અન્ય વ્યક્તિ સાથે ફોન પર વાત કરવાની પતિએ ના પાડતા પત્નીએ ખાઈ લીધો ગળાફાંસો

Author: નોબત સમાચાર

અન્ય વ્યક્તિ સાથે ફોન પર વાત કરવાની પતિએ ના પાડતા પત્નીએ ખાઈ લીધો ગળાફાંસો

જમીને બહાર જવાની ના પડાતા શ્રમિકે ઝેર પીધુઃ મૃત્યુ

જામનગર તા.૨૨ : જામનગરના સાંઢીયા પુલ પાસે રહેતા એક પરિણીતાને પતિએ અન્ય વ્યક્તિ સાથે ફોનમાં વાત કરવાની ના પાડતા આ પરિણીતાએ ગળા ફાંસો ખાઈ જીવતર ટૂંકાવી લીધુ છે. જ્યારે પત્નીએ જમ્યા પછી ગામમાં જવાની પતિ ને ના પાડતા પતિએ ઝેરી દવા પી જિંદગીનો અંત આણ્યો છે.

જામનગરના ગોકુલનગર આગળ આવેલા સાંઢીયા પુલ નજીક કોપર સિટી એપાર્ટમેન્ટ ની ડી વીંગમાં રહેતા કિંજલબેન અશોકભાઈ દેથરીયા (ઉ.૩૦) નામના પરિણીતાને પતિ અશોકભાઈએ વિજય વાળા નામના શખ્સ સાથે ફોન પર વાત કરવાની ના પાડી હતી આ બાબતનું માઠું લાગી આવતા કિંજલબેને ગઈકાલે બપોરે પોતાના ઘરમાં પંખામાં દોરી બાંધી ગળાટૂંપો ખાઈ લીધો હતો. પતિ અશોક પ્રાગજીભાઈ દેથરીયાએ પોલીસને જાણ કરી છે.

કાલાવડ તાલુકાના રણુજા ગામમાં જેરામ ગોવિંદભાઈ નામના ખેડૂતના ખેતરમાં મજૂરી કામ માટે આવીને રહેતા મૂળ મધ્યપ્રદેશના અલીરાજપુર જિલ્લાના ભાભરા તાલુકાના વતની રાજુભાઈ નંદનસિંગ ભડીયા (ઉ.વ.૪૫) નામના શ્રમિકને રોજ રાત્રે જમ્યા પછી બાઈક પર ગામમાં આંંટો મારવા જવાની આદત હતી. તેઓને પત્નીએ આંટો મારવા જવાની ના પાડતા માઠું લાગી આવવા થી રાજુભાઈએ ગઈ તા.૧૦ના દિને ખેતરમાં રાખવામાં આવેલી ઝેરી દવા પી લીધી હતી. સારવારમાં ખસેડાયેલા આ શ્રમિકનું ગઈકાલે મૃત્યુ નિપજ્યું છે. સંજય રાજુભાઈ ભડીયાએ પોલીસને જાણ કરી છે.

જો આપને આ પોસ્ટ ગમી હોય તો શેર કરો...