ઉનાળો આવતા જ ઉકળાટ શરૃઃ માર્ચના બીજા અઠવાડિયામાં પડશે ધગધગતી ગરમી

Author: નોબત સમાચાર

ઉનાળો આવતા જ ઉકળાટ શરૃઃ માર્ચના બીજા અઠવાડિયામાં પડશે ધગધગતી ગરમી

હવામાન ખાતાની આકરી આગાહીઃ પહેલાની સરખામણીમાં પ્રકોપ વધશે

અમદાવાદ તા. ૪: હવામાન ખાતાની આગાહી મુજબ ગુજરાતમાં માર્ચના બીજા સપ્તાહમાં ગરમીનો પ્રકોપ વધશે. ઉ. ગુજરાતમાં સૌથી વધુ ગરમી પડવાની સંભાવના જણાવાઈ છે.

ઉનાળાના આરંભે જ તાપમાનનો પારો ઊંચે જઈ રહ્યો છે. માર્ચ મહિનાની શરૂઆતમાં વાતાવરણમાં ભલે મિશ્ર ઋતુનો માહોલ અનુભવાતો હોય, પરંતુ એક સપ્તાહ પછી વેસ્ટર્ન ડિસ્ટબન્સના કારણેઆકરી ગરમીની શરૂઆત થવાની છે. તાપમાનનો પારો ૩પ ડીગ્રીને પાર કરતા સવારે ઠંડી અને બપોરે ગરમીનો અનુભવ થઈ રહ્યો છે.

આગામી દિવસોમાં હોળીનો તહેવાર છે, ત્યારે હોળીના તહેવાર પહેલા જ ગરમીનો અહેસાસ થવા લાગ્યો છે. હાલમાં બેવડી ઋતુનો અનુભવ થઈ રહ્યો છે. હવામાન વિભાગની આગાહી મુજબ માર્ચના બીજા સપ્તાહથી ગરમી પ્રકોપ વરસવાનો છે જેમાં ઉત્તર ગુજરાતમાં સૌથી વધુ ગરમી પડવાની સંભાવના વ્યક્ત કરી છે, જ્યારે ગરમી પ્રકોપ વચ્ચે ૬ થી ૧પ દિવસ સુધી હિટવેવની અસર રહેવાની છે.

અગાઉના ઉનાળાની સરખામણીએ વર્ષ ર૦રપ માં ઉનાળાની ગરમીનો પ્રકોપ વધુ રહેશે. એવી આગાહી કરવામાં આવી છે. ઉત્તર ગુજરાતમાં ૧૪ માર્ચથી ગરમી પ્રકોપ વરસવાની આગાહી હવામાન વિભાગ દ્વારા વ્યક્ત કરવામાં આવી છે. માર્ચ મહિનામાં ૧ થી પ દિવસ સુધી હિટવેવના કારણે ગરમીનો તીવ્ર અનુભવ થવાનો છે. સામાન્ય રીતે સમગ્ર રાજ્યમાં હિટવેવના ર થી ૬ દિવસ રહેતા હોય છે, પરંતુ આ વખતે માર્ચ માસ દરમિયાન હિટવેવનું મોજુ હાવિ થવાનું છે.

હવામાન વિભાગ દ્વારા ગઈકાલે તેના લાંબાગ્બાળાના પૂર્વાનુમાનમાં ઉત્તર ગુજરાતમાં ૧૪ મી માર્ચથી આકરો ગરમી પ્રકોપ વરસવાની આગાહી કરી છે, જેમાં માર્ચના બીજા સપ્તાહથી તાપમાનનો પારો ૪ર ડીગ્રીને આંબવાની સંભાવના છે. રાજ્યના મુખ્ય શહેરોના તાપમાનની વાત કરવામાં આવે તો ઉનાળાની શરૂઆત થતા અમદાવાદમાં પારો ૩પ ડીગ્રીએ પહોંચી ગયો છે, જ્યારે ગાંધીનગરમાં ૩૪.૮ ડીગ્રી, ડીસામાં ૩પ ડીગ્રી, વડોદરામાં ૩પ.ર ડીગ્રી, સુરતમાં ૩૪.૧ ડીગ્રી કંડલામાં ૩પ.૩ ડીગ્રી જ્યારે રાજકોટમાં સૌથી વધુ ૩૬.ર ડીગ્રી તાપમાન નોંધાયું છે.

જો આપને આ પોસ્ટ ગમી હોય તો શેર કરો...