માતા-પિતા વિહોણા વિદ્યાર્થીઓને સ્ટેટ બેંક ઓફ ઈન્ડિયા દ્વારા શૈક્ષણિક કીટનું વિતરણ

Author: નોબત સમાચાર

માતા-પિતા વિહોણા વિદ્યાર્થીઓને સ્ટેટ બેંક ઓફ ઈન્ડિયા દ્વારા શૈક્ષણિક કીટનું વિતરણ

નગર પ્રાથમિક શિક્ષણ સમિતિ હસ્તકની શાળાઓના

જામનગર તા. ૧૯: જામનગર મહાનગરપાલિકા સંચાલિત નગર પ્રાથમિક શિક્ષણ સમિતિ હસ્તકની શાળાઓમાં અભ્યાસ કરતા વિદ્યાર્થીઓ કે જેમના માતા-પિતા બન્ને હયાત ન હોય, પિતા હયાત ન હોય અથવા માતા હયાત ન હોય તેવા ૪૦૫ બાળકો તેમજ રાજ્ય પરીક્ષા બોર્ડ દ્વારા લેવાતી એનએમએમએસ પરીક્ષાની પૂર્વ તૈયારીના ભાગરૂપે વિદ્યાર્થીઓને જરૂરી માર્ગદર્શન સાથે નગર પ્રાથમિક શિક્ષણ સમિતિ જામનગર દ્વારા લેવામાં આવેલ સેન્ટ્રલાઈઝ પરીક્ષામાં ઉત્કૃષ્ટ દેખાવ કરનાર ૬૧ બાળકોને સ્ટેટ બેંક ઓફ ઇન્ડિયા દ્વારા શૈક્ષણિક કીટ વિતરણ નો કાર્યક્રમ સ્ટેટ બેંક ઓફ ઈન્ડિયાના જનરલ મેનેજર (હેડ ઓફીસ ગાંધીનગર) ગોપાલભાઈ ઝાના અધ્યક્ષસ્થાને યોજવામાં આવ્યો હતો.

એસબીઆઈના ડેપયુટી જનરલ મેનેજર આશુતોષભાઈ શર્મા (રાજકોટ), આસી. જનરલ મેનેજર ભુપેન્દ્રભાઈ રામાણી તથા બ્રજેશકુમાર વગેરે બેંકના અધિકારીઓ તથા નગર પ્રાથમિક શિક્ષણ સમિતિ જામનગરના ચેરમેન પરસોત્તમભાઈ કકનાણી, વાઈસ ચેરમેન દિનેશભાઈ દેસાઈ, શાસનાધિકારી ફાલ્ગુનીબેન પટેલ, સમિતિના સભ્યઓ પ્રજ્ઞાબા સોઢા, મુકેશભાઈ વસોયા, બીમલભાઈ સોનછાત્રા, નગર પ્રાથમિક શિક્ષણ સમિતિ શિક્ષક સંઘના પ્રમુખ ચંદ્રકાંતભાઈ ખાખરીયા વિગેરેની ઉપસ્થિતિમાં વિદ્યાર્થીઓને શૈક્ષણિક કીટ વિતરણ કરવામાં આવી હતી.

આ પ્રસંગે મહેમાનોનું શબ્દોથી સ્વાગત ચેરમેન પરસોત્તમભાઈ કકનાણી દ્વારા કરવામાં આવ્યુ હતું. કાર્યક્રમની રૂપરેખા શાસનાધિકારી ફાલ્ગુનીબેન પટેલ દ્વારા આપવામાં આવી હતી તેમજ સમિતિના બાળકોને આવો સહયોગ આપવા બદલ એસબીઆઈના અધિકારીઓનું સાલ તથા મોમેન્ટોથી સન્માન કરી વિશેષ આભાર માનવામાં આવ્યો હતો.

આ સમગ્ર કાર્યક્રમને સફળ બનાવવા માટે નગર પ્રાથમિક શિક્ષણ સમિતિ કચેરી સ્ટાફે જહેમત ઉઠાવી હતી. કાર્યક્રમનું સંચાલન પ્રવિણસિંહ કે. જાડેજા દ્વારા કરવામાં આવ્યુ હતું. તથા કાર્યક્રમમાં આચાર્યઓ તથા લાભાર્થી વિદ્યાર્થીઓ ઉપસ્થિત રહયા હતા.

જો આપને આ પોસ્ટ ગમી હોય તો શેર કરો...