પાણીની મોટર ચાલુ કરવાના પ્રશ્ને પિતા પુત્ર પર હુમલોઃ દુકાનદારને બે શખ્સે માર્યા

Author: નોબત સમાચાર

પાણીની મોટર ચાલુ કરવાના પ્રશ્ને પિતા પુત્ર પર હુમલોઃ દુકાનદારને બે શખ્સે માર્યા

ખેતરમાંથી ગાયો કાઢવાનું કહેતા ત્રણ શખ્સ તૂટી પડ્યાઃ

જામનગર તા.૨૨ : લાલપુરના રાસંગપરના પિતા-પુત્ર પર ત્રણ પુત્ર-પિતાએ વાવની મોટર ચાલુ કરવાના મામલે હુમલો કરી માર માર્યાે હતો. જ્યારે ધ્રોલના ખેંગારકામાં એક ખેડૂતે ઘૂસી ગયેલી ગાયોને બહાર કાઢવાનું કહેતા ડાંગરા ગામના ત્રણ શખ્સે તેઓને લમધાર્યા હતા. કાલાવડમાં દુકાન પાસેથી લોખંડના સળીયા હટાવવાનું કહેવા ગયેલા વેપારીને બે શખ્સે માર મારી ફ્રેક્ચર કર્યું હતું.

લાલ૫ુર તાલુકાના રાસંગ પર ગામની સીમમાં વસવાટ કરતા હમીરભાઈ ખીમાભાઈ મોઢવાડીયા નામના આસામીની પાણીની વાવ દિનેશ હમીરભાઈ ઓડેદરાના રહેણાંકની પાછળ આવેલી છે. ત્યાં ગઈકાલે સવારે હમીરભાઈ તથા તેમનો પુત્ર રાજુ મોટર ચાલુ કરવા જતાં હતા ત્યારે દિનેશ તથા રામભાઈ ઓડેદરાએ પોતાની બોલેરો વચ્ચે રાખી દઈ ગાળો ભાંડી હતી અને મોટરમાંથી ધોકો કાઢી દિનેશ, રામભાઈ અને તે બંનેના પિતા હમીર અરશીભાઈ ઓડેદરાએ હુમલો કર્યાે હતો. વચ્ચે પડનાર હમીર ભાઈના પત્ની આવી જતાં ત્રણેય વ્યક્તિ નાસવા માંડવા હતા ત્યારે હમીર, દિનેશ તથા રામભાઈએ મોટર ચાલુ કરવા આવશો તો પતાવી દઈશું તેવી ધમકી આપી હતી. મેઘપર પોલીસ સ્ટેશનમાં હમીરભાઈ ખીમાભાઈએ ફરિયાદ કરી છે.

ધ્રોલ તાલુકાના ખેંગારકા ગામના અલીભાઈ આમદભાઈ સમા નામના ખેડૂત ગઈકાલે સાંજે પોતાના ખેતરે પાણી વાળતા હતા ત્યારે મોમભાઈ મેઘાભાઈની ગાયો ખેતરમાં ઘૂસી જતાં તેને બહાર કાઢવાનું કહેવાતા ઉશ્કેરાયેલા મોમભાઈ તેમજ ભુરા પુના, નાથા પુના નામના ડાંગરા ગામના ત્રણ શખ્સે ઢીકાપાટુથી માર મારી ગાળો ભાંડી હતી.

કાલાવડ શહેરના ગોવિંદ પરામાં રહેતા અને ભગવતીપરા પુલ પાસે શો-રૂમ ધરાવતા મેહુલ મનસુખભાઈ સાવલીયા નામના આસામીએ પોતાના શો રૂમ પાસે ફેબ્રીકેશન કામ કરતા અજય મકવાણાને રસ્તામાં રાખેલા સળીયા હટાવી લેવા માટે કહેતા સળીયા નહીં હટે તેમ કહી અજય અને સમીર મકવાણાએ માર મારી પગની ઘુંટી ભાંગી નાખી હતી. કાલાવડ શહેર પોલીસ સ્ટેશનમાં ફરિયાદ કરાઈ છે.

જો આપને આ પોસ્ટ ગમી હોય તો શેર કરો...