એરપોર્ટ રોડ પર હિટ એન્ડ રનના બનાવમાં નગરના પ્રૌઢનું મોત

Author: નોબત સમાચાર

એરપોર્ટ રોડ પર હિટ એન્ડ રનના બનાવમાં નગરના પ્રૌઢનું મોત

સલાયા રોડ પર બાઈક ગાય સાથે ટકરાયું:

જામનગર તા.૨૨ : જામનગર-ખંભાળિયા રોડ પર એરપોર્ટ નજીક ગઈકાલે સવારે એક છકડાને પાછળથી મીની ટ્રકે ટક્કર મારતા છકડામાં જઈ રહેલા બે પૈકી એક પ્રૌઢનું મૃત્યુ નિપજ્યું છે. જ્યારે બીજાને ઈજા થઈ છે. સલાયા નજીક હરીપર પાસે બાઈક આડે ઉતરતા યુવાનનું મૃત્યુ નિપજ્યું છે.

જામનગરના ખોડિયાર કોલોની વિસ્તાર સામે નિલકમલ સોસાયટીમાં રહેતા અને ભંગારની ફેરીનું કામ કરતા હૈદરઅલી પંજુભાઈ મીનસારીયા (ઉ.વ.પ૬) અને તેમની સાથે કામ કરતા પ્રવીણભાઈ ભવાનભાઈ રાઠોડ સોમવારે સવારે છએક વાગ્યે રિક્ષા છકડામાં ખંભાળિયા ધોરીમાર્ગ પર એરપોર્ટ નજીક આવેલા એક પાર્ટી પ્લોટ પાસેથી જતા હતા ત્યારે અચાનક પાછળથી અજાણ્યો મીની ટ્રક પુરપાટ ઝડપે ધસી આવ્યો હતો.

આ ટ્રકના ચાલકે આગળ જતાં છકડાને ઠોકર મારતા હૈદરઅલી તથા પ્રવીણભાઈ રોડ પર ફેંકાઈ ગયા હતા. આ અકસ્માતમાં હૈદરઅલીને મળકામાં ફ્રેક્ચર સહિતની ઈજા થઈ છે. જ્યારે સાથે રહેલા પ્રવીણભાઈને માથામાં ગંભીર ઈજા થઈ હતી. બંને ઈજાગ્રસ્તને સારવાર માટે હોસ્પિટલમાં ખસેડવામાં આવ્યા પછી પ્રવીણભાઈનું મૃત્યુ નિપજ્યું છે. પંચકોશી બી ડિવિઝન પોલીસ સ્ટેશનમાં હૈદરઅલીએ ફરિયાદ નોંધાવી છે.

ખંભાળિયા શહેરના રામ નગર વિસ્તારમાં રહેતા અરૂણભાઈ ખીમાભાઈ વસરા નામના યુવાન ગઈકાલે સવારે જામનગર ધોરીમાર્ગ પર બાઈક લઈને પસાર થતા હતા ત્યારે એક અજાણી મોટર તેઓને પાછળથી ટકરાઈ પડી હતી. ઈજા પામેલા અરૂણ ભાઈને સારવારમાં ખસેડવામાં આવ્યા છે. તેઓએ મોટરના ચાલક સામે ફરિયાદ કરી છે.

ખંભાળિયા તાલુકાના જામ સલાયા ગામમાં વસવાટ કરતા હાસમ રઝાકભાઈ મોખા ઉર્ફે સાહેલ (ઉ.વ.ર૧) નામના યુવાન તથા તેમના મિત્ર ગઈકાલે રાત્રે નવેક વાગ્યે સલાયાથી ખંભાળિયા જવા માટે બાઈક પર નીકળ્યા હતા. આ યુવાનો જ્યારે હરીપર ગામ પાસે પહોંચ્યા ત્યારે રોડ પર અચાનક જ ગાય આવી જતાં તેની સાથે અકસ્માત ટાળવા જતાં બાઈક ટકરાઈ પડ્યું હતું. રોડ પર પછડાયેલા હાસમ ઉર્ફે સાહેલ મોખાનું માથામાં ગંભીર ઈજા થવાથી મૃત્યુ નિપજ્યું છે. અલ્તાફ સલીમભાઈ સૈયદે પોલીસને જાણ કરી છે.

જો આપને આ પોસ્ટ ગમી હોય તો શેર કરો...