કામદાર કોલોનીમાં મકાનમાંથી દારૂની નાની મોટી ૪૭ બોટલ સાથે એક પકડાયો

Author: નોબત સમાચાર

કામદાર કોલોનીમાં મકાનમાંથી દારૂની નાની મોટી ૪૭ બોટલ સાથે એક પકડાયો

મુંબઈથી આવેલી દારૂની ૫૪ બોટલ પકડતી એલસીબીઃ

જામનગર તા.૭ : જામનગરની કામદાર કોલોનીમાં એક મકાનમાંથી પોલીસે ઈંગ્લીશ દારૂની બે મોટી બોટલ અને ૪૫ ચપલા કબજે કર્યા છે. આ જથ્થા સાથે ઝડપાયેલા શખ્સે સપ્લાયરનું નામ આપ્યું છે. જ્યારે દરેડ પાસે સીએનજી પંપ નજીક દારૂની ૫૪ બોટલ એલસીબીએ કબજે કરી છે. મુંબઈથી આ જથ્થો આવ્યો હતો અને તેની ડિલિવરી પહેલા પકડી લેવાયો હતો. બે સીમધારક સામે ગુન્હો નોંધાયો છે.

જામનગરના કામદાર કોલોની વિસ્તારમાં આવેલા એક મકાનમાં ઈંગ્લીશ દારૂનો જથ્થો પડ્યો હોવાની બાતમી પરથી ગઈકાલે રાત્રે સિટી સી ડિવિઝનના સ્ટાફે શેરી નં.૮માં હરીઓમ ટાવર પાસે રહેતા દિગ્વિજયસિંહ હસમુખસિંહ જાડેજા ઉર્ફે ચંદ્રસિંહ ઉર્ફે દિગુ નામના શખ્સના મકાનમાં દરોડો પાડી તલાશી લીધી હતી.

આ મકાનમાંથી વોડકા તથા વ્હીસ્કીના અલગ અલગ ૪૫ ચપટા તેમજ દારૂની કાચની બે મોટી બોટલ મળી આવી હતી. આ જથ્થા સાથે દિગ્વીજયસિંહની ધરપકડ કરાઈ છે. તેણે આ જથ્થો રવિ ઓધવજીભાઈ કગથરા ઉર્ફે રવિ પટેલ પાસેથી લીધો હોવાની કબૂલાત કરી છે.

જામનગર નજીકના દરેડ ગામ પાસે આવેલા સીએનજી પંપ નજીક કુરિયર કંપનીનો એક માણસ ઈંગ્લીશ દારૂની ડિલિવરી દેવા આવી રહ્યો હોવાની બાતમી એલસીબીના કિશોર પરમાર, અરજણભાઈ, ધર્મેન્દ્રસિંહને મળતા પીઆઈ વી.એમ. લગારીયાની સૂચનાથી એલસીબી ટીમ દોડી ગઈ હતી.

ત્યાંથી ભારતીય બનાવટના અંગ્રેજી શરાબની ૫૪ બોટલ મળી આવી હતી. આ જથ્થો મુંબઈથી મોકલાયો હોવાનું ખૂલ્યું છે. એલસીબીએ બે મોબાઈલ નંબર મેળવ્યા છે અને તેના ધારકો સામે ગુન્હો નોંધી તપાસ આદરી છે.

જો આપને આ પોસ્ટ ગમી હોય તો શેર કરો...