જામનગરની પેઢી પાસેથી રૂ.૧૬ લાખની ડુંગળીની ઠગાઈ કરનાર ત્રિપૂટી ઝડપાઈ

Author: નોબત સમાચાર

જામનગરની પેઢી પાસેથી રૂ.૧૬ લાખની ડુંગળીની ઠગાઈ કરનાર ત્રિપૂટી ઝડપાઈ

સાયબર ક્રાઈમ પોલીસે ભાવનગરમાંથી દબોચ્યાઃ

જામનગર તા.૧૯ : જામનગરની એક પેઢી પાસેથી ગયા મહિને રૂ.૧૬ લાખ ઉપરાંતની સુકી ડુંગળી ખરીદવાનું કહી રાજસ્થાનની એક પેઢીના પ્રોપરાઈટર અને તેના સાગરિતોએ ડુંગળી મેળવી ઠેગો બતાવ્યો હતો. આ ટોળકીના ત્રણ શખ્સને સાયબર ક્રાઈમ પોલીસે ભાવનગરમાંથી દબોચી લીધા છે.

જામનગરમાં પંડિત નહેરૂ માર્ગ પર આવેલી ઓશિયાનીક ફૂડ લિમિટેડ નામની પેઢી સાથે ગયા જાન્યુઆરી મહિનામાં રાજસ્થાનના સિગ્મા એન્ટરપ્રાઇઝ નામની પેઢીના પ્રોપરાઇટર તરીકે ઓળખ આપી એક શખ્સે પોતાનું નામ રવિકુમાર નાઈ હોવાનું જણાવ્યું હતું. આ શખ્સે જામનગરના રાહુલ ગાગીયા તથા ભાવનગરના નિકુંજ ગોસ્વામી નામના બે શખ્સને સાથે રાખી ઓશિયાનીક ફૂડ લિમિટેડ પાસેથી રૂ.૧૬,૫૧,૬૫૦ની કિંમતની ડુંગળી ખરીદી લીધી હતી. તે પછી આ ડુંગળીના આપવાના થતા પૈસા ચૂકવવામાં ન આવતા ઓશિયાનીક ફૂડ લિમિટેડ તરફથી તેના કર્મચારી જયદીપ ભૂતે જામનગરના સાઇબર ક્રાઇમ પોલીસ સ્ટેશનમાં ફરિયાદ નોંધાવી હતી.

તેની તપાસ પીઆઈ આઈ.એ. ધાસુરા તથા સ્ટાફે શરૂ કર્યા પછી આરોપીઓ ભાવનગર હોવાની વિગત મળતા ત્યાં ધસી ગયેલી સાયબર ક્રાઈમ ટીમે રાહુલ ફોગાભાઈ ગાગીયા ભાવનગરના મહુવામાં ગાયત્રીનગરમાં રહેતા નિકુંજ રાજુ ગોસ્વામી અને વિજય રામજી પરમાર નામના ત્રણ શખ્સને દબોચી લેવાયા છે. આ શખ્સોના ત્રણ મોબાઈલ પણ સાયબર ક્રાઈમ પોલીસે ઝબ્બે લીધા છે.

જો આપને આ પોસ્ટ ગમી હોય તો શેર કરો...