મેદાનમાં મોટર રાખી અંગ્રેજી શરાબનું કટીંગ કરતા બે શખ્સ ઝડપાયા

Author: નોબત સમાચાર

મેદાનમાં મોટર રાખી અંગ્રેજી શરાબનું કટીંગ કરતા બે શખ્સ ઝડપાયા

જોડિયાના શિવનગર પાસેથી ઈંગ્લીશ સાથે પરપ્રાંતિય પકડાયોઃ કુલ ૧૪૦ બોટલ, ૧૩ ટીન કબજેઃ

જામનગર તા.૭ : જામનગરના સિક્કા ગામમાં આવેલી એક બંધ કોલેજના મેદાનમાં મોટર રાખી ઈંગ્લીશ દારૂની હેરાફેરી કરાતી હોવાની બાતમી મળતા ત્રાટકેલી પોલીસે મોટરમાં ઈંગ્લીશ દારૂની ૧૦૮ બોટલ કબજે કરી છે. બે આરોપી નાસી ગયા છે. જ્યારે જોડિયાના શિવનગર ગામના પાટીયા પાસે બાઈકમાં દારૂની ૩૨ બોટલ અને બીયરના ૧૩ ટીન લઈને જતો પરપ્રાંતીય શ્રમિક ઝડપાયો છે.

જામનગર તાલુકાના સિક્કા ગામના પંચવટી વિસ્તારમાં આવેલા એક મકાન નજીકની બંધ પડેલી કોલેજના ગ્રાઉન્ડમાં બે શખ્સ ઈંગ્લીશ દારૂની હેરાફેરી કરતા હોવાની બાતમી સિક્કા પોલીસ સ્ટેશનના જીતેન્દ્ર પરમાર, જયપાલ મેરને મળતા પીઆઈ વી.બી. ચૌધરી ને વાકેફ કરાયા પછી સ્ટાફ પંચવટી સોસાયટી પાસે આવેલા આરોગ્ય કેન્દ્ર નજીક લક્ષ્મણ નારણભાઈ સીંધવ ઉર્ફે લખા નામના શખ્સના મકાનની બાજુમાં જૂની કોલેજના મેદાનમાં દરોડો પાડ્યો હતો.

આ સ્થળે જીજે-૩૬-એજે ૩૭૯૭ નંબરની મોટર રાખી તેમાં ઈંગ્લીશ દારૂની હેરાફેરી કરતા લક્ષ્મણ ઉર્ફે લખો સીંધવ અને સુરેન્દ્રસિંહ ઉર્ફે ઈલુ ભીખુભા કંચવા નામના બે શખ્સ જોવા મળ્યા હતા. પોલીસને જોઈને આ બંને શખ્સ નાસી ગયા હતા.

પોલીસે મોટરની તલાશી લેતા તેમાંથી વ્હીસ્કીની જુદી જુદી બે બ્રાંડની ૧૦૮ બોટલ મળી આવી હતી. તે ઉપરાંત મોટરમાંથી એક આઈફોન અને સુરેન્દ્રસિંહના બેંક ખાતાની કોરી ચેકબુક મળી આવી હતી. પોલીસે રૂ.૩ લાખની મોટર, રૂ.૪૫ હજારનો મોબાઈલ તથા રૂ.૬૩,૪૬૮નો દારૂનો જથ્થો કબજે કરી બંને શખ્સની શોધ શરૂ કરી છે.

જોડિયા તાલુકાના શિવ નગર ગામના પાટીયા પાસે ગઈ કાલે સવારે દારૂની હેરફેર થતી હોવાની બાતમી મળતા જોડિયા પોલીસ સ્ટેશનનો સ્ટાફ વોચમાં હતો. તે દરમિયાન જોડિયા તાલુકાના જીરાગઢ ગામની સીમમાં પિન્ટુભાઈ રાઠોડ નામના ખેડૂતના ખેતરમાં મજૂરી કરતા મૂળ મધ્યપ્રદેશના અલીરાજપુર જિલ્લાના ચગદી ગામનો અનિલ ભૂરૂભાઈ પરૂડીયા નામનો શખ્સ મોટરસાયકલ પર નીકળ્યો હતો.

આ શખ્સને રોકાવી પોલીસે તેની તલાશી લેતા તેની પાસે રહેલા થેલામાંથી ભારતીય બનાવટના અંગ્રેજી શરાબની કાચ તથા પ્લાસ્ટિકની ૩૨ બોટલ તથા બીયરના ૧૩ ટીન મળી આવ્યા હતા. પોલીસે દારૂનો જથ્થો, રૂ.રપ હજારનું બાઈક, રૂ.૧૦ હજારનો ફોન મળી કુલ રૂ.૫૪,૫૫૦નો મુદ્દામાલ કબજે કરી અનિલ પરૂડીયાની ધરપકડ કરી છે.

જામનગરના રણજીત સાગર રોડ પર મારૂ કંસારા હોલ પાછળ આવેલા રાજમલ રાણસુર વિજાણી નામના શખ્સના ઝૂંપડામાં પોલીસે દરોડો પાડી તલાશી લેતા ત્યાંથી દેશી દારૂની ભઠ્ઠી મળી આવી હતી. સ્થળ પરથી આથો તથા દારૂ અને ભઠ્ઠીના સાધનો મળી આવ્યા હતા. દરોડા પહેલાં રાજમલ વિજાણી નાસી ગયો હતો.

કાલાવડ તાલુકાના પીઠડીયા-૩ ગામની સીમમાં પ્રકાશ વજુભાઈ પરમાર નામના દેવીપૂજક શખ્સની દેશી દારૂની ભઠ્ઠી પર ગઈકાલે એલસીબી સ્ટાફે દરોડો પાડ્યો હતો. ત્યાંથી ૧૪૦૦ લીટર આથો, ૬૦ લીટર તૈયાર દારૂ, ગેસનો ચુલો, બાટલો, ભઠ્ઠીના સાધનો મળી આવ્યા હતા. આરોપી પ્રકાશ દરોડા પહેલાં નાસી ગયો હતો. એલસીબીએ તેની સામે કાલાવડ ગ્રામ્ય પોલીસ મથકમાં ગુન્હો રજીસ્ટર કરાવ્યો છે.

જો આપને આ પોસ્ટ ગમી હોય તો શેર કરો...