દ્વારકા નજીક બરડીયા પાસે રિક્ષા તથા મોટર ટકરાયાઃ પિતા-પુત્રીના નિપજ્યા મૃત્યુ

Author: નોબત સમાચાર

દ્વારકા નજીક બરડીયા પાસે રિક્ષા તથા મોટર ટકરાયાઃ પિતા-પુત્રીના નિપજ્યા મૃત્યુ

ઓવરબ્રિજ પાસે રોંગ સાઈડમાં મોટરે સર્જયો અકસ્માતઃ

જામનગર તા.૧૮ : હોળી, ધૂળેટી પર્વ પર દ્વારકાધીશના દર્શન કરી રિક્ષામાં પરત જતાં સાવરકુંડલાના વતની અને હાલમાં પોરબંદરમાં રહેતા એક વૃદ્ધ તથા તેમના યુવાન પુત્રીને કાળનો ભેટો થયો હતો. રિક્ષા સાથે રોંગ સાઈડમાં આવેલી મોટર ટકરાઈ પડતા પિતા-પુત્રી એ જીવ ખોયો હતો.

દ્વારકામાં હોળી-ધૂળેટી પર્વ પર મોટી સંખ્યામાં યાત્રાળુઓ ઉમટી પડ્યા હતા. તેઓ જગત મંદિરે દર્શન કરી કૃતાર્થ થયા હતા. જેમાં સાવરકુંડલાના ભગવાનજી વસ્તાભાઈ ગુજરીયા અને તેમનો પરિવાર પણ સામેલ થયો હતો.

ઉપરોક્ત પરિવાર દર્શન કર્યા પછી પરત જવા માટે રિક્ષામાં નીકળ્યો હતો. તે રિક્ષા બરડીયા પાસે પહોંચી ત્યારે રોંગ સાઈડમાં ધસી આવેલી એક મોટર તેની સાથે ટકરાઈ પડી હતી. આ અકસ્માતમાં ભગવાનજીભાઈ (ઉ.વ.૬પ) તથા તેમના પુત્રી ભારતીબેન સંજયભાઈ (ઉ.વ.૩૦)નું ગંભીર ઈજા થવાથી મૃત્યુ નિપજ્યું હતું. અકસ્માત સર્જી મોટરનો ચાલક નાસી ગયો હતો. રિક્ષામાં સાથે જઈ રહેલા અન્ય વ્યક્તિઓ પણ ઘવાયા હતા. મૃતક ભારતીબેનના પતિ સંજય નાનજીભાઈ શિયારની રાવ પરથી પોલીસે મોટરચાલક સામે ગુન્હો નોંધ્યો છે

જો આપને આ પોસ્ટ ગમી હોય તો શેર કરો...