જોડિયા પાસેથી પોલીસની ઓળખ આપી ડીઝલ ભરેલા ટેન્કરની લૂંટ કરનારની મુક્તિ

Author: નોબત સમાચાર

જોડિયા પાસેથી પોલીસની ઓળખ આપી ડીઝલ ભરેલા ટેન્કરની લૂંટ કરનારની મુક્તિ

૧૮ વર્ષ પહેલાં બે શખ્સે ચલાવી હતી લૂંટઃ

જામનગર તા.૨૭ : જોડિયાના બાલંભા પાસે ૧૮ વર્ષ પહેલાં રાત્રિના સમયે બે શખ્સે ૨૦ હજાર લીટર ડીઝલ ભરેલા ટેન્કરની પોલીસ તરીકેની ખોટી ઓળખ આપી લૂંટ ચલાવી હોવાનો કેસ ચાલી જતાં અદાલતે બે આરોપીનો છૂટકારો કર્યાે છે.

જોડિયા તાલુકાના બાલંભા ગામ પાસેથી ગઈ તા.૧૮-૪-૦૭ની રાત્રે દોઢેક વાગ્યે અબ્દુલ ડાડુ નામનો ટ્રક ડ્રાઈવર ગાંધીધામની ટ્રાન્સપોર્ટ કંપનીનું ટેન્કર લઈને ઓખા તરફ જવા માટે નીકળ્યો હતો. તેની સાથે સીકંદર નામનો ક્લિનર અને અબ્દુલનો ભાણેજ પણ હતા.

તેઓના ટેન્કરમાં ૨૦ હજાર લીટર ડીઝલ ભરેલુ હતું. બાલંભા પાસે તે સમયે ઉભા રહેલા બે શખ્સે ટેન્કર રોકવા ઈશારો કર્યાે હતો પરંતુ અબ્દુલે ટેન્કર ભગાડી મુકતા મોટરમાં તેનો પીછો કરી ટેન્કર રોકી લેવાયું હતું. આ પછી મોટરમાં આવેલા બે શખ્સે પોતાની ઓળખ પોલીસ તરીકેની આપી ટેન્કરને ખંભાળિયા પોલીસ સ્ટેશને લઈ લેવા સૂચન કર્યું હતું. માર્ગમાં લઘુશંકા કરવાનું કહેતા અબ્દુલને ઉતારવામાં આવ્યો હતો અને અબ્દુલે દોટ મૂકી હતી. તે પછી સિકંદર તથા તેના ભાણેજને માર મારી બે શખ્સ ટેન્કર લૂંટી ગયા હતા.

રાત્રિના સમયે ધોરીમાર્ગ પર દોડતા જતા અબ્દુલને જોડિયા પોલીસ સ્ટેશનના પેટ્રોલિંગમાં રહેલા સ્ટાફે રોકાવી પૂછપરછ કર્યા પછી બનાવના સ્થળે દોટ મૂકી હતી પરંતુ તે પહેલાં ટેન્કર સાથે આરોપીઓ નાસી ગયા હતા. પોલીસે ગુન્હો નોંધી શરૂ કરેલી તપાસમાં રાજભા ઉર્ફે પ્રવીણસિંહ પીંગળસુર, શૈલેષ અનંતરાય ત્રિવેદી નામના બે શખ્સના નામ ખૂલ્યા હતા. પોલીસે ટેન્કર કબજે કરી બંને શખ્સની ધરપકડ કરી હતી.

ઉપરોકત કેસ જામનગરની અદાલતમાં ચાલવા પર આવતા ફરિયાદ પક્ષે ર૬ સાક્ષીની જુબાની અને ૧૯ દસ્તાવેજી પુરાવા રજૂ કર્યા હતા. તેની સામે બચાવપક્ષે દલીલ કરી હતી કે, આરોપીઓની ઓળખ મળે તેવા શારીરિક બાંધાનું વર્ણન ફરિયાદમાં દર્શાવાયું નથી, ઓળખ પરેડ કરાવનાર એક્ઝી. મેજી.ની જુબાની લેવાઈ નથી, ઓળખ પરેડના પંચોએ ઓળખને સમર્થન આપ્યું નથી અને ટ્રક કબજે કરવાથી કે લૂંટનો મુદ્દામાલ અન્ય સ્થળેથી કબજે કરવાથી આરોપીઓ આ ગુન્હામાં સંડોવાયેલા છે તેમ અનુમાન ન કરી શકાય. અદાલતે તે દલીલો ગ્રાહ્ય રાખી આરીપોઓનો છૂટકારો ફરમાવ્યો છે. આરોપી તરફથી વકીલ ડો. વી.એચ. કનારા તથા એસ.બી. વોરીયા, ડી.એન. ભેડા, વી.ડી. બારડ, આર.ડી. સીસોટીયા, રૂપાબેન વસરા, જે.એમ. નંદાણીયા, પી.ડી. વરૂ, વી.એસ. ખીમાણીયા રોકાયા હતા.

જો આપને આ પોસ્ટ ગમી હોય તો શેર કરો...