માછીમારી માટે ગયેલા યુવાનનું દરિયામાં હૃદયરોગનો હુમલો આવતા નિપજ્યું મૃત્યુ

Author: નોબત સમાચાર

માછીમારી માટે ગયેલા યુવાનનું દરિયામાં હૃદયરોગનો હુમલો આવતા નિપજ્યું મૃત્યુ

બેભાન મળી આવેલા યુવાન પર કાળનો પંજોઃ

જામનગર તા.૧૯ : ઓખા સ્થિત આર.કે. બંદર પર માછીમારી માટે આવીને રહેતા નવસારી જિલ્લાના માછીમારનું દરિયામાં હૃદયરોગનો હુમલો આવી જતાં મૃત્યુ નિપજ્યું છે. શહેરના સુમેર કલબ રોડ પરથી બેશુદ્ધ હાલતમાં મળી આવેલા ભિક્ષુક જેવા અજાણ્યા યુવાન સારવારમાં ખસેડાયા પછી મોતને શરણ થયા છે.

દેવભૂમિ દ્વારકા જિલ્લાના ઓખામંડળના આર.કે. બંદર પર માછીમારી માટે આવીને રહેતા મૂળ નવસારી જિલ્લાના ચીખલી તાલુકાના વતની ધીરૂભાઈ મકનભાઈ હળપતિ (ઉ.વ.પ૭) નામના પ્રૌઢ દરિયામાં અન્ય માછીમારો સાથે અંબે ભવાની નામની બોટમાં માછીમારી માટે ગયા હતા.

તેઓ સોમવારે ઓખાના દરિયામાં ૭પ નોટીકલ માઈલ દૂર હતા ત્યારે તબીયત બગડતા બોટની કેબીનમાં સૂતા હતા. જ્યાં તેમને હૃદયરોગનો તિવ્ર હુમલો આવી જતાં તેનું મૃત્યુ નિપજ્યાનું બોટના ટંડેલ કિરીટ જીતેન્દ્રભાઈએ પોલીસ સમક્ષ જાહેર કર્યું છે.

જામનગરના સુમેર કલબ રોડ પર એસટી બસ ડેપોની સામેથી ગઈકાલે સાંજે અજાણ્યા લાગતા અને ચાલીસેક વર્ષના ભિક્ષુક જેવા યુવાન બેભાન હાલતમાં મળી આવ્યા હતા. તેઓને સારવાર માટે ઈન્દિરા કોલોનીમાં રહેતા શંકરભાઈ ભલાભાઈ શેખવાએ જી.જી. હોસ્પિટલમાં ખસેડ્યા પછી આ યુવાનનું મૃત્યુ નિપજ્યું છે. પોલીસે મૃતકની ઓળખ મેળવવા તપાસ હાથ ધરી છે.

જો આપને આ પોસ્ટ ગમી હોય તો શેર કરો...