Author: નોબત સમાચાર
ખંભાળિયાના બેરાજા ગામના ખેતર સ્થિત મકાનમાં ચાલતો જુગારનો અખાડો ઝડપાયોઃ સાત શખ્સની અટકઃ એક ફરાર
કલ્યાણપુરના ચંદ્રાવાડામાંથી પણ જુગાર રમતા પાંચ પકડાયાઃ બે શખ્સ નાસી ગયાઃ
જામનગર તા. ૧૯: ખંભાળિયાના બેરાજા ગામમાં એક શખ્સના ખેતર સ્થિત મકાનમાં બુધવારે રાત્રે દ્વારકા એલસીબીએ દરોડો પાડી આઠ શખ્સને ગંજીપાના કૂટતા પકડી પાડી રૂ.૧૧ લાખ ૮૪ હજારનો મુદ્દામાલ કબજે લીધો છે. વાડી માલિક નાસી ગયો હતો. જ્યારે કલ્યાણપુરના ચંદ્રાવાડા ગામની સીમમાં ખેતર સ્થિત મકાનમાંથી એલસીબીએ જુગારનો અડ્ડો પકડી લીધો છે. પાંચ શખ્સ ઝડપાયા છે અને બે નાસી ગયા છે. રૂ.૧,૪૧,૯૭૦નો મુદ્દામાલ ઝબ્બે લેવામાં આવ્યો છે.
દેવભૂમિ દ્વારકા જિલ્લાના ખંભાળિયા તાલુકાના બેરાજા ગામમાં એક ખેતરમાં ગંજીપાના વડે જુગાર રમાતો હોવાની બાતમી પરથી બુધવારની રાત્રે એકાદ વાગ્યે દેવભૂમિ દ્વારકા એલસીબીના કાફલાએ બેરાજાની સીમમાં આવેલા હંજડાપર ગામના દેવાયત કુંભાભાઈ આંબલીયા નામના શખ્સના ખેતર સ્થિત મકાનમાં દરોડો પાડ્યો હતો.
આ મકાનમાં દેવાયત આંબલીયા તથા ખોડુભાઈ અરશીભાઈ હરીયાણી નામના શખ્સો દ્વારા ચલાવવામાં આવતો જુગારનો અડ્ડો ઝડપાઈ ગયો હતો. ત્યાં નાલ આપી તીનપત્તી રમી રહેલા કલ્યાણપુરના જગદીશભાઈ બચુભાઈ સચદેવ ઉર્ફે કનીયો, બકુલ ઉર્ફે મયુરપરી જયેશપરી ગોસ્વામી, મુન્નાભાઈ ભીખુભાઈ ચુડાસમા, માનણભાઈ રણમલભાઈ બુચડ, ગોવાભાઈ કારાભાઈ કરંગીયા, નીતિન કિશોરભાઈ રાઠોડ નામના છ શખ્સ મળી આવ્યા હતા.
એલસીબીએ પટમાંથી રૂ.૧ લાખ ર૪ હજાર રોકડા, સાત મોબાઈલ, મોટર મળી કુલ રૂ.૧૧ લાખ ૮૪ હજારનો મુદ્દામાલ કબજે કર્યાે છે. સ્થળ પરથી સાત આરોપીની ધરપકડ કરાઈ છે અને નાસી ગયેલા દેવાયત આંબલીયાની શોધ આરંભાઈ છે.
ઉપરોક્ત દરોડા પછી ગઈકાલે સાંજે દેવભૂમિ દ્વારકા એલસીબીના સ્ટાફે પીએસઆઈ બી.એમ. દેવમુરારીના વડપણ હેઠળ કલ્યાણપુર તાલુકાના ચંદ્રાવાડા ગામની સીમમાં આવેલા નગાભાઈ પરબતભાઈ મોઢવાડીયા નામના શખ્સના ખેતર સ્થિત મકાનમાં પૂર્વ બાતમીના આધારે દરોડો પાડ્યો હતો.
તે મકાનમાં પણ નાલ આપી તીનપત્તી રમતા જગાભાઈ જેસાભાઈ કારાવદરા, ભીખાભાઈ કારૂભાઈ કાગળીયા, મોહનભાઈ ચનાભાઈ સોલંકી, દિનેશભાઈ લખમણભાઈ ગામી, નાગાજણ ખીમાભાઈ મોઢવાડીયા નામના પાંચ શખ્સ ઝડપાઈ ગયા હતા. પોલીસને જોઈને મુન્નાભાઈ દુદાભાઈ પરમાર અને વાડી માલિક નગાભાઈ પરબતભાઈ નાસી ગયા હતા. એલસીબીએ પટમાંથી રૂ.૩૬૯૭૦ રોકડા, પાંચ મોબાઈલ, ત્રણ બાઈક મળી કુલ રૂ.૧,૪૧,૯૭૦નો મુદ્દામાલ ઝબ્બે લીધો છે. તમામ સાત સામે જુગારધારાની કલમ ૪, પ હેઠળ કલ્યાણપુર પોલીસ સ્ટેશનમાં ગુન્હો નોંધાવાયો છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
