રાક્ષસી વ્યાજ ચૂકવ્યા પછી પણ પાંચ વ્યાજખોરે ચેક પરતની આપી ધમકી

Author: નોબત સમાચાર

રાક્ષસી વ્યાજ ચૂકવ્યા પછી પણ પાંચ વ્યાજખોરે ચેક પરતની આપી ધમકી

મિત્રમાં જામીન તરીકે રહી તેનું પણ ચૂકવ્યું વ્યાજઃ

જામનગર તા.૧૮ : જામનગરમાં વસવાટ કરતા એક આસામીએ પાંચ શખ્સ પાસેથી ઉંચા વ્યાજે રકમ લીધા પછી તેનું વ્યાજ ચૂકવ્યું હતું અને મિત્રતામાં જામીન પડ્યા પછી મિત્રનું વ્યાજ પણ આપ્યું હતું. આમ છતાં આ શખ્સો ચેક પરતની ફરિયાદની ધમકી આપતા હોય અને બે શખ્સે ગાળો ભાંડતા ફરિયાદ કરી છે.

જામનગરના રણજીત સાગર રોડ પર આવેલા જડેશ્વર પાર્કમાં વસવાટ કરતા વિક્કી ગોપાલભાઈ નાડાર નામના પરપ્રાંતીય યુવાને નંદનવન સોસાયટીમાં સિદ્ધનાથ એન્ટરપ્રાઈઝ નામની ફાયનાન્સની ઓફિસ ધરાવતા સુનિલ નંદા પાસેથી અગાઉ બે કટકે રૂ. ૪ લાખ રોજના રૂ. ર હજાર વ્યાજ લેખે લીધા હતા.

તે ઉપરાંત ધર્મેશ નંદા પાસેથી રૂ. ૮૦ હજાર રોજના રૂ. ૮૦૦ વ્યાજ લેખે અને હર્ષ અસ્વાર નામના લોહાણા મહાજન વાડીમાં નોકરી કરતા શખ્સ પાસેથી રૂ. ૧ લાખ ૩૦ હજાર ૧૦ ટકાના વ્યાજે, રામેશ્વરનગરવાળા કરણસિંહ જાડેજા પાસેથી રૂ. ૩૦ હજાર ૧૦ ટકાના વ્યાજે, અજય સિંહ જાડેજા પાસેથી રૂ. ૪૦ હજાર ૧૦ ટકાના વ્યાજે લઈ તેનું વ્યાજ વિક્કી ભરતો હતો.

તે ઉપરાંત વિક્કીના મિત્ર શિવમગર ખીમગર ગોસાઈએ સુનિલ નંદા પાસેથી રૂ. ૬૦ હજાર વ્યાજે લીધા હતા. જેમાં વિક્કી જામીન પડ્યો હોય તેનું વ્યાજ પણ વિક્કી ભરપાઈ કરતો હતો. ઉપરોક્ત શખ્સોને વ્યાજ ચૂકવાતું હોવા છતાં ઉઘરાણી કરી પાંચેય શખ્સ સિક્યુરિટીમાં આપેલા વિક્કી તથા તેના ભાઈના ચેક પરત કરાવવાની ધમકી આપતા હતા અને સુનિલ તથા ધર્મેશ નંદાએ ગાળો ભાંડી વ્યાજની ઉઘરાણી કરી જાનથી મારી નાખવાની ધમકી આપતા સિટી એ ડિવિઝન પોલીસ સ્ટેશનમાં વિક્કીએ ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...