જામનગરના દરેડ પાસે રિક્ષાએ ઠોકર મારતા ઘવાયેલા બાઈકચાલકનું મૃત્યુ

Author: નોબત સમાચાર

જામનગરના દરેડ પાસે રિક્ષાએ ઠોકર મારતા ઘવાયેલા બાઈકચાલકનું મૃત્યુ

ઓખામઢી પાસે અકસ્માતમાં બાળકી મોતને શરણઃ

જામનગર તા. ૧૧ઃ જામનગરના દરેડ પાસે એક બાઈકને ઠોકર મારી અજાણી રિક્ષા નાસી ગઈ હતી. સારવારમાં રહેલા બાઈકચાલકનું મૃત્યુ નિપજ્યું છે. હિટ એન્ડ રનના આ બનાવની પોલીસે તપાસ આદરી છે. ઓખાના કુરંગા પાસે એક માલવાહક વાહને રોડની સાઈડમાં ઉભેલી બાળકીને હડફેટે લેતા બાળકી મોતને શરણ થઈ છે. જ્યારે ગુલાબનગર પાસે ચક્કર આવતા પડી ગયેલા વૃદ્ધનું સારવાર દરમિયાન મૃત્યુ થયું છે.

જામનગર-લાલપુર માર્ગ પર આવેલા દરેડ ગામ પાસેથી ગઈ તા.૬ની સાંજે નગરની સાધનાકોલોનીમાં રહેતા હોશિયારસિંગ ઝુલ્ફીકાર હીરા નામના યુવાન પોતાના મોટર સાયકલ પર જતા હતા. ત્યારે એક રિક્ષા દોડી આવી હતી. તેના ચાલકે ઠોકર મારતા બાઈક પરથી હોશિયારસિંગ ફેંકાઈ ગયા હતા. અકસ્માત સર્જી રિક્ષા સ્થળ પરથી નાસી ગઈ હતી. ઈજાગ્રસ્તને સારવાર માટે જી.જી. હોસ્પિટલમાં ખસેડવામાં આવ્યા હતા જ્યાં તેઓનું મૃત્યુ નિપજ્યું છે.

હિટ એન્ડ રનના આ બનાવ અંગે લાલપુર ચોકડી પાસે ઓમ પાર્કમાં રહેતા સંજય દેવરાજભાઈ વીરાણીએ પોલીસને જાણ કરતા પીએસઆઈ સી.એમ. કાંટેલીયા તથા સ્ટાફ દોડી આવ્યા હતા. જમાદાર શૈલેન્દ્રસિંહે આ બનાવની તપાસ હાથ ધરી છે.

જામનગરના સત્યમ્ કોલોની વિસ્તારમાં આવેલી જય સોસાયટીમાં રહેતા અમૃતલાલ સવજીભાઈ ધારવીયા (ઉ.વ.૭૦) નામના સતવારા વૃદ્ધ બુધવારે સાંજે પાંચેક વાગ્યે ગુલાબનગર રોડ પર સીએનજી પંપ પાસેથી જતા હતા ત્યારે કોઈ કારણથી ચક્કર આવતાં ફસડાઈ પડ્યા હતા.

આ વૃદ્ધને સારવાર માટે જી.જી. હોસ્પિટલમાં લાવવામાં આવ્યા હતા. જ્યાં તેમને ચકાસ્યા પછી ફરજ પરના તબીબે મૃત્યુ પામેલા જાહેર કરતા મૃતકના નાનાભાઈ કરશનભાઈ ધારવીયાએ પોલીસને જાણ કરી છે.

દેવભૂમિ દ્વારકા જિલ્લાના ઓખામઢી ગામથી પોરબંદર તરફ જવાના ધોરીમાર્ગ પર કુરંગા ગામ નજીક ખાનગી કંપનીની પાછળ ઝૂંપડામાં વસવાટ કરતા રામીબેન અનિલભાઈ પરમાર નામના ડફેર મહિલાની આઠ વર્ષની પુત્રી આશા ગઈકાલે સવારે માતા તેમજ અન્ય સંબંધીઓ સાથે સાઈડમાં ઉભી હતી.

આ વેળાએ ભાટીયા તરફથી જીજે-૩૭-ટી ૬૧૪૨ નંબરનું માલવાહક વાહન ફૂલ સ્પીડમાં ધસી આવ્યું હતું. આ વાહનના ચાલકે બેદરકારીથી ડ્રાઈવીંગ કરી આશાને હડફેટે લેતાં રોડ પર ફેંકાઈ ગયેલી આ બાળકીનું ગંભીર ઈજા થવાથી મૃત્યુ નિપજ્યું છે. આ બનાવની દ્વારકા પોલીસ સ્ટેશનમાં રામીબેને ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...