વડોદરાની ત્રણ શાળાને બોમ્બથી ફૂંકી મારવાની ધમકીથી મચ્યો ખળભળાટઃ બોમ્બ સ્ક્વોર્ડ દોડ્યુ

Author: નોબત સમાચાર

વડોદરાની ત્રણ શાળાને બોમ્બથી ફૂંકી મારવાની ધમકીથી મચ્યો ખળભળાટઃ બોમ્બ સ્ક્વોર્ડ દોડ્યુ

ઈ-મેઈલથી ધમકી મળ્યા પછી શાળામાં રજા અપાઈઃ તપાસ ચાલુ

વડોદરા તા. ર૪ઃ વડોદરાની ૩ શાળાને બોમ્બથી ફૂંકી મારવાની ધમકીથી ખળભળાટ મચી ગયો છે. વિદ્યાર્થીઓને રજા અપાઈ છે. પોલીસ-બોમ્બ સ્ક્વોડની સઘન તપાસ શરૃ થઈ ગઈ છે.

વડોદરાના ભાયલી વિસ્તારમાં આવેલી નવરચના યુનિવર્સિટી અને તેની હેઠળ આવતી શાળાઓને બોમ્બથી ઊડાવી દેવાની ધમકીનો ઈ-મેઈલ મોકલવામાં આવ્યો હતો. જેની જાણકારી પોલીસને કરાતા બીડીએસની ટીમની સ્કૂલ, યુનિવર્સિટીમાં સઘન તપાસ ચાલી રહી છે.

વડોદરા શહેરમાં નવરચનાની ત્રણ સ્કૂલ આવેલ છે. ભાયલી વિસ્તારની સ્કૂલના પ્રિન્સિપાલને ધમકીભર્યો મેલ મળતા સ્કૂલમાં લોકોમાં ભયનો માહોલ છવાઈ જવા પામ્યો હતો. સ્કૂલ, યુનિવર્સિટીમાં બોમ્બ સ્ક્વોડે ચેકીંગ હાથ ધર્યું છે.

નોંધનીય છે કે જે સ્કૂલોને બોમ્બથી ઊડાવી દેવાની ધમકી આપવામાં આવી છે તેમાં નવરચના યુનિવર્સિટી, સમા ઈન્ટરનેશનલ સ્કૂલ અને નવરચના વિદ્યાની વિદ્યાલયનો સમાવેશ થાય છે. ધમકીભર્યો ઈમેલ મળતા બાળકોને શાળામાંથી રજા આપી દેવામાં આવી હતી.

જો કે, આ અંગેની પોલીસને જાણ કરાતા તરત જ કાર્યવાહી કરવામાં આવી હતી. ધમકીને પગલે બીડીએસની ટીમ સ્કૂલ, યુનિવર્સિટીમાં તપાસ કરવા પહોંચી છે. યુનિવર્સિટી અને શાળાઓમાં બોમ્બ સ્ક્વોર્ડ દ્વારા ચેકીંગ હાથ ધરવામાં આવ્યું છે. ક્રાઈમ બ્રાન્ચ, પીસીબી પોલીસની ટીમ પણ સ્કૂલ અને યુનિવર્સિટી પર દોડી આવી હતી.

જો આપને આ પોસ્ટ ગમી હોય તો શેર કરો...