Author: નોબત સમાચાર
જામનગરના કાલાવડ નાકા બહાર ખડકાયેલા ઘાસચારાના વાડાઓ પર જામ્યુકોનું બુલડોઝર
ચાર મોટી ટ્રેકટર ટ્રોલીમાં બસ્સો મણ ઘાસ કબ્જેઃ મનપાના ઢોરવાડામાં પહોંચાડાયું:
જામનગર શહેરમાં ગેરકાયદે રીતે ઘાસ ચારાનો વેચાણ કરવામાં આવે છે, અને તેમાંય ખાસ કરીને કાલાવડ નાકા બહાર નદી જગ્યામાં કેટલાક ઘાસ વિક્રેતાઓ દ્વારા મોટા પાયે દબાણ સજીર્ને ઘાસના વાડાઓ ઊભા કરી દેવાયા હોવાથી તે આશરે ૩૦ હજાર ફૂટ જેટલી જગ્યા ખુલ્લી કરાવવા માટે આજે સવારે મહાનગરપાલિકા દ્વારા મેગા ડીમોલીશન હાથ ધરવામાં આવ્યું હતું. જામનગર મહાનગરપાલિકાની એસ્ટેટ શાખા તેમજ સોલિડ વેસ્ટ શાખાની બંને ટીમોના આશરે ૪૦ જેટલા કર્મચારીઓની મદદથી વહેલી સવારે ૮.૩૦ વાગ્યાથી મેગા ડીમોલીશન હાથ ધરવામાં આવ્યું હતું. જેના માટે સિટી એ. ડિવિઝનના પી.આઇ. એન.એ.ચાવડા સહિતના પોલીસ અધિકારી, કર્મચારીઓનો ચુસ્ત બંદોબસ્ત મુકવામાં આવ્યો હતો. ઉપરોક્ત સ્થળે અલગ અલગ સાત જેટલા ઘાસના વાડા ખડકી દેવાયા હતા, જેના પતરા, સેડ, ફેન્સીંગ સહિતનું તમામ દબાણ દૂર કરી લેવાયું હતું. અને આશરે ૩૦,૦૦૦ ચોરસ ફૂટ જગ્યા ખુલ્લી કરાવવામાં આવી છે. ઉપરોક્ત સ્થળે વેચાણ માટે મૂકવામાં આવેલું આશરે ૨૦૦ મણ જેટલું ઘાસ, કે જે મહાનગરપાલિકાની અલગ અલગ ચાર મોટી ટ્રોલીમાં ભરી અને તમામ ઘાસને મહાનગરપાલિકા સંચાલિત ઢોરના ડબ્બામાં મોકલી દેવામાં આવ્યું છે. જામનગર શહેરને રસ્તે રઝળતા પશુઓથી મુક્ત કરાવવાના ભાગરૂપે આ પગલું ભરવામાં આવ્યું હતું. ઉપરાંત શહેરની મધ્યમાં પણ કેટલાક ઘાસના વિક્રેતાઓ કોઈપણ પ્રકારની મંજૂરી વિના ઘાસનું વેચાણ કરે છે, તે મુજબ જામનગરમાં ઇન્દ્રપ્રસ્થ કોમ્પલેક્ષની સામે તેમ જ પંચેશ્વર ટાવર નજીક ગૌરીશંકર મહાદેવના મંદિરની સામેના ભાગમાં બે ઘાસના વિક્રેતાઓને ત્યાં પણ મહાનગરપાલિકાની ટુકડી ત્રાટકી હતી, અને ત્યાં હાજર રહેલો ઘાસનો જથ્થો કબજે કરી લઇ બંને સ્થળો પરથી જાહેરમાં ઘાસનું વેચાણ બંધ કરાવી દેવામાં આવ્યું છે.આ કાર્યવાહીમાં નાયબ મ્યુનિ. કમિશ્નર દેવેન્દ્રસિંહ ઝાલા, અન્ય અધિકારીઓમાં મુકેશ વરણવા, કટેશીયાભાઈ, નિતીન દિક્ષીત, રાજભા જાડેજા, સુનિલ ભાનુશાળી સહિતના અધિકારીઓ હાજર રહ્યા હતાં.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
