના અધ્યક્ષ સ્થાને કલેકટર કચેરીના સભાખંડમાં જીલ્લા માર્ગ સલામતી સમિતિની બેઠક યોજવામાં આવી હતી. લોકો માર્ગ અકસ્માતનો ભોગ ન બને તે અનુસંધાને જરૂરી પગલા લેવા કલેકટરએ સંબંધિત અધિકારીઓને સુચના આપી હતી.

આ બેઠકમાં અગાઉની બેઠક દરમિયાન લેવાયેલા નિર્ણયો મુજબ થયેલી કામગીરીની સમીક્ષા કરવામાં આવી હતી.

આ બેઠકમાં જામનગર મહાનગરપાલિકા દ્વારા માર્ગ અકસ્માતો ઘટાડવા માટે કરવામાં આવેલી કામગીરી જેમાં સાત રસ્તા સર્કલથી નાગનાથ જંકશન સુધીના રસ્તા પર સર્વિસ રોડ બનાવવાની કામગીરી શરુ કરવામાં આવી છે. ધુંવાવ પાસે તથા સમર્પણ સર્કલથી નાઘેડી જંક્શન સુધી ભૂગર્ભ ગટરનું કામ ચાલી રહૃાું હોય ભૂગર્ભ ગટર યોજના શાખા દ્વારા જરૂરી સાઈનેજીસ તથા ડાયવર્ઝનના બોર્ડ લગાવવામાં આવેલ છે.જામનગર જિલ્લામાં એપીએમસીમાં આવતા માલવાહક વાહનોમાં રેડીયમ અને રીફ્લેક્ટર લગાવવા માટેની તથા માર્કેટિંગ યાર્ડમાં ટ્રાફિક અવેરનેસ કાર્યક્રમોનું આયોજન કરવામાં આવેલ છે.

આ બેઠકમાં કલેકટર કેતન ઠક્કરે માર્ગ અકસ્માતોના સ્થળોની તપાસ, બ્લેક સ્પોટ્સ પર અકસ્માતો ઘટાડવા માટેના ઉપાયો, ઓવર સ્પીડીંગના વાહનોને લઈને તાત્કાલિક કાર્યવાહી કરવા તથા લોકોની સુરક્ષા અને સલામતીને પ્રાધાન્ય આપીને અકસ્માત થવાનો ભય હોય તેવા સ્થળોએ અકસ્માત ટાળવા અંગે જરૂરી પગલાઓ લેવા જણાવ્યું હતું.

આ બેઠકમાં જિલ્લા પોલીસ વડા પ્રેમસુખ ડેલુ, અધિક નિવાસી કલેક્ટર બી.એન. ખેર સહિત વિવિધ વિભાગોના વડા હાજર રહૃાા હતા.

જો આપને આ પોસ્ટ ગમી હોય તો શેર કરો...