પુત્રીની સગાઈ માટે પૈસાની વ્યવસ્થા ન થતાં પિતાએ કરી લીધી આત્મહત્યા

Author: નોબત સમાચાર

પુત્રીની સગાઈ માટે પૈસાની વ્યવસ્થા ન થતાં પિતાએ કરી લીધી આત્મહત્યા

બીમારીથી ત્રસ્ત પ્રૌઢાનું વિષપાનઃ મૃત્યુઃ

જામનગર તા.૪ : જામનગરના સિક્કામાં રહેતા એક પરપ્રાંતીય પ્રૌઢે પોતાની પુત્રીની સગાઈનો દિવસ નજીક આવતો હોવા છતાં પૈસાની વ્યવસ્થા ન થઈ શકતા વ્યથિત થઈ ગઈકાલે ગળાફાંસો ખાઈ જીવતર ટૂંકાવી લીધુ છે. જ્યારે માનસિક બીમારીથી કંટાળી ગયેલા પ્રૌઢાએ ઝેરી દવા પી જિંદગીનો અંત આણ્યો છે.

જામનગર તાલુકાના સિક્કા ગામમાં શ્રીજી સોસાયટીમાં રહેતા મૂળ બિહાર રાજ્યના સુરાના જિલ્લાના ગૌરા ગામના વતની ઓમનાથસિંગ બીરાસિંગ રાજપૂત (ઉ.વ.૪૫) નામના પ્રૌઢે ગઈકાલે વહેલી સવારે પોતાના ઘર પાસે આવેલા એક ઝાડમાં ગળાફાંસો ખાઈ આત્મહત્યા કરી છે.

આ બાબતની જાણ તેમના ભાઈ સુરેશસિંગ રાજપૂતે પોલીસને કરી છે. દોડી ગયેલી સિક્કા પોલીસે મૃતદેહનો કબજો સંભાળી સુરેશસિંગનું નિવેદન નોંધ્યું છે. જેમાં તેઓએ જણાવ્યા મુજબ મોટાભાઈ ઓમનાથસિંગના પુત્રીની થોડા દિવસ પછી સગાઈ યોજવામાં આવી હતી. તેના દિવસો નજીક આવતા જતા હોવા છતાં પૈસાની વ્યવસ્થા થઈ શકતી ન હોવાથી ઓમનાથસિંગ ટેન્શન અનુભવતા હતા અને તેના કારણે તેઓએ ગઈકાલે આત્મહત્યા કરી લીધી છે.

જામનગરના ગુલાબનગર રોડ પર આવેલા રાજપાર્ક પાસે રમણ પાર્કમાં રહેતા સુમિત્રાબેન હિમાંશુભાઈ પાણખાણીયા (ઉ.વ.૫૩) નામના પ્રૌઢા છેલ્લા અઢી દાયકાથી માનસિક બીમારીથી પીડાતા હતા. તેનાથી કંટાળી જઈ આ મહિલાએ કોઈ ઝેરી પ્રવાહી પી લીધુ હતું. સારવાર માટે ખાનગી હોસ્પિટલમાં લઈ જવામાં આવેલા સુમિત્રાબેનનું મૃત્યુ નિપજ્યું છે. તેમના પતિ વકીલ હિમાંશુભાઈ વેલજીભાઈ પાણખાણીયાએ પોલીસને જાણ કરી છે.

જો આપને આ પોસ્ટ ગમી હોય તો શેર કરો...