જામખંભાળીયામાં સોનલબીજની ઉજવણીમાં બહોળી સંખ્યામાં ગઢવી-ચારણ સમાજના શ્રદ્ધાળુઓ ઉમટ્યા

Author: નોબત સમાચાર

જામખંભાળીયામાં સોનલબીજની ઉજવણીમાં બહોળી સંખ્યામાં ગઢવી-ચારણ સમાજના શ્રદ્ધાળુઓ ઉમટ્યા

ભવ્ય શોભાયાત્રામાં રાસની રમઝટ, સમૂહ પ્રસાદી, લોકડાયરો

ખંભાળીયા તા. ર૩: ખંભાળીયામાં ગઢવી-ચારણ સમાજ દ્વારા સોનલબીજની ભવ્ય ઉજવણીમાં હજારો શ્રદ્ધાળુઓ ઉમટ્યા હતાં.

દેવભૂમિ દ્વારકા જિલ્લાના ખંભાળીયામાં ગઢવી - ચારણ સમાજ દ્વારા ચારણ સમાજના ઈષ્ટદેવી તથા આઈ તત્ત્વની ચેતનારૂપ સોનબાઈ બીજની ગઈકાલે ભવ્ય ઉજવણી કરવામાં આવી હતી તથા સોનલ માઁ ના ૧૦ર મા જન્મદિનની ભવ્ય પ્રસંગે ઉજવણી કરવામાં આવી હતી. ગઈકાલે સવારે જોધપુર ગેઈટ પાસે આવેલા શ્રી મોમાઈ માતાજીના મંદિરેથી માતાજીની વિશાળ છબી સાથેની ભવ્ય શોભાયાત્રા શહેરમાં નીકળી હતી, જે જોધપુર ગેઈટ, નગર ગેઈટ, ચારરસ્તા થઈને જડેશ્વર પાસે સોનલ માતાજીના મંદિરે પહોંચી હતી. જ્યાં પૂર્ણાહુતિ થઈ હતી.

આ શોભાયાત્રામાં હજારો ચારણ ગઢવી સમાજના ભાઈઓ-બહેનોએ રાસની રમઝટ બોલાવતા તથા અબીલ-ગુલાલની છોળો ઉડાડતા ઢોલ-શરણાઈ સાથે ચારણી રમતો રમતા અઢારે વર્ણના લોકો જોડાયા હતાં તથા ગઢવી ચારણ સમાજના વિવિધ પૂજય માતાજીઓ રથમાં જોડાયા હતાં તથા ભાવિકોને આશીર્વાદ આપ્યા હતાં.

સોનલ માતાજીના મંદિરે આરતી દ્વારા શોભાયાત્રાનું સ્વાગત થયું હતું તથા આ વર્ષના પ્રસાદના દાતા શ્રી રામભાઈ રૂખડભાઈ મધુડાનું સમસ્ત ચારણ સમાજ દ્વારા ભવ્ય સન્માન કરાયું હતું તથા સંતો-માતાજીઓ દ્વારા આશીર્વાદ આપ્યા હતાં. બપોરે ભવ્ય પ્રસાદી તથા સાંજે ચારણી ગઢવી સમાજની પરંપરાગત રમતો અને સાંજે ચારણી સાંય આરતી તથા રાત્રે મેરામણ ગઢવી, આદિત્ય ગઢવી, વિજય ગઢવી, મહેશ ગઢવી સહિતના કલાકારોનો ભવ્ય લોકડાયરો યોજાયો હતો. જેમાં મોડી રાત્રિ સુધી ભાવિકો જોડાયા હતાં.

જો આપને આ પોસ્ટ ગમી હોય તો શેર કરો...