સૌરાષ્ટ્રના સૌથી મોટા ફ્લાય ઓવરની આસપાસ જ ઝુંપડપટ્ટી-ગંદકીના દબાણો

Author: નોબત સમાચાર

સૌરાષ્ટ્રના સૌથી મોટા ફ્લાય ઓવરની આસપાસ જ ઝુંપડપટ્ટી-ગંદકીના દબાણો

'સોનાની થાળીમાં લોઢાની મેખ'

જામનગર શહેરની મધ્યમાં ઈન્દિરા માર્ગ તથા તેને સંલગ્ન શહેરના અતિ વ્યસ્ત આંતરિક મુખ્ય માર્ગો પરના ટ્રાફિક ભારણને ઘટાડવા રૂ. રર૯ કરોડના ખર્ચે સૌરાષ્ટ્રના સૌથી મોટા ફ્લાય ઓવરનું નિર્માણ કાર્ય પૂર્ણ થયું છે અને હવે, તેનું ઉદ્ઘાટન/લોકાર્પણ આગામી તા. ર૪-૧૧-ર૦રપ ના સોમવારે રાજ્યના મુખ્યમંત્રીના હસ્તે થવા જઈ રહ્યું છે.

રાજ્યના સીએમ આવતા હોય સ્થાનિક તંત્રના ઉચ્ચ અધિકારીઓના કાફલાએ ફ્લાય ઓવર, સર્વિસ રોડ, ધન્વન્તરિ મંદિર વિગેરે સ્થળોની મુલાકાત લઈ જાત નિરીક્ષણ કર્યું હતું, અને જોયું કે બધું બરાબર છે ને! પણ અગાઉ અખબારોમાં જેનો અનેક વખત ટીકા સાથે ઉલ્લેખ થયો છે તેવા અંબર ચોકડી પાસેની રેલવેની જમીન પરના અતિ ગંદા ઝુંપડપટ્ટીના દબાણો, અસામાજિક પ્રવૃત્તિઓના અડ્ડા સમાન દબાણો આ ઉચ્ચ અધિકારીઓને દેખાયા જ નહીં! થોભો... ફ્લાય ઓવરના ગાળાઓમાં અંબર ચોકડી પાસેથી દબાણો દૂર કરવાનું 'નાટક' થોડા દિવસ પહેલા થયું હતું, પણ આ દબાણો યથાવત્ રીતે ગોઠવાઈ ગયા છે. અંબર ચોકડી પાસેની રેલવેની જમીનમાં તો 'બાપુજીની મિલકત' હોય તેમ દબાણકર્તાઓ હટવાનું નામ જ લેતા નથી, અને તંત્ર હટાવી શકતું નથી!

અતિ આકર્ષક, અતિ ઉપયોગી એવા ફ્લાય ઓવરની સુંદરતાને આવા દબાણો 'સોનાની થાળીમાં લોઢાની મેખ' જેવા પૂરવાર થઈ રહ્યા છે. તંત્ર શા માટે કડકમાં કડક કામગીરી કરીને કાયમ માટે શહેરની મધ્યમાં શહેરીજનોને ત્રાસરૂપ ન્યુસન્સ દૂર કરતું નથી!

જો આપને આ પોસ્ટ ગમી હોય તો શેર કરો...