રામનગર-દડિયા પાસેથી બે શખ્સ દારૃની ચાર બોટલ સાથે ઝડપાયા

Author: નોબત સમાચાર

રામનગર-દડિયા પાસેથી બે શખ્સ દારૃની ચાર બોટલ સાથે ઝડપાયા

ખુલ્લા ફાટક પાસે ઝૂંપડામાંથી દેશીની ચાર ભઠ્ઠી ઝડપાઈઃ

જામનગર તા.૧૬ ઃ જામનગરના રામનગર પાસેથી એક શખ્સ દારૃની ત્રણ બોટલ સાથે અને દડિયા નજીકથી એક શખ્સ દારૃની બોટલ સાથે ઝડપાઈ ગયો છે. વુલન મીલ નજીક ખુલ્લા ફાટક પાસે બાવરીવાસ સ્થિત ચાર ઝૂંપડામાંથી પોલીસે દેશી દારૃની ચાર ભઠ્ઠી પકડી પાડી છે. ત્યાંથી આથો, ભઠ્ઠીના સાધનો, દારૃ મળ્યા છે.

જામનગરના રામનગર વિસ્તારમાંથી ગઈરાત્રે ૫સાર થતાં ધરારનગર-રના શહીદી ચોકમાં રહેતા જાવેદ અલીમામદ સમા નામના શખ્સને પેટ્રોલિંગમાં રહેલા સિટી બી ડિવિઝનના સર્વેલન્સ સ્ટાફે રોકાવી તલાશી લેતા આ શખ્સના કબજામાંથી ઈંગ્લીશ દારૃની ત્રણ બોટલ મળી આવી હતી. પોલીસે બોટલ કબજે કરી જાવેદની ધરપકડ કરી છે.

જામનગરના દડીયા ગામ પાસે રણજીતસાગર તરફ જવાના રસ્તા પરથી ગઈકાલે સાંજે પસાર થતાં દરેડના એફસીઆઈ ગોડાઉન નજીક વસવાટ કરતા પરેશ જીવાભાઈ ગોરડીયા નામના શખ્સને રોકી પોલીસે જડતી લેતા તેની પાસેથી દારૃની બોટલ મળી આવી હતી. પોલીસે પરેશ સામે ગુન્હો નોંધ્યો છે.

જામનગરના દિગ્જામ વુલન મીલ નજીક ખુલ્લા ફાટક પાસે બાવરીવાસમાં આવેલા આરતીબેન જશરાજ ડાભી નામના મહિલાના ઝૂંપડામાં ગઈકાલે સિટી સી ડિવિઝનના સ્ટાફે દરોડો પાડતા ત્યાંથી દેશી દારૃની ભઠ્ઠી મળી આવી હતી. સ્થળ પરથી તૈયાર દારૃ તેમજ આથો, ભઠ્ઠીના સાધનો કબજે કરાયા છે.

ત્યાં જ આવેલા રાજુ સાગર વઢીયાર નામના શખ્સના ઝૂંપડા માંથી પણ દેશી દારૃની ભઠ્ઠી ઝડપાઈ ગઈ છે. દરોડા પહેલાં રાજુ નાસી ગયો છે. બાજુમાં આવેલા લક્ષ્મીબેન શંકરભાઈ યાદવ અને વૈજયંતી લક્ષ્મણ ડાભીના ઝૂંપડામાંથી પણ દેશી દારૃની ભઠ્ઠી પકડી પાડવામાં આવી છે. આ બંને મહિલા પણ ફરાર થઈ ગયા છે. સ્થળ પરથી આથો, તૈયાર દારૃ, ભઠ્ઠીના સાધનો મળી આવ્યા હતા.

જો આપને આ પોસ્ટ ગમી હોય તો શેર કરો...