કલ્યાણપુરના ભોગાત પાસે મોટરે ગાયને હડફેટે લીધીઃ ઘવાયેલી ગાય મોતને શરણ

Author: નોબત સમાચાર

કલ્યાણપુરના ભોગાત પાસે મોટરે ગાયને હડફેટે લીધીઃ ઘવાયેલી ગાય મોતને શરણ

રોડ ક્રોસ કરતા વૃદ્ધને મોટરની ઠોકરઃ

જામનગર તા. ૨૯: દ્વારકા-પોરબંદર ધોરીમાર્ગ પર ભોગાત ગામના ત્રણ રસ્તા પાસે ગયા બુધવારે રાત્રે એક ગાયને મોટરે ટક્કર મારી દેતા રૂ।.રપ હજારની ગાય મોતને શરણ થઈ છે. તેના માલિકે પોલીસમાં ફરિયાદ નોંધાવી છે. વરવાળા પાસે રોડ ક્રોસ કરતા વૃદ્ધને અજાણી મોટર ઠોકર મારીને નાસી ગઈ છે.

દ્વારકાથી પોરબંદર વચ્ચેના ધોરીમાર્ગ પર આવેલા કલ્યાણપુર તાલુકાના ભોગાત ગામના ત્રણ રસ્તા પાસેથી ગયા બુધવારે રાત્રે સાડા દસેક વાગ્યે ભરતભાઈ લાખાભાઈ બાબરીયા નામના આસામીની ગાય રોડ પર ચાલી જતી હતી ત્યારે જીજે-પ-આરએ ૯૮૪૨ નંબરની મોટરના ચાલકે તેને હડફેટે લીધી હતી.

મોટરની ટક્કર વાગતા ગાયને ગંભીર ઈજા થયા પછી મોતને શરણ થઈ છે. ગાયની અંતિમવિધિ કર્યા પછી ભરતભાઈએ ગઈકાલે કલ્યાણપુર પોલીસ મથકમાં મોટરના ચાલક સામે ફરિયાદ નોંધાવી છે.

દ્વારકા તાલુકાના વરવાળા ગામની સીમમાં રહેતા નાનજીભાઈ નાથાભાઈ ઓડીચ નામના એકસઠ વર્ષના વૃદ્ધ શુક્રવારે સાંજે દ્વારકા-ઓખા ધોરીમાર્ગ પર રેલવે ફાટક પાસેથી રોડ ક્રોસ કરતા હતા ત્યારે એક અજાણી મોટર તેઓને ટક્કર મારીને નાસી ગઈ હતી. પગ તથા પાંસળીમાં ફ્રેક્ચર સહિતની ઈજા પામેલા નાનજીભાઈને હોસ્પિટલ ખસેડાયા છે. પોલીસે નાનજીભાઈની ફરિયાદ પરથી મોટરચાલક સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...