કલ્યાણપુરના મણિપર હાબરડીમાં ૪૦ વર્ષના યુવકની ગળુ દબાવીને હત્યા

Author: નોબત સમાચાર

કલ્યાણપુરના મણિપર હાબરડીમાં ૪૦ વર્ષના યુવકની ગળુ દબાવીને હત્યા

હત્યાનો ભેદ ઉકેલતી એલ.સી.બી. : સગા ભાઈ-ભાભીની ધરપકડઃ

જામનગર તા. ૧૦: દેવભૂમિ દ્વારકા જિલ્લાના કલ્યાણપુર તાલુકાના મણિપુર હાબરડી ગામમાં ૪૦ વર્ષના યુવકની ગળુ દબાવી નિદ્રાધિન અવસ્થામાં જ હત્યા નિપજાવાઈ હતી.

આ બનાવ અંગે એલ.સી.બી. પોલીસે તપાસ હાથ ધરી હતી અને ગુન્હાનો ભેદ ઉકેલી નાંખ્યો છે. મૃતકના સગાભાઈ-ભાભીએ જ આ હત્યા નિપજાવી હોવાનું ખૂલવા પામતા પોલીસે આરોપીઓની ધરપકડ કરી છે.

કલ્યાણપુર તાલુકાના હાબરડી ગામના વિરાભાઈ દેવસીભાઈ કરમુર (ઉ.વ. ૪૦) તા. ૭-૩-ર૦ર૪ ના રાત્રે વાડીએ સુવા માટે ગયા હતાં. રાત્રે એક વાગ્યે વિરાભાઈના મોબાઈલ ફોનમાં લાઈટ ચાલુ હોવાથી તેનો ફોન બંધ કરવા જણાવી તેમના માતા સુવા માટે ચાલ્યા ગયા હતાં.

આ સમયે વિરાભાઈ બીડી પીધા પછી સુઈ ગયા હતાં, અને બીજા દિવસે સવારે તેઓ ખાટલામાં નિદ્રાધિન અવસ્થામાં જ જોવા મળ્યા હતાં. આથી માતાએ તેઓને મૃત્યુ પામેલ જોવા મળતા તેમણે પોલીસને જાણ કરી હતી. આથી પોલીસ કાફલો દોડી આવ્યો હતો અને જેમાં ગળુ દબાવી હત્યા નિપજાવાઈ હોવાનું જણાતા અજાણ્યા શખ્સો સામે હત્યાનો ગુન્હો નોંધી તેની તપાસ શરૂ કરી હતી.

આ બનાવમાં જિલ્લા પોલીસ વડાની સૂચનાથી એલ.સી.બી.ના પો.ઈ. કે.કે. ગોહિલ, અને એ.એલ. બારસિયા તથા પો.સ.ઈ. બી.એમ. દેવમુરારીએ તપાસનો ધમધમાટ શરૂ કર્યો હતો.

બીજી તરફ મૃતકના સગાભાઈ અરજણભાઈ દેવસીભાઈ કરમુર અને ભાભી જસીબેન અરજણભાઈ કરમુર બેસણામાં પણ આવ્યા ન હતાં અને ખંભાળિયા તરફ ચાલ્યા જતા પોલીસને શંકા જાગી હતી. આમ પોલીસે આ દંપતીને ખંભાળિયાથી પકડી પાડી એલ.સી.બી. પોલીસ ઓફિસમાં લાવી આગવી ઢબે પૂછપરછ કરતા સમગ્ર પ્રકરણ ઉપરથી પડદો ઊંચકાયો હતો અને મૃતક ભાઈ અવારનવાર ગાળો કાઢતો હોય અને મારી નાખવાની ધમકી આપતો હોવાથી ભાઈ-ભાભીએ વિરાભાઈની હત્યાનો કારસો રચ્યો હતો.

આથી આ દંપતી પોતાના ઘર પાછળ જ આવેલ વાડીએ પહોંચ્યા હતાં જ્યાં ખાટલામાં ઊંધી રહેલા વિરાભાઈને ગળાટુંપો આપી હત્યા નિપજાવી હોવાની આરોપી એવા મોટાભાઈ વરણાભાઈએ કબુલાત આપી હતી. આથી પોલીસે નાનાભાઈની હત્યા નિપજાવવાના કેસમાં સગા મોટાભાઈ-ભાભીની ધરપકડ કરી છે.

જો આપને આ પોસ્ટ ગમી હોય તો શેર કરો...