રૂ. ૩૪ લાખ ઉપરાંતની ઉચાપતના કેસમાં કેશીયરની જામીન અરજી મંજૂર

Author: નોબત સમાચાર

રૂ. ૩૪ લાખ ઉપરાંતની ઉચાપતના કેસમાં કેશીયરની જામીન અરજી મંજૂર

વાંસજાળીયાની બેંકનો ઉચાપતનો મામલોઃ

જામનગર તા.૪ : જામજોધપુરના વાંસજાળીયાની એક બેંકના કેશીયર સામે રૂ. ૩૪,૪૫,૦૦૦ની ઉચાપત અંગે ફરિયાદ કરાઈ હતી. જેલહવાલે રહેલા આરોપીએ ચાર્જશીટ પછી જામીન મુક્ત થવા કરેલી અરજી અદાલતે મંજૂર રાખી છે.

જામજોધપુર તાલુકાના વાંસજાળીયા ગામમાં આવેલી જામનગર કો.ઓપ. બેંકની શાખામાં ગઈ તા.૩૦-૧૦-૨૪ ના દિને વિજીલન્સ ટીમે ચેકીંગ કરતા અને રોકડ ચેક કરવા તિજોરી ખોલવા શાખા મેનેજરને કહ્યું હતું. મેનેજર આર.એચ. પંડયાએ બીજા મેનેજર આંબલીયા રજા પર છે અને તિજોરીની બીજી ચાવી કેશીયર ડી.એમ. સાદરીયા પાસે હોવાનું કહ્યું હતું.

તે ચાવી મંગાવી તિજોરી ચકાસાતા તેમાંથી રૂ. ૩૧,૨૫૦ મળી આવ્યા હતા અને રૂ. ૩૪,૪૫,૦૦૦ ઓછા હોવાનું જણાઈ આવ્યું હતું. તેથી રિપોર્ટ કરાયો હતો. કેશીયર સામે તે રકમની ઉચાપતની ફરિયાદ પોલીસમાં કરાઈ હતી.

આરોપી કેશીયર ડી.એમ. સાદરીયાએ આગોતરા જામીન મેળવવા હાઈકોર્ટ સુધી પ્રયત્ન કર્યાે હતો અને ન મળતા પોલીસ સમક્ષ રજૂ થયા હતા. તેની તપાસ પૂર્ણ થતાં અદાલત સમક્ષ ચાર્જશીટ કરાયું હતું. તે પછી જેલહવાલે રહેલા આરોપી ડી.એમ. સાદરીયાએ જામીન અરજી કરી હતી. તે અન્વયે બચાવપક્ષે કરેલી દલીલો ગ્રાહ્ય રાખી અદાલતે આરોપી કેશીયરને રૂ. પ૦ હજારના જામીન પર મુક્ત કર્યાે છે. આરોપી તરફથી વકીલ ડો. વી.એચ. કનારા તથા તેમની ટીમના એસ.બી. વોરીયા, ડી.એન. ભેડા, વી.ડી. બારડ, આર.ડી. સીસોટીયા, રૂપાબેન વસરા, જે.એમ. નંદાણીયા, પી.ડી. વરૂ, વી.એસ. ખીમાણીયા, જે.એ. નંદાણીયા રોકાયા છે.

જો આપને આ પોસ્ટ ગમી હોય તો શેર કરો...