જામનગરમાં ગેરકાયદે ઘાસચારો પહોંચાડનાર વાહનચાલકો સામે કાર્યવાહી

Author: નોબત સમાચાર

જામનગરમાં ગેરકાયદે ઘાસચારો પહોંચાડનાર વાહનચાલકો સામે કાર્યવાહી

એસ્ટેટ શાખાની ત્રણ ટૂકડીઓ દ્વારા દસ વાહનોમાંથી દસ ટન ઘાસ જપ્તઃ

જામનગર તા. રરઃ જામનગર શહેરમાં ગેરકાયદે રીતે ઘાસચારાનું વેંચાણ કરવામાં આવે છે, અને વહેલી સવારે શહેરના કેટલાક વિસ્તારોને જાહેરમાં ઢોરવાડો બનાવી દેવામાં આવે છે. તેમાંથી નગરજનોને મુક્તિ મળે તે માટેની જામનગર મહાનગરપાલિકાના કમિશનર દ્વારા છેલ્લા એકાદ સપ્તાહથી કવાયત કરવામાં આવી છે.

ઉપરાંત અદાલતના હુકમનું પાલન કરવા માટે શહેરને રસ્તે રઝળતા ઢોરથી મુક્ત કરવા માટેની વિશેષ ઝુંબેશ ચલાવાઈ રહી છે. ત્યારે શહેરમાં ઘાસનો જથ્થો ઘૂસાડનારાઓ ઉપર આજે તવાઈ બોલાવવામાં આવી હતી.

જામનગર મહાનગરપાલિકાના એસ્ટેટ અધિકારી નીતિન દીક્ષિતની રાહબરી હેઠળ દબાણ હટાવ અધિકારી અનવર ગજ્જણ તેમજ ધર્મેન્દ્રસિંહ જાડેજા અને તેઓની અલગ અલગ ત્રણ ટીમ દ્વારા શહેરના કાલાવડ નાકા બહાર, મયુરનગર, ગુલાબનગર વગેરે અલગ અલગ વિસ્તારમાં ત્રણ ટૂકડીને વહેલી સવારે ૬ વાગ્યામાં જ દોડતી કરાવી દેવામાં આવી હતી, અને ઘાસનો જથ્થો લઈને ઘૂસનારા વાહનચાલકો સામે કડક પગલાં લેવામાં આવ્યા હતાં.

રિક્ષાછકડા, ટ્રેક્ટર, બોલેરો પીકઅપ વેન સહિત અલગ અલગ ૧૦ વાહનોમાં અંદાજે ૧૦ ટન જેટલો ઘાસનો જથ્થો જામનગર શહેરમાં ઘૂસાડવામાં આવી રહ્યો હતો. તે તમામ વાહનોને અટકાવીને ૧૦ ટન જેટલો ઘાસનો જથ્થો જપ્ત કરી લેવામાં આવ્યો છે અને મહાનગરપાલિકા સંચાલિત ઢોરવાડામાં પશુઓના ખોરાક માટે મોકલી દેવામાં આવ્યો છે.

ઉપરોક્ત તમામ વાહનચાલકોને અંતિમ ચેતવણી આપી દેવામાં આવી છે, અને ફરીથી શહેરની અંદર ઘાસચારાનો જથ્થો લઈ આવશે, તો તેઓના વાહન જપ્ત કરી લેવામાં આવશે. વહેલી સવારમાં જ મહાનગરપાલિકાના તંત્રની આ કાર્યવાહીને લઈને શહેરી વિસ્તારમાં ઘાસચારાનું વેંચાણ કરતા તત્ત્વોમાં ફફડાટ મચી ગયો છે.

જો આપને આ પોસ્ટ ગમી હોય તો શેર કરો...