ગુજરાતનો વીજ પુરવઠો વર્ષ-૨૦૨૫ સુધીના ચાર વર્ષમાં ૨૮ ટકા વધ્યોઃ કેન્દ્રીય ઉર્જા રાજયમંત્રી

Author: નોબત સમાચાર

ગુજરાતનો વીજ પુરવઠો વર્ષ-૨૦૨૫ સુધીના ચાર વર્ષમાં ૨૮ ટકા વધ્યોઃ કેન્દ્રીય ઉર્જા રાજયમંત્રી

સાંસદ પરિમલભાઈના પ્રશ્નનો સંસદમાં સરકારે આપ્યો જવાબ

જામનગર તા. ૫: ગુજરાતનો વીજ પુરવઠો વર્ષ ૨૦૨૦ અને ૨૦૨૪ વચ્ચે ૨૮% વધ્યો છે. અને ભારતની સ્થાપિત વીજ ઉત્પાદન ક્ષમતા ૨૦૩૧-૩૨માં ૯૦૦ ગીગાવોટ થવાની સંભાવના જણાવતા કેન્દ્રીય રાજ્ય કક્ષાના ઉર્જા મંત્રી શ્રીપદ નાયકે સાંસદ પરિમલભાઈ નથવાણીના પ્રશ્નના જવાબમાં વિસ્તૃત માહિતી આપી હતી.

ગુજરાતમાં છેલ્લા ચાર વર્ષમાં વીજ પુરવઠામાં વધારો જોવા મળ્યો છે કારણ કે રાજ્યમાં વીજ પુરવઠો નાણાકીય વર્ષ ૨૦૨૦માં ૧,૧૩,૯૩૯ મિલિયન યુનિટથી ૨૮% વધીને નાણાકીય વર્ષ ૨૦૨૪માં ૧,૪૫,૭૪૦ મિલિયન યુનિટ થયો છે. આ ઉપરાંત, નાણાકીય વર્ષ ૨૦૨૫ના પ્રથમ નવ મહિનામાં રાજ્યનો વીજ પુરવઠો ૧,૧૩,૬૯૭ મિલિયન યુનિટને સ્પર્શી ગયો છે. સરકાર ૨૦૩૧-૩૨માં તમામ સ્ત્રોતોમાંથી ભારતની કુલ સ્થાપિત વીજ ઉત્પાદન ક્ષમતાને ૯૦૦ જીડબલ્યુ સુધી લઈ જવાની પણ યોજના ધરાવે છે. કેન્દ્રીય ઊર્જા રાજ્ય મંત્રી શ્રીપદ નાઈકે ફેબ્રુઆરી ૩, ૨૦૨૫ના રોજ રાજ્યસભા સાંસદ પરિમલ નથવાણીએ પૂછેલા પ્રશ્નના જવાબમાં આ માહિતી ઉપલબ્ધ બનાવી હતી.

મંત્રીના નિવેદન મુજબ સરકારે છેલ્લા ૧૦ વર્ષમાં દેશને વીજળીની ખાધમાંથી પર્યાપ્ત વીજળી ધરાવતાં દેશમાં પરિવર્તિત કર્યો છે. દેશની વર્તમાન સ્થાપિત વીજ ઉત્પાદન ક્ષમતા ૪,૬૨,૦૬૫ મેગાવોટ છે. મંત્રીશ્રીના જણાવ્યા અનુસાર એપ્રિલ ૨૦૧૪થી ૨,૩૦,૦૫૦ મેગાવોટ ઉત્પાદન ક્ષમતા ઉમેરીને ભારત સરકારે વીજળીની ઉણપના નિર્ણાયક મુદ્દાને ઉકેલ્યો છે.

