યુવતીને છરી બતાવી લૂંટી લેવાના કેસમાં એક આરોપીનો થયો છૂટકારો

Author: નોબત સમાચાર

યુવતીને છરી બતાવી લૂંટી લેવાના કેસમાં એક આરોપીનો થયો છૂટકારો

ગાંધીનગર રોડ પર થોડા વર્ષ પહેલાં બન્યો હતો બનાવઃ

જામનગર તા.૩ : જામનગરના ગાંધીનગર રોડ પર થોડા વર્ષ પહેલાં ગુરૂવારે રાત્રે મોપેડ પર જતી એક યુવતી તથા તેના માતા અને બહેનને પછાડી ત્રિપલ સવારીમાં આવેલા બાઈક પરના શખ્સોએ છરી બતાવી રોકડ, મોબાઈલ તથા પર્સની લૂંટ કર્યાની ફરિયાદ થઈ હતી. તે કેસ ચાલી જતાં એક આરોપીનો અદાલતે છૂટકારો કર્યાે છે.

જામનગરના પંચેશ્વર ટાવર વિસ્તારમાં રહેતા વિદ્યાર્થીની પોતાના માતા તથા નાની બહેન સાથે થોડા વર્ષ પહેલાં ગાંધીનગરમાં આવેલા મંદિરે રાત્રિના સમયે દર્શન કરવા જતા હતા ત્યારે ત્રણ સવારીમાં આવેલા એક બાઈકે ઠોકર મારતા આ વિદ્યાર્થીની પડી ગયા હતા. તે પછી બાઈક પર આવેલા શખ્સોએ છરી બતાવી પર્સ તથા ત્રણ મોબાઈલ અને રોકડની લૂંટ કર્યાની પોલીસમાં ફરિયાદ થઈ હતી.

આ ગુન્હાની તપાસમાં પોલીસે વિશાલ સુરેશભાઈ ગૌડ સહિતના ત્રણ આરોપીની ધરપકડ કરી હતી. તે કેસ ચાલવા પર આવતા આરોપી સામે આઈપીસી ૩૯૮નો ઉમેરો કરવાની અરજી કરાઈ હતી. તે અરજી અદાલતે નામંજૂર રાખી હતી. ઉપરોક્ત કેસ ચાલી જતા આ બનાવ રાત્રે બન્યો હોવાનું કહેવાય છે તેમ છતાં આરોપીઓની ઓળખ પરેડ કરાવાઈ નથી અને આરોપી પાસેથી છરી કબજે કરાઈ નથી તેવી દલીલ બચાવ પક્ષે કરતા અદાલતે આરોપી પૈકીના વિશાલ સુરેશભાઈ ગૌડનો છૂટકારો ફરમાવ્યો છે. આરોપી તરફથી વકીલ કિરણભાઈ બગડા, જયત ગણાત્રા તથા પાર્થ બગડા રોકાયા હતા.

જો આપને આ પોસ્ટ ગમી હોય તો શેર કરો...