કડિયાવાડમાં રહેણાંક મકાનમાંથી પકડાઈ ઈંગ્લીશ દારૂની ૩૯૮ બોટલઃ વાપીથી દારૂ આવ્યાની કબૂલાત

Author: નોબત સમાચાર

કડિયાવાડમાં રહેણાંક મકાનમાંથી પકડાઈ ઈંગ્લીશ દારૂની ૩૯૮ બોટલઃ વાપીથી દારૂ આવ્યાની કબૂલાત

પટેલ કોલોનીમાંથી બીયરના ૮૪ નંગ ઝબ્બેઃ અન્ય ત્રણ સ્થળેથી મળ્યો દારૃઃ

જામનગર તા. ૧૯: જામનગરના કડિયાવાડમાં આવેલા એક મકાનમાં એલસીબીએ પૂર્વ બાતમીના આધારે દરોડો પાડી ઈંગ્લીશ દારૂની નાની મોટી ૩૯૮ બોટલ પકડી પાડી છે. ઝડપાયેલા શખ્સે વાપીથી દારૂ આવ્યાની કબૂલાત કરી છે. જ્યારે પવનચક્કી પાસે મકાનમાંથી દસ ચપલા અને બે મોટી બોટલ સાથે એક પકડાયો છે. પટેલ કોલોની વિસ્તારમાંથી બે શખ્સ બીયરના ૮૪ નંગ સાથે મળી આવ્યા છે. સિક્કા તથા મોટી ખાવડી ગામમાંથી દારૂની કુલ છ બોટલ સાથે બે શખ્સની પોલીસે ધરપકડ કરી છે.

જામનગરના કડિયાવાડ વિસ્તારમાં એક મકાનમાં ઈંગ્લીશ દારૂનો જથ્થો પડ્યો હોવાની બાતમી એલસીબીના મયુદ્દીન, ઘનશ્યામ ડેરવાડીયા, ધર્મેન્દ્રસિંહને મળતા ગઈકાલે સાંજે પીઆઈ વી.એમ. લગારીયાની સૂચનાથી એલસીબી સ્ટાફે કડિયાવાડના વિશ્વકર્મા ચોક નજીક સાંઈ બાબાના મંદિર પાસેના રોહિત જયંતિભાઈ ચાવડા ઉર્ફે ગટુના મકાનમાં દરોડો પાડ્યો હતો.

આ મકાનની તલાશી લેવાતા ત્યાંથી ભારતીય બનાવટના અંગ્રેજી શરાબની જુદી જુદી બ્રાંડની અને નાની મોટી મળી કુલ ૩૯૮ બોટલ મળી આવી હતી. રૂ.૧,૩૮,૭૦૦ની કિંમતનો દારૂનો જથ્થો, એક મોબાઈલ મળી કુલ રૂ.૧,૪૩,૭૦૦નો મુદ્દામાલ કબજે કરાયો છે. આ શખ્સની પૂછપરછ કરાતા તેણે વલસાડ જિલ્લાના વાપીના સંદીપ નામના શખ્સ પાસેથી દારૂનો જથ્થો લીધો હોવાની કબૂલાત કરી છે. બંને સામે સિટી બી ડિવિઝન પોલીસ સ્ટેશનમાં ગુન્હો રજીસ્ટર કરાવાયો છે.

જામનગરના પવનચક્કી વિસ્તારમાં આવેલા હિંગળાજ ચોક સ્થિત ભાનુશાળી જ્ઞાતિની વાડી પાસે વસવાટ કરતા કેતન રાજેશભાઈ કનખરા ઉર્ફે ભીખાના મકાનમાં ગઈકાલે રાત્રે સિટી એ ડિવિઝનના સ્ટાફે પૂર્વ બાતમીના આધારે દરોડો પાડી તલાશી લેતા ત્યાંથી ઈંગ્લીશ દારૂની બે મોટી બોટલ અને દસ ચપલા મળી આવ્યા હતા. દારૂના જથ્થા સાથે કેતન કનખરાની ધરપકડ કરાઈ છે.

જામનગરના પટેલ કોલોની વિસ્તારની શેરી નં.૯માં ગઈરાત્રે સિટી બી ડિવિઝનના સર્વેલન્સ સ્ટાફ દ્વારા કરવામાં આવી રહેલા પેટ્રોલિંગમાં રાત્રે બે વાગ્યે ધરારનગર-રમાં રહેતો પૃથ્વીરાજસિંહ બળુભા જાડેજા તથા શાંતિનગરના છેવાડે રહેતો શિવરાજસિંહ અજીતસિંહ જાડેજા નામના શખ્સો પસાર થતા તેને રોકી લઈ પોલીસે તલાશી લેતા આ શખ્સો પાસેથી ૮૪ નંગ બીયર મળી આવ્યો હતો. પોલીસે બંનેની ધરપકડ કરી બીયરનો જથ્થો ઝબ્બે લીધો છે.

જામનગર તાલુકાના સિક્કા ગામની શ્રીજી સોસાયટીમાંથી ગઈકાલે રાત્રે સિક્કાની ભગવતી સોસાયટીમાં રહેતો જયદીપ ભરતભાઈ પુરવીયા નામનો શખ્સ ઈંગ્લીશ દારૂની બે બોટલ સાથે પકડાઈ ગયો છે.

જામનગર-ખંભાળિયા ધોરીમાર્ગ પર મોટી ખાવડી ગામમાં અમિત દીપકભાઈ દાણીધારીયા નામના શખ્સના મકાનમાંથી મેઘપર પોલીસે ઈંગ્લીશ દારૂની ચાર બોટલ કબજે કરી છે. અમિત દીપકભાઈની ધરપકડ કરાઈ છે.

જો આપને આ પોસ્ટ ગમી હોય તો શેર કરો...