મંત્રીએ એમ પણ જણાવ્યું કે ૨૦૩૧-૩૨માં સ્થાપિત ઉત્પાદન ક્ષમતા ૯૦૦ ગીગાવોટ થવાની સંભાવના છે જેમાં પરંપરાગત સ્ત્રોતો- કોલસો, લિગ્નાઈટ વગેરે, બિનપરંપરાગત સ્ત્રોતો- સૌર, પવન, હાઇડ્રો, પમ્પ સ્ટોરેજ પ્રોજેક્ટ (પીએસપી) અને બેટરી એનર્જી સ્ટોરેજ સિસ્ટમ (બીઇએસએસ)નો સમાવેશ થાય છે. તેમણે એમ પણ જણાવ્યું કે, ઊર્જા મંત્રાલયે રાજ્યો સાથે પરામર્શ કરીને ૨૦૩૧-૩૨ સુધીમાં ઓછામાં ઓછી ૮૦,૦૦૦ મેગાવોટની થર્મલ પાવર ક્ષમતા ઉમેરવાની યોજનાની કલ્પના કરી છે. આ લક્ષ્યાંક સામે ૨૮,૦૨૦ મેગાવોટ થર્મલ પાવર ક્ષમતા પહેલેથી જ નિર્માણાધીન છે અને નાણાકીય વર્ષ ૨૦૨૪-૨૫માં ૧૯,૨૦૦ મેગાવોટ થર્મલ પાવર ક્ષમતા માટે કોન્ટ્રાક્ટ આપવામાં આવ્યા છે, એમ જણાવી મંત્રીશ્રીએ ઉમેર્યું હતું કે વધુમાં ૩૬,૩૨૦ મેગાવોટ કોલસો અને લિગ્નાઈટ આધારિત ઉત્પાદન ક્ષમતા તૈયાર કરવાનું આયોજન છે, જે દેશમાં આયોજનના વિવિધ તબક્કામાં છે.

તેમણે એમ પણ કહૃાું કે ૧૩,૯૯૭.૫ મેગાવોટના હાઈડ્રો ઈલેક્ટ્રિક પ્રોજેક્ટ્સ અને ૮,૦૦૦ મેગાવોટના પમ્પ્ડ સ્ટોરેજ પ્રોજેક્ટ્સ (પીએસપી) નિર્માણાધીન છે. ૨૪,૨૨૫.૫ મેગાવોટના હાઇડ્રો-ઇલેક્ટ્રિક પ્રોજેક્ટ અને ૫૦,૭૬૦ મેગાવોટ પીએસપી યોજનાના પ્રોજેક્ટ વિવિધ તબક્કા હેઠળ છે અને ૨૦૩૧-૩૨ સુધીમાં પૂર્ણ કરવાનો લક્ષ્યાંક છે, એમ પણ તેમણે ઉમેર્યું હતું. મંત્રીએ એવી પણ માહિતી આપી હતી કે ૭,૩૦૦ મેગાવોટ પરમાણુ વીજ ક્ષમતા નિર્માણાધીન છે અને ૨૦૨૯-૩૦ સુધીમાં પૂર્ણ કરવાનો લક્ષ્યાંક છે. ૭,૦૦૦ મેગાવોટ યોજના આયોજન અને મંજૂરીના વિવિધ તબક્કાઓ હેઠળ છે.

મંત્રીના નિવેદન મુજબ ન્યૂ એન્ડ રિન્યૂએબલ એનર્જી મિનિસ્ટ્રીએ (એમએનઆરઈ) નાણાકીય વર્ષ ૨૦૨૩-૨૪થી ૨૦૨૭-૨૮ સુધી રિન્યુએબલ એનર્જી અમલીકરણ એજન્સીઓ થકી ૫૦ ગીગાવોટ/વાર્ષિક રિન્યૂએબલ એનજીર્નો વીજ પુરવઠો પ્રાપ્ત કરવા માટેની બિડ મંગાવવાની પ્રક્રિયા ચાલુ છે અને ઓટોમેટિક રૂટ હેઠળ ૧૦૦% સીધા વિદેશી મૂડીરોકાણની મંજૂરી પણ આપવામાં આવી છે. ટ્રાન્સમિશન પ્લાનિંગ વિશે વાત કરતાં મંત્રીએ જણાવ્યું હતું કે નેશનલ ઇલેક્ટ્રિસિટી પ્લાન મુજબ ૨૦૨૨-૨૩ થી ૨૦૩૧-૩૨ સુધીના દસ વર્ષના સમયગાળા દરમિયાન લગભગ ૧,૯૧,૪૭૪ સીકેએમ ટ્રાન્સમિશન લાઇન અને ૧૨૭૪ જીવીએ ટ્રાન્સફોર્મેશન ક્ષમતા (૨૨૦ કેવી અને તેનાથી ઉપરના વોલ્ટેજ સ્તરે) ઉમેરવાનું આયોજન છે.

જો આપને આ પોસ્ટ ગમી હોય તો શેર કરો...