બેડીના એડવોકેટની હત્યાના કેસમાં એક આરોપીના હાઈકોર્ટમાંથી થયા જામીન મંજુર

Author: નોબત સમાચાર

બેડીના એડવોકેટની હત્યાના કેસમાં એક આરોપીના હાઈકોર્ટમાંથી થયા જામીન મંજુર

સેશન્સ કોર્ટે નામંજૂર કરી હતી જામીન અરજીઃ

જામનગર તા.૧૯ : જામનગરના બેડી વિસ્તારમાં એક વર્ષ પહેલાં રમઝાન પર્વ પર એક એડવોકેટની હત્યા થઈ હતી. મૃતકના ભત્રીજાએ પોલીસીમાં ફરિયાદ નોંધાવતા સવા ડઝન જેટલા શખ્સો સામે પોલીસે હત્યાનો ગુન્હો નોંધ્યો હતો. ધરપકડ પામી જેલહવાલે થયેલા આરોપી પૈકીના એક શખ્સે સુપ્રિમ કોર્ટમાં કરેલી જામીન અરજી નામંજૂર થતા હાઈકોર્ટમાં ધા નાખી હતી. હાઈકોર્ટે તે આરોપીને જામીન પર છોડવાનો હુકમ કર્યાે છે.

જામનગરના બેડી વિસ્તારમાં ગઈ તા.૧૩-૩-૨૪ના દિવસે જામનગરના જાણીતા એડવોકેટ હારૂન પાલેજાની કરપીણ હત્યા કરવામાં આવી હતી. કુખ્યાત સાયચા ગેંગના શખ્સો સામે થયેલી એક શિક્ષિકાની આત્મહત્યાની દુષ્પ્રેરણાના કેસમાં ફરિયાદી તરફથી એડવોકેટ હારૂન પલેજા રોકાયા હતા. તે બાબતનો ખાર રાખી વાછાણી મીલ પાસે એડવોકેટ હારૂન પલેજા પર બશીર જુસબ સાયચા, ઈમરાન નુરમામદ સાયચા, રમઝાન સાયચા, સીકંદર નુરમામદ સાયચા, રીઝવાન સાયચા, જાબીર મહેમુદ સાયચા, દીલાવર હુસેન કકલ, સુલેમાન હુસેન, ગુલામ જુસબ સાયચા, એજાઝ ઉમર સાયચા, અશર જુસબ, મહેમુદ જુસબ સાયચા તથા રઝાક ચાવડા ઉર્ફે સોપારી, ઉમર ઓસમાણ ચમડીયા, શબ્બીર હુસેન ચમડીયા નામના શખ્સોએ હથિયારો વડે હુમલો કરી હારૂનભાઈને મોતને ઘાટ ઉતારી દીધા હતા.

આ બાબતની મૃતકના ભત્રીજા નુરમામદ ઓસમાણ પલેજાએ પોલીસમાં ફરિયાદ નોંધાવતા પોલીસે હત્યા સહિતની કલમો હેઠળ ગુન્હો નોંધી આરોપીઓની ધરપકડ કરી હતી.

ચાર્જશીટ રજૂ થયા પછી આરોપી પૈકીના અસગર જુસબ સાયચાએ કરેલી જામીન અરજી નામંજૂર થતાં હાઈકોર્ટમાં જામીન અરજી કરાઈ હતી.

ઉપરોક્ત અરજી ચાલી જતાં વડી અદાલતે આરોપી પક્ષના વકીલ રૂચીત જે. વ્યાસની દલીલો ગ્રાહ્ય રાખી આરોપીને ગઈ તા.૬ના દિને રૂ.૧૦ હજારના જામીન પર મુક્ત કર્યાે છે.

જો આપને આ પોસ્ટ ગમી હોય તો શેર કરો...