એસ્ટેટ વિભાગના કર્મચારી પર હુમલાના કેસમાં આરોપીના આગોતરા જામીન નામંજૂર

Author: નોબત સમાચાર

એસ્ટેટ વિભાગના કર્મચારી પર હુમલાના કેસમાં આરોપીના આગોતરા જામીન નામંજૂર

આરોપી પોલીસ વિભાગમાં કોમ્પ્યુટર ઓપરેટર તરીકે બજાવે છે ફરજઃ

જામનગર તા.૨૮ : જામનગર મહાનગરપાલિકાના એસ્ટેટ વિભાગના કર્મચારી પર છરી-પાઈપથી ખોડિયારકોલોની પાસે હુમલો થયો હતો. એક આરોપીની પોલીસે ધરપકડ કર્યા પછી બીજા આરોપીનું નામ ખૂલતા તેણે આગોતરા જામીન મેળવવા અરજી કરી હતી. તે અરજી અદાલતે નામંજૂર કરી છે.

જામનગર મહાનગર પાલિકાની એસ્ટેટ શાખામાં ફરજ બજાવતા કુલદીપસિંહ કિરીટસિંહ પરમાર ખોડિયાર કોલોની પાસે મોલ નજીક બેઠા હતા ત્યારે તેઓને ફોન કરીને નાગરાજસિંહ રણજીતસિંહ જાડેજાએ ગાળો ભાંડ્યા પછી એક મોટરમાં ધસી આવેલા નાગરાજસિંહ અને અન્ય શખ્સો એ છરી-પાઈપથી હુમલો કરી કુલદીપસિંહને ગંભીર ઈજા પહોંચાડી હતી. પોલીસે હત્યા પ્રયાસ સહિતની કલમો હેઠળ ગુન્હો નોંધ્યો હતો.

તેની તપાસમાં નાગરાજ સિંહની ધરપકડ કરવામાં આવી હતી અને અન્ય એક આરોપી નીતિન ઉર્ફે મંથન દિનેશભાઈ વાઘેલાનું નામ ખૂલ્યું હતું. આ શખ્સે પોલીસ પોતાની ધરપકડ કરશે તેવી ભીતિથી આગોતરા જામીન મેળવવા અદાલતમાં અરજી કરી હતી.

તે અરજી અન્વયે આરોપી પક્ષે દલીલ કરી હતી કે, તેઓ આઠેક વર્ષથી પોલીસ ડિપાર્ટમેન્ટમાં કોમ્પ્યુટર ઓપરેટર તરીકે માનદ સેવા આપે છે અને પોલીસની પરીક્ષા પણ પાસ કરી ચૂક્યા છે અને નોકરી માટે તૈયારી કરી રહ્યા છે તે ઉપરાંત બનાવના સીસીટીવી ફૂટેજમાં પણ નીતિનનો રોલ સાબિત થતો નથી. અદાલતે બંને પક્ષની દલીલો સાંભળ્યા પછી આરોપી નીતિન ઉર્ફે મંથન વાઘેલાની આગોતરા જામીન અરજી નકારી કાઢી છે. મૂળ ફરિયાદી તરફથી વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા રોકાયા છે.

જો આપને આ પોસ્ટ ગમી હોય તો શેર કરો...