ધ્રોલના લતીપરથી ગોકુલપર વચ્ચે મોડીરાત્રે મોટરને અકસ્માતઃ જામનગરના બે સહિત ત્રણના મોતઃ બે ઘાયલ

Author: નોબત સમાચાર

ધ્રોલના લતીપરથી ગોકુલપર વચ્ચે મોડીરાત્રે મોટરને અકસ્માતઃ જામનગરના બે સહિત ત્રણના મોતઃ બે ઘાયલ

લગ્નપ્રસંગમાં દાંડિયારાસ પૂર્ણ થતાં નીકળ્યા હતા નાસ્તો કરવાઃ મોટર કાબુ બહાર ગઈઃ

ધ્રોલ તા.૧૬ ઃ ધ્રોલ તાલુકાના લતીપરથી ગોકુલપરની વચ્ચે ગઈરાત્રે વરના મોટર ચાલકના કાબુ બહાર ગયા પછી રોડ ઉતરીને ગોથું મારી ગઈ હતી. આ અકસ્માતમાં મોટરનો કડૂસલો બોલી ગયો હતો. મોટરમાં જઈ રહેલા પાંચ યુવાનમાંથી ત્રણ યુવાનના ગંભીર ઈજા થવાથી મૃત્યુ નિપજ્યા છે અને બેને ગંભીર ઈજા થઈ છે. મૃતકમાં જામનગરના બે તથા લતીપરના એક યુવાનનો સમાવેશ થાય છે. આ વ્યક્તિઓ લતીપરમાં યોજાયેલા એક લગ્નપ્રસંગમાં દાંડિયારાસનો કાર્યક્રમ પૂર્ણ થયા પછી નાસ્તો કરવા માટે મોડીરાત્રે નીકળ્યા હતા ત્યારે માર્ગમાં કાળનો ભેટો થયો હતો. બંને ઈજાગ્રસ્તને સારવાર માટે જામનગર ખસેડાયા છે.

આ ગમખ્વાર અકસ્માતની વધુ વિગત મુજબ ધ્રોલ તાલુકાના લતીપરથી ગોકુલપર ગામ વચ્ચે ગઈરાત્રે પુરપાટ ઝડપે પસાર થતી હ્યુન્ડાઈ કંપનીની વરના મોટર અચાનક જ ચાલકના કાબુ બહાર ગઈ હતી અને તે પછી રોડ ઉતરીને પલ્ટી મારી ગઈ હતી.

રાત્રિના અંધકારમાં મોટરમાં બેસેલા વ્યક્તિઓની ચીસોથી હાઈવે ગાજી ઉઠ્યો હતો. ત્યાંથી પસાર થતાં અન્ય વાહનો થંભ્યા હતા. કોઈએ પોલીસ તથા ૧૦૮ને જાણ કરી હતી. દોડી આવેલી એમ્બ્યુલન્સ ના સ્ટાફ તથા અન્ય વ્યક્તિઓ દ્વારા ગોથું મારી ગયેલી મોટરમાં રહેલા વ્યક્તિઓને બહાર કાઢવાની કામગીરી શરૃ કરી હતી. જેમાં ત્રણ યુવાન મોટરમાંથી મૃત્યુ પામેલી હાલતમાં મળી આવ્યા હતા. જ્યારે બે યુવાન ઈજા થવાથી કણસતી હાલતમાં બહાર કાઢવામાં આવ્યા હતા.

બંને ઈજાગ્રસ્તોને સારવાર માટે ધ્રોલ દવાખાને ખસેડવાની તજવીજ કરવામાં આવી હતી. તે દરમિયાન ધ્રોલ પોલીસની ટીમ પણ ધસી આવી હતી.

મૃતક યુવાનો તથા બંને ઈજાગ્રસ્તો જીજે-૩૬-એસી ૪૯૫૭ નંબરની મોટરમાં એક લગ્નપ્રસંગમાં ભાગ લેવા માટે આવ્યા હતા. જ્યાં ગઈરાત્રે દાંડિયારાસ કાર્યક્રમ પૂર્ણ કર્યા પછી આજે જાન જવાની હતી તે પહેલાં આ યુવાનો નાસ્તો કરવા માટે મોટરમાં રવાના થયા હતા અને માર્ગમાં ઉપરોક્ત અકસ્માત સર્જાયો હતો.

અકસ્માતમાં ધ્રોલ તાલુકાના લતીપર ગામના રીશીભાઈ મુકેશભાઈ ચભાડીયા, જામનગરના શંકર ટેકરી ઉદ્યોગનગર નજીક શિવ નગરની શેરી નં.૪માં રહેતા ધર્મેન્દ્રસિંહ રામદેવસિંહ ઝાલા તથા શ્રીજી હોલ પાસે રહેતા વિવેકભાઈ દિનેશભાઈ પરમાર નામના ત્રણ યુવાનનું ગંભીર ઈજા થવાથી મૃત્યુ નિપજ્યું છે. જ્યારે સાથે રહેલા અન્ય બે યુવાનને ઈજા થઈ છે. તેઓને પ્રાથમિક સારવાર ધ્રોલ દવાખાને આપવામાં આવ્યા પછી વધુ સારવાર માટે જામનગર હોસ્પિટલ ખસેડવામાં આવ્યા છે. પોલીસે અકસ્માત અંગે નોંધ કરી તપાસ શરૃ કરી છે.

દાંડિયારાસનો કાર્યક્રમ પૂર્ણ થયા પછી નાસ્તો કરવા ગયેલા પાંચ યુવાનોને રસ્તામાં કાળ આંબી ગયાની અને બે યુવાન ગંભીર રીતે ઘવાયાની જાણ લગ્ન સ્થળે થતાં ત્યાં પણ શોકનું મોજું પ્રસરી ગયું હતું.

જો આપને આ પોસ્ટ ગમી હોય તો શેર કરો...