ત્રણ મકાનમાં દાગીના તેમજ રોકડ અને ફોરેન કરન્સીની ચોરી

Author: નોબત સમાચાર

ત્રણ મકાનમાં દાગીના તેમજ રોકડ અને ફોરેન કરન્સીની ચોરી

જાયવા પાસે પેટ્રોલપંપમાંથી રૂ.૧.૧૩ લાખની રોકડ ચોરાઈઃ

જામનગર તા. ૬: જામનગરના હરિયા કોલેજ રોડ પર આવેલા પ્રકાશ એવન્યુમાં ગુરૂવારના દિને ત્રણ મકાનમાં ચોરી થઈ છે. એક મકાનમાંથી રૂ.૨૫ હજાર રોકડા, બીજા મકાનમાંથી સોનાની બુટી, પેંડલ અને ત્રીજા મકાનમાંથી યુએસ ડોલર અને ચાઈનીઝ કરન્સી ચોરાઈ ગયા છે. ધ્રોલના જાયવા પાસે આવેલા પેટ્રોલપંપમાં શનિવારની રાત્રે રૂ.૧ લાખ ઉપરાંતની રોકડની ચોરી થઈ છે.

જામનગરના હરિયા કોલેજ રોડ પર આવેલા જકાતનાકા નજીક પ્રકાશ એવન્યુમાં રહેતા મૂળ મોરબી જિલ્લાના નવા સાદુરકા ગામના મહેશભાઈ રણછોડભાઈ પંચવટીયા નામના આસામી ગયા ગુરૂવારે પોતાની ઓફિસે ગયા હતા. તે દરમિયાન તેમના બંધ પડેલા મકાનમાં કોઈ તસ્કર ઘૂસી ગયો હતો. તે જ મકાનમાંથી રૂ.૨૫ હજાર રોકડા ઉઠાવી તસ્કરે પોબારા ભણ્યા હતા.

ઉપરોક્ત મકાનમાં ચોરી કરવા ઉપરાંત બાજુમાં જ આવેલા મનિષાબેન સંતોષ સિંગ નામના મહિલાના મકાનમાં પણ હાથફેરો થયો છે. ત્યાંથી અડધા તોલાથી વધુ વજનની સોનાની બુટી, ગણપતિજીનું સોનાનું પેંડલ ચોરાઈ ગયું છે અને રવિન્દ્રસિંગ ભુદેવસિંગના મકાનમાંથી તસ્કરને ૨૫૦૦ યુએસ ડોલર તથા ૧૦૦૦ ચાઈનીઝ કરન્સી મળી આવ્યા હતા. અંદાજે રૂ.દોઢ લાખના ડોલર અને રૂ. ૮ હજારની ચાઈનીઝ કરન્સી ચોરાઈ ગઈ હતી.

ત્રણેય મકાનમાં ચોરી કરવા અંગે અજાણ્યા તસ્કર સામે મહેશભાઈએ સિટી સી ડિવિઝન પોલીસ સ્ટેશનમાં ફરિયાદ નોંધાવી છે. પોલીસે કુલ રૂ.૧,૮૯,૫૦૦ની મત્તા ચોરાયાનો ગુન્હો નોંધ્યો છે.

જામનગર જિલ્લાના ધ્રોલ ગામથી રાજકોટ તરફના ધોરીમાર્ગ પર આવેલા જાયવા ગામના પાટિયા પાસે આવેલા વિરાજ પેટ્રોલપંપમાં શનિવારે રાત્રે ચારેક જેટલા શખ્સ ઘૂસી આવ્યા હતા. આ શખ્સોએ ત્રણ વાગ્યાથી સાડા ચાર વાગ્યા દરમિયાન પંપની ઓફિસનો દરવાજો તોડી નાખી અંદર ઘૂસ્યા પછી ટેબલ તથા થેલામાંથી રૂ.૧,૧૩,૦૦૦ રોકડા ઉઠાવી લીધા હતા.

ગઈકાલે સવારે પેટ્રોલપંપ પર તેના સંચાલક રાજકોટના ગિરીરાજસિંહ હરીશચંદ્રસિંહ ગોહિલ આવ્યા ત્યારે તેઓને ચોરીની જાણ થઈ હતી. બનાવની ધ્રોલ પોલીસને જાણ કરવામાં આવી છે. પીએસઆઈ પી.જી. પનારા તથા સ્ટાફ દોડી ગયો હતો. પેટ્રોલપંપમાં મુકવામાં આવેલા સીસીટીવી કેમેરાના ફૂટેજ પોલીસે ચકાસ્યા છે અને ગિરીરાજસિંહની ફરિયાદ પરથી ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...