ગેંગરેપના એક આરોપીની ચાર્જશીટ પછી રજૂ થયેલી જામીન અરજી ફગાવાઈ

Author: નોબત સમાચાર

ગેંગરેપના એક આરોપીની ચાર્જશીટ પછી રજૂ થયેલી જામીન અરજી ફગાવાઈ

જામનગરમાં ગેંગરેપના કિસ્સાએ જગાવી હતી ચકચારઃ

જામનગર તા.૫ : જામનગરમાં ત્રણેક મહિના પહેલાં એક યુવતી પર ગેંગરેપ ગુજારનાર ત્રણ શખ્સ સામે ફરિયાદ થયા પછી પોલીસે આ ગુન્હાનું ચાર્જશીટ રજૂ કર્યું હતું. આ ગુન્હાના એક આરોપીએ જામીનમુક્ત થવા કરેલી અરજી અદાલતે નકારી કાઢી છે.

જામનગરના પંચેશ્વર ટાવર વિસ્તારમાં આવેલા મકાનમાં સફાઈ સહિતનું કામ કરતી એક યુવતી તે મકાનના બાથરૂમમાં સ્નાન કરવા માટે ગઈ ત્યારે તેણીના ફોટા પાડી લઈ વીડિયો ઉતારી લઈ તેણીને બ્લેકમેઈલ કરાયા પછી હુસેન ગુલમામદ તથા તેના મિત્ર ખાનભાઈ અને કારાભાઈ નામના શખ્સોએ અવારનવાર દુષ્કર્મ ગુજારી ફોટા, વીડિયો વાયરલ કરવાની ધમકી આપ્યાની પોલીસમાં થોડા મહિના પહેલા ફરિયાદ કરવામાં આવી હતી.

પોલીસે ગેંગરેપ અંગે ગુન્હો નોંધી ત્રણેય આરોપીની ધરપકડ કરી હતી. અદાલતે આરોપીને જેલહવાલે કર્યા હતા. પોલીસે આઈપીસી ૩૭૬ (ડી) (ર) (એન), ૩૨૩, ૫૦૬ (ર), ૩૫૪ (બી) (સી) અંંગે ચાર્જ શીટ તૈયાર કરી અદાલતમાં રજૂ કર્યું હતું.

ત્યારપછી આરોપી પૈકીના હુસેન ગુલમામદ શેખે જામીન મુક્ત થવા અદાલતમાં અરજી કરી હતી અને તેમાં દલીલ કરી હતી કે, ફરિયાદી મહિલાને આરોપી સાથે પહેલેથી જ સંબંધ હતો અને તે અંગેનો કરાર તથા સોગંદનામુ પણ કરી આપ્યું હતું. તેની સામે હાજર થયેલા સરકારી વકીલ રાજેશ વશીયર અને મૂળ ફરિયાદીના વકીલ ધર્મેશ ગોંડલીયાએ દલીલ કરી હતી કે, આરોપીએ રજૂ કરેલા ફોટોગ્રાફ તથા કરાર અને સોગંદનામુ ષડયંત્રના ભાગરૂપે કરાયા હોવાનું જણાઈ આવે છે, આ આરોપી ગુન્હો કરવાની ટેવવાળો છે. અદાલતે તે દલીલ ગ્રાહ્ય રાખી આરોપી હુસેન ગુલમામદ શેખ ઉર્ફે વાઘેરની જામીન અરજી નકારી કાઢી છે.

ઉલ્લેખનીય છે કે, એક આરોપી દ્વારા સરકારી જમીન પર ખડકી દેવાયેલા ફાર્મ હાઉસને પણ પોલીસે જમીન દોસ્ત કર્યું હતું.

જો આપને આ પોસ્ટ ગમી હોય તો શેર કરો...