જામનગરના સીએ દ્વારા ભાગીદાર સામે કરાયેલી ચેક પરતની રાવમાં ફટકારાઈ સજા

Author: નોબત સમાચાર

જામનગરના સીએ દ્વારા ભાગીદાર સામે કરાયેલી ચેક પરતની રાવમાં ફટકારાઈ સજા

ટ્રાવેલ્સના ધંધાર્થીને ચેક પરતમાં બે વર્ષની કેદઃ અન્ય એક આસામીને પણ એક વર્ષની સજાઃ

જામનગર તા.૪ : જામનગરના એક તબીબે રૂ. ૭ લાખ સંબંધદાવે ટુર્સ એન્ડ ટ્રાવેલ્સના સંચાલકને હાથ ઉછીના આપ્યા પછી મેળવેલો ચેક બેંકમાંથી પરત ફરતા કોર્ટમાં ફરિયાદ નોંધાવી હતી. તે કેસ ચાલી જતાં અદાલતે આરોપીને બે વર્ષની કેદની સજા અને ચેકથી બમણી રકમનો દંડ ફટકાર્યાે છે. જામનગરના અન્ય એક આસામીએ રૂ. ૩ લાખના ચેક પરતની કરેલી ફરિયાદમાં અદાલતે આરોપીને એક વર્ષની કેદ અને ચેકની રકમ વળતર પેટે ચૂકવવા હુકમ કર્યાે છે. જ્યારે જામનગરમાં સીએની ઓફિસ ચલાવતા આસામીએ પોતાના ભાગીદાર સામે કરેલી રૂ. ૧૫ લાખના ચેક પરતની બે ફરિયાદમાં અદાલતે એક-એક વર્ષની કેદ અને ચેકની રકમ વળતર પેટે ચૂકવવા આદેશ ફરમાવ્યો છે.

જામનગરમાં મેહુલનગર વિસ્તારમાં આવેલા કે.કે. રેસીડેન્સીમાં રહેતા અને ગાંધીનગર વિસ્તારમાં ક્લિનિક ચલાવતા ડો. વિજયભાઈ બુસાએ લાલવાડી વિસ્તારમાં રહેતા અને ટુર્સ એન્ડ ટ્રાવેલ્સ ચલાવતા હેમત વાલજીભાઈ સાવરીયાને વર્ષ ૨૦૧૬માં સંબંધદાવે રૂ. ૭ લાખ હાથ ઉછીના આપ્યા હતા.

તે લેણી રકમની ડો. વિજયે માગણી, ઉઘરાણી કરતા હેમત ભાઈએ રૂ. ૭ લાખનો ચેક આપ્યો હતો. તે ચેક બેંકમાંથી પરત ફર્યાે હતો. ડો. વિજય ભાઈએ ધી નેગો. ઈન્સ્ટ્રુ. એક્ટ કલમ ૧૩૮ હેઠળ કાર્યવાહી બાબતે નોટીસ આપી હતી. તેમ છતાં રકમ નહીં ચૂકવાતા ફરિયાદ કરવામાં આવી હતી. તે કેસમાં સમન્સની બજવણી થવા છતાં આરોપી હાજર ન રહી ભાગેડુ રહેતા તેની સામે પકડ વોરંટ ઈસ્યુ થયું હતું. આ કેસ ચાલી જતાં અદાલતે આરોપી હેમત વાલજીભાઈ સાવરીયાને બે વર્ષની કેદસજા અને રૂ. ૧૪ લાખનો દંડ ફટકાર્યાે છે. દંડની રકમમાંથી ફરિયાદીને ચેકની રકમ વળતર પેટે ચૂકવાશે. ફરિયાદી તરફથી વકીલ બિમલ ચોટાઈ, નીલ ચોટાઈ, સુમિત સોલંકી, મોનીલ ગુઢકા રોકાયા હતા.

જામનગરના ચંદ્રકુમાર ભવાનભાઈ પરમાર પાસેથી તેમના મિત્ર કિશોર બી. ઠક્કરે રૂ. ૩ લાખ હાથઉછીના આપ્યા હતા તેની પરત ચૂકવણી માટે ચેક અપાયો હતો. તે ચેક પરત ફરતા ફરિયાદ કરવામાં આવી હતી. તે કેસ ચાલી જતાં અદાલતે આરોપી કિશોર બી. ઠક્કરને એક વર્ષની કેદ અને ચેકની રકમ મુજબનો દંડ ફટકાર્યાે છેે. ચેક મુજબની રકમ વળતર પેટે ચૂકવી આપવા આદેશ કર્યાે છે. ફરિયાદી તરફે વકીલ ગિરીશ સરવૈયા, ઋષિરાજ જેઠવા રોકાયા હતા.

જામનગરની મોદી એન્ડ કંપનીના પાર્ટનર ઓનઅલી મહેબુબ મોદી પાસેથી રાજકોટ માં રહેતા તુષાર એચ. નકુમે રૂ. ૧૫ લાખ હાથઉછીના મેળવી રૂ. ૧૦ લાખ તથા રૂ. પ લાખના બે ચેક આપ્યા હતા. તે ચેક બેંકમાંથી અપૂરતા નાણા ભંડોળના કારણે પરત ફરતા ઓનઅલી મોદીએ જામનગરની અદાલતમાં બે ફરિયાદ નોંધાવી હતી. તે કેસ ચાલી જતાં અદાલતે બંને કેસમાં આરોપીને એક-એક વર્ષની કેદ તથા ત્રણ મહિનામાં રૂ. ૧૫ લાખ વળતર પેટે ચૂકવી આપવા હુકમ કર્યાે છે. વળતર ન ચૂકવાઈ તો વધુ છ મહિનાની કેદની સજા આપવામાં આવી છે. ફરિયાદી તરફથી વકીલ નિતલ ધ્રુવ, ડેનિશા ધ્રુવ, પૂજા ધ્રુવ, આશિષ ફટાણીયા, ડી.એન. જોષી, અલ્ફાઝ મુંદ્રા, અશ્વિન સોનગરા તથા પ્રિતેશ ભટ્ટ રોકાયા હતા.

જો આપને આ પોસ્ટ ગમી હોય તો શેર કરો...