વીજચોરીના કેસમાં ઓઈલ મીલના માલિકને હાઈકોર્ટમાંથી મળ્યા જામીન

Author: નોબત સમાચાર

વીજચોરીના કેસમાં ઓઈલ મીલના માલિકને હાઈકોર્ટમાંથી મળ્યા જામીન

અદાલતે ફટકાર્યાે છે એક કરોડ એકોત્તેર લાખનો દંડઃ

જામનગર તા.ર૮ : જામજોધપુર તાલુકાના રબારીકા ગામમાં એક ઓઈલ મીલમાં વીજ કંપનીએ હાથ ધરેલી ચકાસણીના અંતે વીજ ચોરીનો આક્ષેપ મૂકી રૂ.પ૭ લાખ ઉપરાંતનું પુરવણી બીલ આપવામાં આવ્યું હતું. તે કેસમાં અદાલતે ત્રણ વર્ષની સજા અને રૂ.૧ કરોડ ૭૧ લાખનો દંડ ફટકાર્યાે હતો. તેની હાઈકોર્ટમાં અપીલ કરાતા અદાલતે આરોપીને જામીન પર મુકત કરવાનો હુકમ કર્યાે છે. જામજોધ૫ુર તાલુકાના રબારીકા ગામમાં આવેલી એક ઓઈલ મીલમાં રાજકોટ ગ્રામ્ય ડિવિઝનની પીજીવીસીએલની ટૂકડીએ ચકાસણી હાથ ધરતા ત્યાં વીજચોરી થતી હોવાનું જણાઈ આવતા મીલ માલિક રાકેશ માલદેભાઈ કરમુર સામે વીજચોરીનો આક્ષેપ મૂકી ઈલેકટ્રીક સિટી એક્ટની કલમ ૧૩૫ હેઠળ રૂ.૫૭,૩૨, ૦૪૭ની રકમની વીજચોરી અંગે ગુન્હો નોંધાવાયો હતો.

ઉપરોક્ત કેસ ચાલી જતાં જામનગરની ખાસ અદાલતે આરોપી રાકેશ કરમુરને તક્સીરવાન ઠરાવી ત્રણ વર્ષની કેદની સજા અને રૂ.૧,૭૧, ૯૬,૧૪૫નો દંડ ફટકાર્યાે હતો. દંડ ભરવામાં ન આવે તો વધુ છ મહિનાની સજાનો આદેશ કરાયો હતો.

ત્યારપછી આરોપીએ હાઈકોર્ટમાં અપીલ કરી હતી અને દલીલ કરી હતી કે, ઓઈલ મીલ હજુ શરૂ કરવામાં આવી ન હતી તેની લોનની પ્રોસેસ પૂર્ણ થઈ ન હતી પરંતુ હરિફ જૂથે ખોટી રીતે તેઓને ફસાવી દીધા છે અને રેઈડ કરનાર એજન્સીએ કાયદા મુજબ કાર્યવાહી કરી નથી. અદાલતે આરોપી રાકેશ કરમુરને જામીન પર મુક્ત કરવાનો હુકમ કર્યાે છે. આરોપી તરફથી વકીલ વી.એચ. કનારા, નિશીત આચાર્ય રોકાયા છે.

જો આપને આ પોસ્ટ ગમી હોય તો શેર કરો...