ખરીદેલા ફ્લેટ પર બાકી રહેલી લોન ભરી દેવાનું કહેવાતા વૃદ્ધ પર હુમલો

Author: નોબત સમાચાર

ખરીદેલા ફ્લેટ પર બાકી રહેલી લોન ભરી દેવાનું કહેવાતા વૃદ્ધ પર હુમલો

નાંદુરીમાં ધંધાખારના કારણે પુત્ર-પિતા તૂટી પડ્યાઃ

જામનગર તા.૪ : જામનગરના એક આસામીએ બે ફ્લેટ ખરીદ્યા પછી તે ફ્લેટ પર બાકી રહેલી લોનની નોટીસ મળતા વેચનારને લોન ભરપાઈ કરવા કહેવાયું હતું અને પોલીસમાં અરજી કરાઈ હતી. તેનો ખાર રાખી મારકૂટ કરાતા પોલીસમાં ફરિયાદ પણ થઈ હતી. તેથી ઉશ્કેરાયેલા ચાર શખ્સે ગઈકાલે આ આસામીના હાથ, પગમાં ફ્રેક્ચર કરી નાખ્યા હતા. જ્યારે ધંધાખારના કારણે નાંદુરીમાં ડેરી સંચાલક પર ત્રણ પુત્ર-પિતાએ હુમલો કર્યાે હતો.

જામનગરના ખોડિયાર કોલોની વિસ્તાર સામે આવેલી ન્યુ આરામ કોલોનીની શેરી નં.૨માં રહેતા વેજાણંદભાઈ કાનાભાઈ કંડોરીયા ઉર્ફે હરદાસ ભાઈએ સત્યમ્ કોલોનીમાં આવેલા હરિ વલ્લભ ટાવર-૧માં પરબત કાનાભાઈ ગોજીયા પાસેથી રૂ. ૩૦-૩૦ લાખમાં ફ્લેટ નં.૨૦૩ તથા ૨૦૪ ખરીદ્યા હતા.

તે ફ્લેટ પરબત ગોજીયાના પત્ની હકુબેનના નામે હોય. તે ફ્લેટ વેજાણંદભાઈના પુત્રી વર્ષાબેન નારણભાઈ ગોજીયા તથા બીજો ફ્લેટ વેજાણંદભાઈ ના પત્નીના નામ પર ચઢાવાયો હતો. આ ફ્લેટ પર અગાઉ પરબતભાઈએ લોન લીધી હતી. તેની નોટીસ મળતા વેજાણંંદભાઈએ તેની વાત કરી બાકી લોન ભરપાઈ કરવા પરબતભાઈને કહેવા છતાં લોન ભરવામાં આવી ન હતી.

આ બાબતે સિટી સી ડિવિઝન પોલીસ સ્ટેશનમાં પરબતભાઈ તથા તેના પત્ની હકુબેન સામે અરજી કરવામાં આવતા ગઈ તા.૧૦ જાન્યુ.ના દિને પરબતભાઈ અને અજાણ્યા શખ્સોએ વેજાણંદભાઈને માર માર્યાે હતો. તેની ફરિયાદ કરાઈ હતી. તે બાબતનો ખાર રાખી ગઈકાલે સવારે જામનગર-ખંભાળિયા રોડ પર સ્વામી નારાયણ ગુરૂકૂળ નજીક વેજાણંદભાઈને રોકી લઈ પાઈપ વડે પરબતભાઈ તથા ત્રણ અજાણ્યા શખ્સે ફરીથી પરબતભાઈ પર હુમલો કરી ફ્રેક્ચર સહિતની ઈજા કરી હતી સિક્કા પોલીસે ચારેય હુમલા ખોર સામે ગુન્હો નોંધ્યો છે.

લાલપુર તાલુકાના નાંદુરી ગામના નગાભાઈ એભાભાઈ કરંગીયા નામના યુવાન પર ગઈકાલે સાંજે વજશીભાઈ બાબુભાઈ કરંગીયા, જીજ્ઞેશ વજશીભાઈ, અનિલભાઈ વજશીભાઈ કરંગીયાએ ગાળો ભાંડી ધોકા-પાઈપથી હુમલો કર્યાે હતો. નગાભાઈ તથા વજશીભાઈની દૂધની ડેરી આજુ બાજુમાં આવેલી હોય ધંધા ખારના કારણે હુમલો કરાયાનું ફરિયાદમાં જણાવાયું છે.

જો આપને આ પોસ્ટ ગમી હોય તો શેર કરો...