વળતરની લાલચ બતાવી રૂ.૪૩.૫૦ લાખ મેળવનાર આસામીને ચેક પરતના પાંચ કેસમાં બે-બે વર્ષની કેદ

Author: નોબત સમાચાર

વળતરની લાલચ બતાવી રૂ.૪૩.૫૦ લાખ મેળવનાર આસામીને ચેક પરતના પાંચ કેસમાં બે-બે વર્ષની કેદ

મિત્ર પાસેથી રૂ.૭૦ હજાર હાથઉછીના લેનાર શખ્સને એક વર્ષની સજાઃ

જામનગર તા. ૧૯: જામનગરના એક આસામીએ પોતાના મિત્ર પાસેથી રૂ.૭૦ હજાર હાથઉછીના લઈ આપેલો ચેક પરત ફર્યાની કોર્ટમાં ફરિયાદ કરાઈ હતી. અદાલતે આરોપીને એક વર્ષની કેદ ફટકારી છે. જ્યારે શેરબજારમાં રોકાણ સામે તગડુ વળતર અપાવવાની વાતો કરી બે નિવૃત્ત આર્મીમેન પાસેથી રૂ.૪૩ લાખ ૫૦ હજાર મેળવી લીધા પછી પાંચ ચેક આપનાર શખ્સ સામે ચેક પરતની ફરિયાદો કરાઈ હતી. અદાલતે પાંચેય કેસમાં આરોપીને બે-બે વર્ષની કેદ અને ચેકની રકમનો દંડ ફટકાર્યાે છે.

જામનગરમાં રહેતા સાગર દિલી૫ભાઈ ગજરા પાસેથી દસાડીયા જીજ્ઞેશ હરીલાલે રૂ.૭૦ હજાર હાથઉછીના લીધા હતા. તે રકમની સામે ચેક અપાયો હતો. આ ચેક પરત ફર્યાની સાગર ગજરાએ કોર્ટમાં ફરિયાદ કરી હતી. તે કેસ ચાલી જતા અદાલતે આરોપી જીજ્ઞેશ હરીલાલ દસાડીયાને એક વર્ષની કેદ અને રૂ.૭૦ હજાર વળતર પેટે ચૂકવી આપવાનો હુકમ કર્યાે છે. ફરિયાદી તરફથી વકીલ મિતુલ હરવરા રોકાયા હતા.

જામનગરમાં ન્યુ સ્કવેર બિલ્ડીંગમાં ઓમ ટ્રેડીંગના નામથી પેઢી ચલાવતા હીરેન મહેન્દ્રભાઈ ધબા નામના આસામીએ શેરબજારમાં રોકાણ સામે તગડા વળતરની લાલચ આપતી જાહેરાત કર્યા પછી બાલાજી પાર્ક-૩માં રહેતા નિવૃત્ત આર્મીમેન રણવીરપ્રતાપસિંગ સુધાકરસિંગે રૂ.૩૩ લાખ રોક્યા હતા.

તે ઉપરાંત નિવૃત્ત આર્મીમેન હસમુખ પ્રભુભાઈએ રૂ.૧૦ લાખ ૫૦ હજારની રકમ રોકી હતી. આ આસામીઓને પરત ચુકવણી માટે હીરેન મહેન્દ્રભાઈએ ચેક આપ્યા હતા. તે તમામ પાંચ ચેક બેંકમાંથી પરત ફરતા રણવીરપ્રતાપસિંગ અને હસમુખભાઈએ અદાલતમાં જુદી જુદી પાંચ ફરિયાદ નોંધાવી હતી.

તે તમામ કેસ ચાલી જતા આરોપી પક્ષે બચાવ કર્યાે હતો તેની સામે ફરિયાદ પક્ષે દલીલ કરી હતી કે, ફરિયાદીઓની જુબાનીમાં કોઈ ભૂલ થઈ હોય તો તેનો લાભ આરોપીને મળી શકે નહી. અદાલતે ફરિયાદ પક્ષની દલીલો ગ્રાહ્ય રાખી આરોપી હીરેન મહેન્દ્રભાઈ ધબાને તમામ પાંચ કેસમાં તક્સીરવાન ઠરાવી દરેક કેસમાં બે-બે વર્ષની કેદ અને કુલ રૂ.૪૩ લાખ ૫૦ હજારનો દંડ ફટકાર્યાે છે. બંને ફરિયાદીઓ તરફથી વકીલ ઉદયસિંહ ચાવડા, બેનઝીર જુણેજા, કપિલ તીર્થાણી, વી.યુ. ચાવડા રોકાયા હતા.

જો આપને આ પોસ્ટ ગમી હોય તો શેર કરો...